தமிழ்நாடு வேளாண் பல்கலைக்கழகத்தின் நிர்வாகக் கட்டுப்பாட்டின் கீழ் வேலூரில் உள்ள வேளாண் அறிவியல் மையத்திற்கு மத்திய  வேளாண் அமைச்சர் திரு. சிவராஜ் சிங் சௌஹான் இன்று 2025 அக்டோபர் 25 வருகை தந்தார்.  பிரதமரின் தனம் தானியம் வேளாண் திட்டம்,  தேசிய பருப்பு வகைகள் இயக்கம், இயற்கை வேளாண்மை இயக்கம், பருப்பு வகைகள் மீதான தொகுப்பு முன்னணி செயல்விளக்கங்கள்,   கரிம உரங்கள்  போன்ற பல்வேறு திட்டங்களின் சுமார் 500 பயனாளி விவசாயிகளுடன் அவர் கலந்துரையாடினார். இந்தத் திட்டங்களில் பங்கேற்பதன் மூலம் அவர்கள் எவ்வாறு பயனடைந்தனர், விவசாயம், கால்நடை வளர்ப்பு, மீன்வளத் துறைகளில் அவர்கள் எதிர்கொள்ளும் சவால்கள் குறித்து அவர் விவசாயிகளிடமிருந்து கேட்டறிந்தார். பங்கேற்கும் விவசாயிகளின் தகவல் மற்றும் நன்மைக்காக பல்வேறு பங்குதாரர்களால் அமைக்கப்பட்ட கண்காட்சி அரங்குகளையும் மத்திய வேளாண் அமைச்சர் பார்வையிட்டார்.

ஆறு மாவட்டங்களைச் சேர்ந்த விவசாயிகளுடன் இரண்டு அமர்வுகளில்  அவர் கலந்துரையாடினார். முதல் அமர்வில்,  தமிழ்நாட்டிலிருந்து தேர்ந்தெடுக்கப்பட்ட 4 மாவட்டங்களைச் சேர்ந்த பிரதமரின் தனம் தானியம் வேளாண் திட்ட விவசாயிகளுடன் கலந்துரையாடினார். இத்திட்டத்தின் கீழ், விருதுநகர், சிவகங்கை, தூத்துக்குடி, ராமநாதபுரம் மாவட்ட விவசாயிகளுக்கு பயனளிக்கும் மத்திய அரசின் 11 அமைச்சகங்கள் செயல்படுத்தும் 36 திட்டங்களை ஒன்றிணைக்க முயற்சிகள் மேற்கொள்ளப்படும் என்று அவர் குறிப்பிட்டார். இந்த உரையாடலின் போது, மத்திய அரசின் ஆதரவுடன் தமிழக விவசாயிகள் அனைத்து வழிகளிலும் ஆதரிக்கப்படுவார்கள் என்றும் அவர் தெரிவித்தார். ஒருங்கிணைப்பு எவ்வாறு திட்டமிடப்பட்டுள்ளது என்பது குறித்து நான்கு வேளாண் அறிவியல் மையத் தலைவர்களிடமும் அவர் விசாரித்தார். எண்ணெய் வித்துகள், பருப்பு வகைகள் மற்றும் பல திட்டங்களில் இயற்கை விவசாயத்தை ஏற்றுக்கொண்ட விவசாயிகள் தங்கள் திருப்தியை வெளிப்படுத்தினர்.

இரண்டாவது அமர்வில்,  இந்தியாவை பருப்பு உற்பத்தியில் தன்னிறைவு அடையச் செய்வதற்காக நாடு முழுவதும் ஒரு தனித்துவமான திட்டத்தை பிரதமர் எவ்வாறு தொடங்கி வைத்துள்ளார் என்பதை அமைச்சர் விளக்கினார். பருப்பு பற்றாக்குறை உள்ள மாநிலமாக இருப்பதால், தமிழ்நாடு மிகுந்த பயனடையும் என்றும், இந்தத் திட்டத்தின் மூலம் மேம்படுத்தப்பட்ட வகைகள், மேலாண்மை தொழில்நுட்பங்கள், பதப்படுத்துதல் மற்றும் நூறு சதவீத சந்தைப்படுத்தல் உறுதி செய்யப்படும் என்றும் அவர் குறிப்பிட்டார்.

இந்தக் கலந்துரையாடலின் போது, தேங்காய் பூச்சி மற்றும் நோய் அச்சுறுத்தலால் விவசாயிகள் எதிர்கொள்ளும் பிரச்சினைகளைத் தீர்க்க முயற்சிகள் மேற்கொள்ளப்படும் என்றும் அமைச்சர் கூறினார். மாம்பழ உற்பத்தியில் ஏற்பட்டுள்ள மந்தநிலை காரணமாக, மாம்பழங்களுக்கான விலை லாபகரமானதாக இல்லை என்றும், எனவே, மாம்பழத்திற்கான மதிப்பு கூட்டல் / பதப்படுத்தும் தொழில்களை நிறுவ / ஊக்குவிப்பதற்கான சாத்தியக்கூறுகளை அரசு ஆராயும் என்றும் அவர் கூறினார். அதிக எண்ணிக்கையிலான விவசாயிகள் பயனடையும் வகையில், பிரதமரின் கிசான் திட்டத்தில் தகுதியான தமிழக பயனாளிகளைச் சேர்ப்பதில் வேளாண் அறிவியல் மையம் உதவும் என்றும் அவர் உறுதியளித்தார்.

தமிழக விவசாயிகளை மிகவும் நேசிப்பதாகவும், அவர்களின் கலாச்சாரம், மதிப்புகள் மற்றும் கடினமாக உழைக்கும் தன்மையைப் பாராட்டுவதாகவும் அமைச்சர் தெரிவித்தார். இயற்கை வேளாண்மை மற்றும் பிற முயற்சிகள் குறித்து தமிழகத்திற்கு மீண்டும் வந்து விவசாயிகளுடன் கலந்துரையாடுவதாக அவர் உறுதியளித்தார்.

இந்த கலந்துரையாடல் கூட்டத்தில், தமிழ்நாடு தோட்டக்கலை மற்றும் தோட்டப் பயிர்கள், வேளாண்மை மற்றும் விவசாயிகள் நலத்துறை இயக்குநர், தமிழ்நாடு வேளாண்மைப் பல்கலைக்கழக துணைவேந்தர் டாக்டர் ஆர். தமிழ் வேந்தன் உள்பட உயரதிகாரிகளுடன் சுமார் 500 விவசாயிகளும்  கலந்து கொண்டனர்.

மேலும் விவரங்களுக்கு இந்த செய்திக் குறிப்பை ஆங்கிலத்தில் இங்கே காணவும்: https://www.pib.gov.in/PressReleasePage.aspx?PRID=2182479

***

AD/PKV/RJ