زراعت اور کسانوں کی فلاح و بہبود اور دیہی ترقی کے مرکزی وزیر جناب شیوراج سنگھ چوہان نے آج گورکھپور، اتر پردیش کے ڈمری خورد گاؤں میں منعقدہ ’گرام چوپال‘ کے دوران ہمارے دیہی بھائیوں اور بہنوں سے بات چیت کی۔ اس موقع پر بڑی تعداد میں مقامی لوگوں، کسانوں، سیلف ہیلپ گروپ کے اراکین اور پنچایت کے نمائندوں نے شرکت کی۔

جناب شیوراج سنگھ چوہان نے کسانوں کے مفاد میں مرکزی اور اتر پردیش حکومتوں کی مشترکہ کوششوں کے بارے میں بات کی اور کہا کہ حکومت پیداوار بڑھانے، بہتر بیج فراہم کرنے اور لاگت کو کم کرنے کے لیے مسلسل اقدامات کر رہی ہے۔ مرکزی وزیر نے فصل کے نقصانات کے لیے پردھان منتری فصل بیمہ یوجنا کے تحت معاوضے کی یقین دہانی کرائی۔ کسانوں کے ساتھ بات چیت کے دوران، انہوں نے اہم فصلوں، پیداواری لاگت اور مقامی کھانے کی دکانوں کی ضرورت جیسے مسائل پر بھی رائے لی۔

جناب چوہان نے مرکزی حکومت کے ’دالوں میں خود انحصاری‘ مشن کے تحت دال اور چنے کی پیداوار بڑھانے کی پہل کے بارے میں جانکاری دی اور کسانوں سے تجاویز بھی طلب کیں۔ انہوں نے ذکر کیا کہ اس سال مرکزی حکومت نے ربیع کی فصلوں کے لیے کم از کم امدادی قیمت (ایم ایس پی) میں اضافہ کیا ہے، جس سے کسانوں کو کافی فائدہ پہنچے گا۔ انہوں نے خاص طور پر گندم، چنے، دال اور سرسوں کے لیے ایم ایس پی میں اضافے کی تفصیلات بتائیں۔

جناب شیوراج سنگھ نے کہا کہ وزیر اعظم جناب نریندر مودی کی قیادت میں، زرعی مشینری پر جی ایس ٹی کی شرحوں کو 12فیصد اور 18فیصد سے کم کر کے 5فیصد کر دیا گیا ہے، جس سے کسانوں کو براہ راست مالی فائدہ پہنچا ہے۔

مرکزی وزیر نے کسانوں پر زور دیا کہ وہ زراعت کے ساتھ ساتھ مویشی پالنے، ماہی پروری، شہد کی مکھیوں کے پالنے اور باغبانی کو بھی اپنائیں۔ انہوں نے جانوروں کی ویکسینیشن کی سرکاری اسکیموں کے بارے میں بھی معلومات شیئر کیں۔

اس گرام چوپال میں کسانوں، سیلف ہیلپ گروپ کے ارکان اور پنچایت کے نمائندوں کی ایک بڑی تعداد موجود تھی، جہاں انہوں نے مرکزی وزیر جناب چوہان کے ساتھ اپنے مسائل اور تجاویز شیئر کیں۔ پروگرام کے اختتام پر، جناب چوہان نے دیہی ترقی اور زرعی خوشحالی کے لیے سب سے تعاون اور شرکت کی اپیل کی۔

ش ح ۔ ال

UR-67