مرکزی وزیر، جناب بھوپیندر یادو نے آج جنوبی افریقہ کے شہر کیپ ٹاؤن میں'یکجہتی، مساوات، پائیداری' کے موضوع کو آگے بڑھانے میں قائدانہ کوششوں کے لیے جمہوریہ جنوبی افریقہ کا شکریہ ادا کرتے ہوئے، ماحولیات، جنگلات اور موسمیاتی تبدیلی کے G20 ملکوں کے وزرائے ماحولیات کے اجلاس میں ہندوستان کا موقف بیان کیا۔ وزیرموصوف نے مندوبین پر زور دیا کہ وہ مقصد کے لحاظ سے متحد، حق اور وسائل میں برابر، کرہ ارض سے وابستہ دنیا کی تعمیر کے راستے پر چلیں۔

اپنے خطاب میں، جناب یادو نے اطمینان کا اظہار کیا کہ جیسے ہی پیرس معاہدہ 10 سال مکمل کرتا ہے، تمام ممالک اپنے این ڈی سی کا تعین کرنے، ان کے لیے کام کرنے کے لیے یکجاہوگئے اور بہت سے معاملات میں، ہندوستان کی طرح، مقررہ وقت سے پہلے ہی اپنے مقاصد حاصل کرنے لگے۔

اس اجتماع کی توثیق کرتے ہوئے کہ ہندوستان ہمیشہ حل میں شامل ہے، وزیرموصوف نے زور دے کرکہا کہ G20 کو عزائم اور نفاذ کے درمیان ایک پل کے طور پر کام کرنا چاہیے، اس بات کو یقینی بناتے ہوئے کہ ہر ملک کے تعاون کا احترام کیا جائے اور ہر ملک کی صلاحیت میں اضافہ ہو۔ "ہمیں 'مشترکہ لیکن امتیازی ذمہ داریوں اور متعلقہ صلاحیتوں' کے اصولوں کی توثیق کرنی چاہیے۔ انہوں نے مزید کہاکہ اہم ماحولیاتی چیلنجوں سے نمٹنے کے لیے ترقی پذیر ممالک کے لیے مالی اعانت کو محض وعدے کے بجائے ایک فرض کے طور پر ادا کرنے کی ضرورت ہے کیونکہ مساوات کوئی سہولت نہیں ہے - یہ ایک حق ہے"۔

جناب یادو نے کہاکہ وزیر اعظم جناب نریندر مودی نے گزشتہ سال جی 20 سربراہ اجلاس میں اپنے خطاب میں 'بنیادی باتوں پر واپس جانے' کی مطابقت اور اسے ہمارے 'مستقبل کی طرف مارچ' کے ساتھ مربوط کرنے کی اہمیت پر روشنی ڈالی تھی۔ انہوں نے کہا "ماحولیاتی نظام پر مبنی حل اور مستقبل کی ٹیکنالوجیز کو ایک پائیدار مستقبل بنانے کے لیے آپس میں ملنا چاہیے۔ علم کا اشتراک، صلاحیت کی تعمیر، ٹیکنالوجی کی ہمہ گیر ترقی اور منتقلی پائیداری کے حصول میں اہم کردار ادا کرے گی"۔

وزیرموصوف نے ایک 'پورے معاشرے' کے نقطہ نظر کی وکالت کی اور افراد کے ' کرہ ارض کے  لیے سازگار  طرز زندگی کا انتخاب' بامعنی اور ٹھوس نتائج کے حصول کے لیے سب سے زیادہ موزوں ہوگا۔ انہوں نے کہا "ہم خلوص دل سے جنوبی افریقی ایوان صدر کی طرف سے تجویز کردہ عوام پر مبنی، جامع، مربوط اور تعاون پر مبنی نقطہ نظر کی تعریف کرتے ہیں اور اس کی مکمل حمایت کرتے ہیں۔"

********

ش ح۔ا س۔ م ر

U-No.9956

(रिलीज़ आईडी: 2179966) आगंतुक पटल : 39