تجارت و صنعت کے مرکزی وزیر جناب پیوش گوئل 27 تا 28 اکتوبر 2025 کو بیلجیم کے دارالحکومت برسلز کا دورہ کریں گے تاکہ یورپی یونین کے ایگزیکٹو نائب صدر اور تجارتی کمشنر محترم ماروش شیفکووچ کے ساتھ اعلیٰ سطحی مذاکرات کریں۔

یہ دورہ بھارت–یورپی یونین آزاد تجارتی معاہدے (ایف ٹی اے) کے جاری مذاکرات کے اہم مرحلے پر ہو رہا ہے، کیونکہ دونوں ملک جلد از جلد ایک جامع، متوازن اور باہمی مفاد پر مبنی تجارتی معاہدہ طے کرنے کی کوششیں تیز کر رہے ہیں۔ اس ماہ کے آغاز میں ہونے والے چودہویں مذاکراتی دور سے پیدا ہونے والی رفتار کو آگے بڑھاتے ہوئے، وزیر موصوف کا یہ دورہ مذاکرات کو اسٹریٹجک رہنمائی اور سیاسی تحریک فراہم کرنے کا مقصد رکھتا ہے۔

مذاکرات میں مجوزہ ایف ٹی اے کے اہم شعبے زیرِ بحث آئیں گے، جن میں مارکیٹ تک رسائی، غیر محصولات پر مبنی اقدامات، اور ضابطہ جاتی تعاون شامل ہیں۔ یہ دورہ اب تک حاصل ہونے والی پیش رفت کا جائزہ لینے اور مزید ہم آہنگی کی ضرورت والے شعبوں کی نشاندہی کرنے کے لیے بھی مفید ثابت ہوگا۔

وزیر موصوف جناب پیوش  گوئل کے برسلز میں اجلاس میں کمشنر شیفکووچ کے ساتھ دو طرفہ ملاقات شامل ہوگی جس کے بعد ایک ورکنگ ڈنر ہوگا، جہاں دونوں رہنما بھارت–یورپی یونین کے تجارتی اور اقتصادی شراکت داری کو مضبوط کرنے کی مشترکہ خواہش کی تصدیق کریں گے۔

یہ دورہ اس پس منظر میں ہو رہا ہے کہ اس سال کے آغاز میں وزیرِ اعظم جناب نریندر مودی اور یورپی کمیشن کی صدر محترمہ ارسلا وان ڈیر لائیئن کے درمیان ملاقات کے بعد بھارت–یورپی یونین کی شراکت داری نے نئی اسٹریٹجک گہرائی حاصل کی ہے۔ دونوں رہنماؤں نے مستقبل کے لیے تیار تجارتی تعلقات کی اہمیت پر زور دیا، جو دونوں ملکوں کی خوشحالی، پائیداری اور جدت کو آگے بڑھائے۔

وزیر موصوف جناب پیوش گوئل کا یہ برسلز دورہ اس مشترکہ وژن کو عملی نتائج میں تبدیل کرنے میں ایک اہم قدم ہے۔ یہ بھارت کی یورپی یونین — جو اس کے سب سے بڑے تجارتی شراکت داروں میں سے ایک ہے — کے ساتھ تعلقات کو فروغ دینے  کے عزم کی عکاسی کرتا ہے اور ایک ایسے معاہدے کی طرف پیش رفت کو ظاہر کرتا ہے جو مضبوط سپلائی چین، پائیدار ترقی، اور قواعد پر مبنی عالمی تجارتی نظام میں حصہ ڈالتا ہے۔  

************

ش ح ۔   م  د ۔  م  ص

(U :  301 )