شماریات اور پروگراموں کے نفاذ کی وزارت کے ماتحت قومی شماریات دفتر (این ایس او) 1950 میں اپنے آغاز سے لے کر باقاعدہ طور پر متنوع سماجی اور اقتصادی موضوعات  پر وسیع پیمانے پر گھرانوں کے سروے کا اہتمام کر رہا ہے۔ گذشتہ برسوں میں، قومی نمونہ سروے (این ایس ایس) شواہد پر مبنی پالیسی سازی کے لیے سرکاری اعداد و شمار کے ایک اہم وسیلے کے طور پر ابھرا ہے، جس نے گھرانوں کی فلاح و بہبود، کھپت، روزگار بہم رسانی، صحت، اثاثہ جات، قرض داری اور سماجی اقتصادی ترقی سے متعلق مختلف پہلوؤں پر احاطہ کیا ہے۔

آنے والے سروے میں، ایک نئی اہم پہل قدمی قومی گھرانہ آمدنی سروے (این ایچ آئی ایس) ہے، جو فروری 2026 میں شروع کیا جائے گا۔ یہ گھریلو آمدنی کی پیمائش پر توجہ مرکوز کرنے والا پہلا کل ہند سروے ہوگا، جو ہندوستان کے سماجی و معاشی نظام میں طویل عرصے سے ڈیٹا کے خلا کو پر کرنے کی جانب ایک اہم قدم کی نمائندگی کرتا ہے۔

قومی گھرانہ آمدنی سروے (این ایچ آئی ایس)، 2026

قومی گھرانہ آمدنی سروے (این ایچ آئی ایس) لوگوں کے حالات زندگی اور آمدنی/خرچ کے نمونوں کے بارے میں معلومات فراہم کرتا ہے۔ این ایچ آئی ایس کے ڈیٹا کا استعمال کنزیومر پرائس انڈیکس کی بحالی، قومی کھاتوں کی تیاری اور دنیا بھر کے ممالک میں کمیونٹیز میں غربت اور مشکلات کا تجزیہ کرنے کے لیے کیا جاتا ہے۔

متعدد ممالک، بشمول کناڈا، ریاستہائے متحدہ امریکہ اور برطانیہ جیسے ترقی یافتہ ممالک اور سری لنکا، بنگلہ دیش، چین اور ملیشیا جیسے کم ترقی یافتہ ممالک میں، گھریلو سروے کے ذریعے گھریلو آمدنی کا ڈیٹا اکٹھا کیا جاتا ہے۔ گھرانوں کی آمدنی (یا گھرانہ شعبے سے حاصل ہونے والی آمدنی) کے تخمینے بھی قومی اکاؤنٹس کے اعدادوشمار (این اے ایس) سے اخذ کیے جا سکتے ہیں۔ این اے ایس پر مبنی تخمینوں کے مقابلے میں آمدنی پر گھریلو سروے کے اعداد و شمار کی خوبی یہ ہے کہ گھریلو سروے کے اعداد و شمار آمدنی کے باہمی موازنہ اور ذرائع اور آمدنی پیدا کرنے کے نمونوں کے تجزیہ کی اجازت دیتے ہیں۔ یہ سروے پورے ملک کا احاطہ کرے گا اور مجموعی گھریلو آمدنی کا تخمینہ لگانے کی کوشش کرے گا۔

ہندوستان میں سروے کے انعقاد میں ضروری رہنما خطوط فراہم کرنے کے مقصد سے، شماریات اور پروگرام کے نفاذ کی وزارت (ایم او ایس پی آئی) نے بین الاقوامی مالیاتی فنڈ کے ہندوستان کے سابق ایگزیکٹو ڈائریکٹر ڈاکٹر سرجیت ایس بھلا کی صدارت میں ایک تکنیکی ماہر گروپ (ٹی ای جی) تشکیل دیا ہے۔ ٹی ای جی کی طرف سے کی گئی سفارش کے مطابق، این ایچ آئی ایس 2026 کے ڈرافٹ شیڈول کی ایک پری ٹیسٹنگ مشق 4-8 اگست 2025 کے دوران کی گئی تاکہ سوالنامے کی وضاحت، فہم، تشریح، اور قابل قبولیت کا جائزہ لیا جا سکے۔ یہ مشق این ایس او، ایم او ایس پی آئی کے فیلڈ آپریشنز ڈویژن (ایف او ڈی) کے 15 علاقائی دفاتر (آر اوز) میں کی گئی جس میں ممبئی، دہلی، کولکتہ، چنئی، بنگلور اور حیدرآباد سمیت تمام چھ زون شامل ہیں۔ ہر منتخب علاقائی دفتر میں، دو شہری اور دو دیہی علاقوں کا انتخاب کیا گیا، جس میں متمول اور غیر متمول دونوں طبقے شامل تھے۔

ڈیٹا اکٹھا کرنے کے آلات کی پہلے سے جانچ بڑے پیمانے پر سماجی و اقتصادی سروے میں ایک معیاری عمل ہے تاکہ حتمی فیلڈ کی تعیناتی سے پہلے وضاحت، بہاؤ، ساخت، اور جواب دہندگان کے بوجھ سے متعلق مسائل کی نشاندہی کی جا سکے۔ اس مشق نے این ایس او کو این ایچ آئی ایس سوالنامے کو بہتر بنانے اور اس بات کو یقینی بنانے میں مدد کی کہ حتمی آلہ مضبوط، قابل اعتماد، اور صارف دوست ہے۔

پری ٹیسٹنگ کی تکمیل کے بعد، ایک رپورٹ تیار کی گئی ہے جس میں سروے کی پری ٹیسٹنگ مشق کے دوران جمع کیے گئے تجربے کا احاطہ کیا گیا ہے اور اسے وزارت کی ویب سائٹ (www.mospi.gov.in ) پر حوالہ کے لیے اپ لوڈ کر دیا گیا ہے۔

قومی گھرانہ آمدنی سروے (این ایچ آئی ایس) 2026 کا مسودہ سوالنامہ/شیڈول تیار کیا گیا ہے جس میں پری ٹیسٹنگ مشق کی سفارشات کو شامل کیا گیا ہے اور وسیع تر مشاورت اور آراء کے لیے وزارت کی ویب سائٹ (www.mospi.gov.in ) پر اپ لوڈ کیا گیا ہے۔ محققین، پالیسی سازوں، اداروں، اور عام لوگوں کو ڈرافٹ شیڈول پر اپنی تجاویز اور تبصرے فراہم کرنے کے لیے مدعو کیا جاتا ہے۔

قومی گھرانہ آمدنی سروے (این ایچ آئی ایس)، 2026 کی ماقبل جانچ رپورٹ اور ڈرافٹ شیڈیول مندرجہ ذیل لنک پر براہِ راست ملاحظہ کیا جاسکتا ہے: https://www.mospi.gov.in/sites/default/files/announcements/Pre-Testing_Report_ScheduleNHIS-2026.pdf

تجاویز میں موجودہ سوالات میں ترمیم یا نئی اشیاء کے لیے تجاویز شامل ہو سکتی ہیں، خاص طور پر گھریلو آمدنی کے مختلف ذرائع، اجرت اور تنخواہ، خود روزگار کی آمدنی، جائیداد کی آمدنی، ترسیلات زر، یا گھریلو آمدنی کے کسی دوسرے متعلقہ جز پر۔ یہ سجھاؤ آئندہ قومی گھریلو آمدنی سروے (این ایچ آئی ایس) 2026 کے معیار، کوریج اور پالیسی کی مطابقت کو بڑھانے میں مدد کریں گے۔ تجاویز اور تبصرے ای میل آئی ڈیز: nssocpd.coord@mospi.gov.in اور tc.sdrd-mospi[at]gov[dot] پر 30 اکتوبر 2025 تک  ارسال کیے جا سکتے ہیں۔

**********

 (ش ح –ا ب ن- ع ر )

U.No:9800

(Release ID: 2178658) Visitor Counter : 4