కామన్వెల్త్ శతాబ్ది క్రీడలు-2030కి ఆతిథ్యంపై భారత్‌ ప్రతిపాదన పంపిందని కేంద్ర యువజన వ్యవహారాలు-క్రీడలు, కార్మిక-ఉపాధి శాఖల మంత్రి డాక్టర్ మన్‌సుఖ్‌ మాండవీయ ఇవాళ ప్రకటించారు. ఈ క్రీడల నిర్వహణకు అహ్మదాబాద్‌ నగరాన్ని వేదికగా సిఫారసు చేస్తామని కామన్వెల్త్‌ క్రీడా కార్యనిర్వాహక బోర్డు ధ్రువీకరించినట్లు పేర్కొంటూ- “భారత క్రీడా రంగానికి ఇదొక మేలిమలుపు” అని ఆయన అభివర్ణించారు.

ఈ మేరకు నవంబరు 26న కామన్వెల్త్ క్రీడల సర్వసభ్య సమావేశానికి సిఫారసు సమర్పిస్తామని బోర్డు వెల్లడించింది.

కేంద్ర క్రీడల మంత్రి దీనిపై తన అధికారిక సామాజిక మాధ్యమ ఖాతా ద్వారా ఒక పోస్టులో స్పందిస్తూ- “భారత క్రీడా రంగానికి ఇదొక మేలిమలుపు! కామన్వెల్త్ శతాబ్ది క్రీడలు-2030కి ఆతిథ్య నగరంగా అహ్మదాబాద్‌ను పరిగణనలోకి తీసుకోవాలన్న భారత్‌ ప్రతిపాదనపై సిఫారసుకు కామన్వెల్త్ క్రీడల కార్యనిర్వాహక బోర్డు అంగీకరించింది. ఇది మన దేశానికి గర్వకారణం... బోర్డుకు కృతజ్ఞతలు” అని పేర్కొన్నారు. అలాగే-

“అంతర్జాతీయ క్రీడారంగంలో భారత్‌ ప్రాబల్యం విస్తరణను ఈ పరిణామం ప్రతిబింబిస్తోంది. ప్రధానమంత్రి శ్రీ నరేంద్ర మోదీ దార్శనిక నాయకత్వంతోనే ఈ స్వప్నం సాకారమైంది. భారత్‌కు ప్రపంచ క్రీడా పటంలో దృఢంగా నిలపడంపై నిబద్ధతతోనే ఇది సాధ్యమైంది” అని వ్యాఖ్యానించారు.

భారత్‌లో 2036 ఒలింపిక్స్‌ నిర్వహించాలన్న దేశం ప్రగాఢ ఆకాంక్షకు ఈ పరిణామం కొత్త రెక్కలు తొడుగుతుందని డాక్టర్ మన్‌సుఖ్‌ మాండవీయ అన్నారు. ఈ మేరకు-

“ఒలింపిక్స్‌-2036 క్రీడోత్సవ నిర్వహణపై కేంద్ర ప్రభుత్వ దార్శనికతకు ఇది ఎంతో ఊపునిస్తుంది. న్యూఢిల్లీలో ఇటీవలే 100కు పైగా దేశాల నుంచి 2200 మందికిపైగా క్రీడాకారులు, సహాయక సిబ్బంది భాగస్వామ్యంతో ‘ప్రపంచ పారా అథ్లెటిక్స్’ను విజయవంతం చేశాం. దీనిపై అంతర్జాతీయ పారాలింపిక్ కమిటీ అధ్యక్షుడు ఆండ్రూ పార్సన్స్ సహా అగ్ర అంతర్జాతీయ క్రీడాకారుల నుంచి ప్రశంసలు కూడా లభించాయి. గడచిన దశాబ్ద కాలంలో అంతర్జాతీయ క్రీడా మౌలిక సదుపాయాలను భారత్‌ విశేషంగా అభివృద్ధి చేసింది. విధానపరమైన మార్పులతోపాటు క్రీడా విజ్ఞానం, ఆర్థిక సహాయం ద్వారా భారత్‌ను ఛాంపియన్ల దేశంగా రూపుదిద్దాలని ప్రభుత్వం సంకల్పించింది. ఈ దిశగా మనం ఇప్పటికే శరవేగంగా పయనిస్తున్నాం” అని డాక్టర్ మాండవీయ పేర్కొన్నారు.

కామన్వెల్త్‌లో అత్యధిక జనాభాగల భారత్‌కు గర్వించదగిన క్రీడా చరిత్రతోపాటు క్రీడా విజయాల దృష్ట్యానూ బలమైన రికార్డు ఉంది. బర్మింగ్‌హామ్‌ నగరంలో నిర్వహించిన కామన్‌వెల్త్‌ క్రీడలు-2022 పతకాల పట్టికలో భారత్‌ 4వ స్థానంలో నిలవడమే ఇందుకు నిదర్శనం.

కేంద్ర యువజన వ్యవహారాలు-క్రీడల శాఖ సహాయ మంత్రి శ్రీమతి రక్షా నిఖిల్ ఖడ్సే సామాజిక మాధ్యమ వేదికలో స్పందిస్తూ- “ప్రపంచ క్రీడా రంగంలో భారత్‌ మరో పెద్ద ముందడుగు వేసింది! ఈ మేరకు కామన్వెల్త్ శతాబ్ది క్రీడలు-2030 నిర్వహణకు ప్రతిపాదిత ఆతిథ్య నగరంగా అహ్మదాబాద్‌ను కామన్వెల్త్ క్రీడా కార్యనిర్వాహక బోర్డు సిఫారసు చేసింది. ఈ పరిణామం దేశంలోని అంతర్జాతీయ స్థాయి క్రీడా మౌలిక సదుపాయాలు, ఆతిథ్యం పరంగానే కాకుండా వర్ధమాన క్రీడావరణ వ్యవస్థగా భారత్‌ను ప్రపంచ ముందు నిలుపుతోంది. ఉత్తేజ భరిత భారత్ క్రీడా హృదయానికి ప్రపంచ క్రీడా రంగాన్ని చేరువ చేసే ఈ పరిణామం మనకు గర్వకారణం!” అని పేర్కొన్నారు.

కామన్వెల్త్ క్రీడా ఉద్యమ శతాబ్ది వేడుకల సంవత్సరంలో ఆ క్రీడల నిర్వహణకు చారిత్రక అవకాశం లభించడం విశేషం. కామన్వెల్త్‌లోని 74 సభ్య దేశాలు, భూభాగాల మధ్య శతాబ్ద కాలపు క్రీడా నైపుణ్యం, సహకారం, భాగస్వామ్య విలువలను 2030 క్రీడలు ప్రతిబింబిస్తాయి.

కామన్వెల్త్ గేమ్స్ అసోసియేషన్ ఆఫ్ ఇండియా అధ్యక్షురాలు డాక్టర్ పి.టి.ఉష దీనిపై స్పందిస్తూ- “అహ్మదాబాద్‌లో కామన్వెల్త్ శతాబ్ది క్రీడల నిర్వహణ మన సుస్థిరత, సార్వజనీనత, ఆవిష్కరణాత్మక ఉజ్వల క్రీడా భవితకు సంకేతం. కామన్వెల్త్ క్రీడా ఉద్యమ బలోపేతానికి, సరిహద్దులను అధిగమించే మన క్రీడా వారసత్వ సృష్టికి ఇదొక అవకాశం” అని అభివర్ణించారు.

కామన్‌వెల్త్‌ శతాబ్ది క్రీడలు-2030 నిర్వహణకు కేంద్ర-గుజరాత్‌ రాష్ట్ర ప్రభుత్వాలతోపాటు కామన్వెల్త్ గేమ్స్ అసోసియేషన్ ఆఫ్ ఇండియా సంయుక్తంగా ప్రతిపాదన సమర్పించాయి. ఈ ప్రతిపాదన కామన్వెల్త్ క్రీడల  ‘గేమ్స్ రీసెట్’ సూత్రాలైన లభ్యత, సార్వజనీనత, స్థిరత్వం, వారసత్వాలకు అనుగుణంగా ఉండటం ప్రపంచ ప్రశంసలు అందుకుంది.

అంతర్జాతీయ క్రీడారంగ కూడలిగా రూపొందాలన్న భారత్‌ దీర్ఘకాలిక ఆశయాన్ని కామన్‌వెల్త్‌ శతాబ్ది క్రీడలు-2030 నిర్వహణ బలోపేతం చేస్తుంది. పట్టణ నవీకరణ, యువత భాగస్వామ్యం, క్రీడా రంగంలో అంతర్జాతీయ సహకార విస్తృతికి ఇదొక ఉత్ప్రేరకం కాగలదు.

 

***

(रिलीज़ आईडी: 2179955) आगंतुक पटल : 16