ਆਯੁਸ਼ ਮੰਤਰਾਲੇ ਦੇ ਅਧੀਨ ਸੈਂਟਰਲ ਕੌਂਸਲ ਫਾਰ ਰਿਸਰਚ ਇਨ ਹੋਮਿਓਪੈਥੀ (ਸੀਸੀਆਰਐੱਚ) ਦੀ ਸਿਖਰਲੀ ਸੰਸਥਾ, ਕੋਟਾਯਮ ਦੇ ਨੈਸ਼ਨਲ ਇੰਸਟੀਚਿਊਟ ਆਫ਼ ਹੋਮਿਓਪੈਥੀ ਫਾਰ ਮੈਂਟਲ ਹੈਲਥ (ਐੱਨਐੱਚਆਰਆਈਐੱਮਐੱਚ) ਨੇ ਵਿਸ਼ਵ ਮਾਨਸਿਕ ਸਿਹਤ ਦਿਵਸ 2025 ਨੂੰ ਮਨਾਉਣ ਲਈ ਦੋ-ਰੋਜ਼ਾ ਨੈਸ਼ਨਲ ਹੋਮਿਓਪੈਥੀ ਕਾਨਫਰੰਸ ਦਾ ਆਯੋਜਨ ਕੀਤਾ। ਇਹ ਕਾਨਫਰੰਸ 10 ਅਤੇ 11 ਅਕਤੂਬਰ, 2025 ਨੂੰ ਕੋਟਾਯਮ ਦੇ ਐੱਨਐੱਚਆਰਆਈਐੱਮਐੱਚ ਔਡੀਟੋਰੀਅਮ ਵਿਖੇ "ਸੇਵਾਵਾਂ ਤੱਕ ਪਹੁੰਚ: ਆਫ਼ਤਾਂ ਅਤੇ ਐਮਰਜੈਂਸੀ ਵਿੱਚ ਮਾਨਸਿਕ ਸਿਹਤ" ਵਿਸ਼ੇ ਨਾਲ ਆਯੋਜਿਤ ਕੀਤੀ ਗਈ ਸੀ।

ਇਸ ਕਾਨਫਰੰਸ ਵਿੱਚ ਦੇਸ਼ ਭਰ ਦੇ ਹੋਮਿਓਪੈਥੀ ਅਤੇ ਮਾਨਸਿਕ ਸਿਹਤ ਦੇ ਖੇਤਰ ਵਿੱਚ ਮੋਹਰੀ ਮਾਹਿਰ, ਖੋਜਕਰਤਾ ਅਤੇ ਪ੍ਰੈਕਟੀਸ਼ਨਰ ਇਕੱਠੇ ਆਏ। ਇਸ ਕਾਨਫਰੰਸ ਨੇ ਮਨੋਵਿਗਿਆਨਕ ਐਮਰਜੈਂਸੀ ਵਿੱਚ ਹੋਮਿਓਪੈਥੀ ਦੀ ਵਧਦੀ ਸਾਰਥਕਤਾ 'ਤੇ ਧਿਆਨ ਕੇਂਦ੍ਰਿਤ ਕੀਤਾ ਅਤੇ ਮਾਨਸਿਕ ਸਿਹਤ ਦੇਖਭਾਲ ਲਈ ਨਵੀਨਤਾਕਾਰੀ ਖੋਜ ਅਤੇ ਏਕੀਕ੍ਰਿਤ ਦ੍ਰਿਸ਼ਟੀਕੋਣ 'ਤੇ ਚਰਚਾ ਕੀਤੀ।

ਆਫ਼ਤ ਅਤੇ ਐਮਰਜੈਂਸੀ ਸਥਿਤੀਆਂ ਵਿੱਚ ਏਕੀਕ੍ਰਿਤ ਮਾਨਸਿਕ ਸਿਹਤ ਸੰਭਾਲ ਬਾਰੇ ਨੈਸ਼ਨਲ ਕਾਨਫਰੰਸ ਦਾ ਉਦਘਾਟਨੀ ਸੈਸ਼ਨ ਐੱਨਐੱਚਆਰਆਈਐੱਮਐੱਚ, ਕੋਟਾਯਮ ਵਿਖੇ ਆਯੋਜਿਤ ਕੀਤਾ ਗਿਆ, ਜਿਸ ਵਿੱਚ ਦੇਸ਼ ਭਰ ਦੇ ਪ੍ਰਮੁੱਖ ਪਤਵੰਤਿਆਂ ਅਤੇ ਮਾਹਿਰਾਂ ਨੇ ਹਿੱਸਾ ਲਿਆ।

ਸੀਸੀਆਰਐੱਚ, ਨਵੀਂ ਦਿੱਲੀ ਦੇ ਡਾਇਰੈਕਟਰ ਜਨਰਲ, ਡਾ. ਸੁਭਾਸ਼ ਕੌਸ਼ਿਕ ਨੇ ਭਾਗੀਦਾਰਾਂ ਨੂੰ ਵਰਚੁਅਲੀ ਸੰਬੋਧਨ ਕੀਤਾ। ਉਨ੍ਹਾਂ ਨੇ ਮਜ਼ਬੂਤ ਖੋਜ ਸਬੂਤਾਂ ਦੇ ਅਧਾਰ 'ਤੇ, ਖਾਸ ਤੌਰ ‘ਤੇ ਆਫ਼ਤ ਤੋਂ ਬਾਅਦ ਦੇ ਪੁਨਰਵਾਸ ਅਤੇ ਲਚਕੀਲੇਪਣ ਦੇ ਨਿਰਮਾਣ ਵਿੱਚ, ਮਨੋ-ਸਮਾਜਿਕ ਦੇਖਭਾਲ ਢਾਂਚੇ ਵਿੱਚ ਹੋਮਿਓਪੈਥੀ ਨੂੰ ਸ਼ਾਮਲ ਕਰਨ ਦੀ ਜ਼ਰੂਰਤ 'ਤੇ ਜ਼ੋਰ ਦਿੱਤਾ।

ਸ਼੍ਰੀ ਚੇਤਨ ਕੁਮਾਰ ਮੀਣਾ, ਆਈਏਐੱਸ, ਜ਼ਿਲ੍ਹਾ ਕਲੈਕਟਰ, ਕੋਟਾਯਮ, ਕਾਨਫਰੰਸ ਵਿੱਚ ਮਹਿਮਾਨ ਵਜੋਂ ਸ਼ਾਮਲ ਹੋਏ। ਉਨ੍ਹਾਂ ਨੇ ਏਕੀਕ੍ਰਿਤ ਮਾਨਸਿਕ ਸਿਹਤ ਦੇਖਭਾਲ ਨੂੰ ਅੱਗੇ ਵਧਾਉਣ ਵਿੱਚ ਐੱਨਐੱਚਆਰਆਈਐੱਮਐੱਚ ਦੇ ਨਿਰੰਤਰ ਯਤਨਾਂ ਦੀ ਸ਼ਲਾਘਾ ਕੀਤੀ ਅਤੇ ਮਾਨਸਿਕ ਸਿਹਤ ਸੇਵਾਵਾਂ ਤੱਕ ਵਿਆਪਕ ਪਹੁੰਚ ਨੂੰ ਯਕੀਨੀ ਬਣਾਉਣ ਲਈ ਆਫ਼ਤ ਪ੍ਰਤੀਕਿਰਿਆ ਰਣਨੀਤੀਆਂ ਵਿੱਚ ਹੋਮਿਓਪੈਥੀ ਨੂੰ ਸ਼ਾਮਲ ਕਰਨ ਦੀ ਮਹੱਤਤਾ ਨੂੰ ਉਜਾਗਰ ਕੀਤਾ।

ਡਾ. ਦੇਬਦੱਤ ਨਾਇਕ, ਸਹਾਇਕ ਨਿਰਦੇਸ਼ਕ (ਸਿਹਤ) ਅਤੇ ਅਧਿਕਾਰੀ-ਇੰਚਾਰਜ, ਐੱਨਐੱਚਆਰਆਈਐੱਮਐੱਚ, ਕੋਟਾਯਮ, ਨੇ ਸਵਾਗਤੀ ਭਾਸ਼ਣ ਦਿੱਤਾ। ਉਨ੍ਹਾਂ ਨੇ ਕਾਨਫਰੰਸ ਦੇ ਥੀਮ ਦੀ ਵਿਸ਼ਵਵਿਆਪੀ ਸਾਰਥਕਤਾ ਅਤੇ ਆਫ਼ਤ ਅਤੇ ਐਮਰਜੈਂਸੀ ਸਥਿਤੀਆਂ ਦੌਰਾਨ ਪਹੁੰਚਯੋਗ ਮਾਨਸਿਕ ਸਿਹਤ ਸੇਵਾਵਾਂ ਨੂੰ ਮਜ਼ਬੂਤ ਕਰਨ ਦੀ ਤੁਰੰਤ ਜ਼ਰੂਰਤ 'ਤੇ ਜ਼ੋਰ ਦਿੱਤਾ।

ਡਾ. ਆਰ. ਸੀਥਾਰਥਨ, ਪ੍ਰਿੰਸੀਪਲ, ਐੱਨਐੱਚਆਰਆਈਐੱਮਐੱਚ, ਕੋਟਾਯਮ ਨੇ ਰਸਮੀ ਧੰਨਵਾਦ ਮਤਾ ਪੇਸ਼ ਕੀਤਾ ਅਤੇ ਸਾਰੇ ਪਤਵੰਤਿਆਂ, ਬੁਲਾਰਿਆਂ, ਭਾਗੀਦਾਰਾਂ ਅਤੇ ਪ੍ਰਬੰਧਕ ਟੀਮ ਦੇ ਮੈਂਬਰਾਂ ਦਾ ਸਮਾਗਮ ਦੀ ਸਫਲਤਾ ਵਿੱਚ ਉਨ੍ਹਾਂ ਦੇ ਕੀਮਤੀ ਯੋਗਦਾਨ ਲਈ ਧੰਨਵਾਦ ਕੀਤਾ।

ਕਾਨਫਰੰਸ ਦੇ ਪਹਿਲੇ ਦਿਨ, ਆਫ਼ਤ ਮਾਨਸਿਕ ਸਿਹਤ: ਅਸਲ ਅਨੁਭਵ ਅਤੇ ਉੱਭਰ ਰਹੇ ਰੁਝਾਨ; ਹਾਈਡ੍ਰੋਲੋਜੀਕਲ ਆਫ਼ਤਾਂ ਵਿੱਚ ਮਨੋਵਿਗਿਆਨਕ ਸੰਕਟ: ਵਾਇਨਾਡ, ਕੇਰਲਾ ਵਿੱਚ ਭਾਈਚਾਰਾ-ਅਧਾਰਿਤ ਪ੍ਰਬੰਧਨ; ਆਫ਼ਤ ਪ੍ਰਬੰਧਨ ਵਿੱਚ ਹੋਮਿਓਪੈਥਿਕ ਪਹੁੰਚ; ਸੰਕਟ ਸਥਿਤੀਆਂ ਵਿੱਚ ਲਚਕੀਲਾਪਣ; ਹੋਮਿਓਪੈਥੀ ਵਿੱਚ ਐੱਨ-ਔਫ-1 ਟ੍ਰਾਇਲ ਅਤੇ ਅਨੁਵਾਦਕ ਨੈੱਟਵਰਕ; ਅਤੇ ਏਡੀਐੱਚਡੀ ਅਤੇ ਇਸ ਦੇ ਹੋਮਿਓਪੈਥਿਕ ਇਲਾਜ ਵਿੱਚ ਭਾਵਨਾਤਮਕ ਵਿਗਾੜ ਵਰਗੇ ਵਿਸ਼ਿਆਂ 'ਤੇ ਵਿਗਿਆਨਕ ਸੈਸ਼ਨ ਆਯੋਜਿਤ ਕੀਤੇ ਗਏ।

ਦੂਜੇ ਦਿਨ, ਸੈਸ਼ਨਾਂ ਵਿੱਚ ਮਾਨਸਿਕ ਸਿਹਤ ਖੋਜ ਵਿੱਚ ਵਿਧੀਗਤ ਢਾਂਚੇ: ਕਲੀਨਿਕਲ ਅਤੇ ਪ੍ਰਯੋਗਸ਼ਾਲਾ-ਅਧਾਰਿਤ ਮਾਨਸਿਕ ਸਿਹਤ ਮੁਲਾਂਕਣ; ਸਦਮੇ ਅਤੇ ਮਨੋਵਿਗਿਆਨਕ ਐਮਰਜੈਂਸੀ ਪ੍ਰਤੀ ਮਨੁੱਖੀ ਪ੍ਰਤੀਕਿਰਿਆ; ਅਤੇ ਪੀਟੀਐੱਸਡੀ, ਏਡੀਐੱਚਡੀ, ਔਟਿਜ਼ਮ ਸਪੈਕਟ੍ਰਮ ਵਿਕਾਰ, ਮਨੋਵਿਗਿਆਨਕ ਵਿਕਾਰ, ਅਤੇ ਪਦਾਰਥਾਂ ਦੀ ਦੁਰਵਰਤੋਂ ਰਿਕਵਰੀ ਵਿੱਚ ਕੇਸ-ਅਧਾਰਿਤ ਸੂਝ ‘ਤੇ ਚਰਚਾਵਾਂ ਸ਼ਾਮਲ ਸਨ।। ਪੇਸ਼ਕਾਰੀਆਂ ਵਿੱਚ ਵਿਅਕਤੀਗਤ ਹੋਮਿਓਪੈਥਿਕ ਇਲਾਜ ਦੁਆਰਾ ਤੀਬਰ ਮਾਨਸਿਕ ਲੱਛਣਾਂ ਦੇ ਪ੍ਰਬੰਧਨ ਲਈ ਕੇਸ ਲੜੀ ਅਤੇ ਸਬੂਤ-ਅਧਾਰਿਤ ਪਹੁੰਚ ਵੀ ਸ਼ਾਮਲ ਸਨ।

ਐੱਨਐੱਚਆਰਆਈਐੱਮਐੱਚ ਪੋਸਟ ਗ੍ਰੈਜੂਏਟ ਸਿਖਿਆਰਥੀਆਂ ਨੇ ਬਾਈਪੋਲਰ ਡਿਸਆਰਡਰ, ਇੰਟਰਨੈੱਟ ਐਡਿਕਸ਼ਨ, ਸ਼ਾਈਜ਼ੋਫਰੀਨੀਆ, ਮੇਜਰ ਡਿਪਰੈਸ਼ਨ ਡਿਸਆਰਡਰ, ਓਬੈਸਿਵ-ਕੰਪਲਸਿਵ ਡਿਸਆਰਡਰ, ਸ਼ਰਾਬ ਨਿਰਭਰਤਾ, ਭੰਗ ਦੀ ਵਰਤੋਂ ਵਿਕਾਰ, ਔਟਿਜ਼ਮ ਸਪੈਕਟ੍ਰਮ ਡਿਸਆਰਡਰ, ਅਤੇ ਪਾਰਕਿੰਸਨ'ਸ ਬਿਮਾਰੀ ਸਮੇਤ ਕਈ ਤਰ੍ਹਾਂ ਦੀਆਂ ਮਾਨਸਿਕ ਸਿਹਤ ਸਥਿਤੀਆਂ 'ਤੇ ਆਪਣੀ ਖੋਜ ਪੇਸ਼ ਕੀਤੀ।

ਹੋਰ ਪ੍ਰਮੁੱਖ ਭਾਗੀਦਾਰਾਂ ਵਿੱਚ ਡਾ. ਕੇ.ਸੀ. ਮੁਰਲੀਧਰਨ, ਸਹਾਇਕ ਨਿਰਦੇਸ਼ਕ (ਸਿਹਤ) ਅਤੇ ਪ੍ਰਸ਼ਾਸਨ-ਇੰਚਾਰਜ, ਸੀ.ਸੀ.ਆਰ.ਐੱਚ., ਨਵੀਂ ਦਿੱਲੀ ਸ਼ਾਮਲ ਸਨ, ਜਿਨ੍ਹਾਂ ਨੇ ਕਮਿਊਨਿਟੀ-ਅਧਾਰਿਤ ਮਾਨਸਿਕ ਸਿਹਤ ਦੇਖਭਾਲ ਵਿੱਚ ਹੋਮਿਓਪੈਥੀ ਦੀ ਉੱਭਰ ਰਹੀ ਭੂਮਿਕਾ ਅਤੇ ਅੰਤਰ-ਅਨੁਸ਼ਾਸਨੀ ਸਹਿਯੋਗ ਦੀ ਜ਼ਰੂਰਤ 'ਤੇ ਇੱਕ ਵਿਸ਼ੇਸ਼ ਭਾਸ਼ਣ ਦਿੱਤਾ। ਮਹਾਤਮਾ ਗਾਂਧੀ ਯੂਨੀਵਰਸਿਟੀ, ਕੋਟਾਯਮ ਦੇ ਮਾਨਯੋਗ ਵਾਈਸ-ਚਾਂਸਲਰ ਡਾ. ਸੀ.ਟੀ. ਅਰਵਿੰਦ ਕੁਮਾਰ ਨੇ ਕਾਨਫਰੰਸ ਦਾ ਉਦਘਾਟਨ ਕੀਤਾ ਅਤੇ ਖਾਸ ਤੌਰ ‘ਤੇ ਸੰਕਟਾਂ ਅਤੇ ਐਮਰਜੈਂਸੀ ਸਥਿਤੀਆਂ ਦੌਰਾਨ ਸੰਪੂਰਨ ਅਤੇ ਵਿਅਕਤੀ-ਕੇਂਦ੍ਰਿਤ ਮਾਨਸਿਕ ਸਿਹਤ ਸਹਾਇਤਾ ਪ੍ਰਣਾਲੀਆਂ ਨੂੰ ਮਜ਼ਬੂਤ ਕਰਨ ਦੀ ਜ਼ਰੂਰਤ 'ਤੇ ਜ਼ੋਰ ਦਿੱਤਾ।

ਦੋ-ਰੋਜ਼ਾ ਸਮਾਗਮ ਇੱਕ ਸਮਾਪਤੀ ਸੈਸ਼ਨ ਦੇ ਨਾਲ ਸਮਾਪਤ ਹੋਇਆ, ਜਿਸ ਨੇ ਕਾਨਫਰੰਸ ਦੇ ਸਫਲ ਸਮਾਪਨ ਨੂੰ ਦਰਸਾਇਆ। ਭਾਗੀਦਾਰਾਂ ਨੇ ਅਕਾਦਮਿਕ ਸੰਵਾਦ ਵਿੱਚ ਸ਼ਾਮਲ ਹੋਣ ਅਤੇ ਐਮਰਜੈਂਸੀ ਮਾਨਸਿਕ ਸਿਹਤ ਦੇਖਭਾਲ ਵਿੱਚ ਹੋਮਿਓਪੈਥੀ ਦੀ ਸੰਭਾਵਨਾ ਦੀ ਪੜਚੋਲ ਕਰਨ ਦੇ ਮੌਕੇ ਲਈ ਆਪਣਾ ਧੰਨਵਾਦ ਪ੍ਰਗਟ ਕੀਤਾ।

ਕਾਨਫਰੰਸ ਨੇ ਸਬੂਤ-ਅਧਾਰਿਤ, ਏਕੀਕ੍ਰਿਤ ਅਤੇ ਪਹੁੰਚਯੋਗ ਮਾਨਸਿਕ ਸਿਹਤ ਸੇਵਾਵਾਂ ਦੀ ਜ਼ਰੂਰਤ ਨੂੰ ਦੁਹਰਾਇਆ ਅਤੇ ਮਨੋ-ਸਮਾਜਿਕ ਅਤੇ ਆਫ਼ਤ ਮਾਨਸਿਕ ਸਿਹਤ ਢਾਂਚੇ ਵਿੱਚ ਇੱਕ ਪੂਰਕ ਹਿੱਸੇ ਵਜੋਂ ਹੋਮਿਓਪੈਥੀ ਦੀ ਮਹੱਤਵਪੂਰਨ ਭੂਮਿਕਾ ਨੂੰ ਉਜਾਗਰ ਕੀਤਾ।

************

ਐੱਸਆਰ/ਜੀਐੱਸ/ਐੱਸਜੀ