زراعت، کسانوں کی بہبود اور دیہی ترقی کے مرکزی وزیر جناب شیوراج سنگھ چوہان نے آج مدھیہ پردیش میں اپنے پارلیمانی حلقہ ودیشا کا دورہ کیا، جہاں انہوں نے بلقیس گنج میں زرعی پیداوار منڈی (کرشی اپج منڈی) میں ایک پروگرام میں شرکت کی۔ تقریب کے دوران، انہوں نے کسانوں اور خواتین مستفیدین سے خطاب کیا، مختلف سرکاری اسکیموں کے تحت وظائف تقسیم کیے، اور مختلف تنظیموں کی جانب سے منعقدہ نمائشوں اور ہیلتھ کیمپ کا معائنہ کیا۔

تقریب سے خطاب کرتے ہوئے جناب چوہان نے کہا، "ہر کوئی اپنے لیے جیتا ہے، لیکن حقیقی زندگی لوگوں، سماج اور قوم کی خدمت میں گزاری جاتی ہے۔ میں آپ کو یقین دلاتا ہوں کہ ہم اپنے لوگوں کی خدمت میں کوئی کسر نہیں چھوڑیں گے۔" انہوں نے ہیلتھ کیمپ میں شرکت کرنے والی خواتین پر زور دیا کہ وہ مکمل طبی معائنہ کروائیں اور انہیں یقین دلایا کہ اگر انہیں کسی بیماری کا پتہ چلا تو ان کا مفت علاج کیا جائے گا۔

مرکزی وزیر نے کہا، اپنی بہنوں اور بیٹیوں کی خدمت کرنا دیویوں کی پوجا کرنے کے مترادف ہے"، جیسا کہ انہوں نے 'لاڈلی بہنا یوجنا' کو خواتین کی زندگیوں کو بہتر بنانے کے لیے ایک تبدیلی کی پہل قرار دیا۔ انہوں نے ‘لکھپتی دیدی ابھیان’ پر بھی روشنی ڈالی، جو دیہی خواتین کی آمدنی بڑھانے پر توجہ مرکوز کرتا ہے۔ "وزیراعظم نے مجھے دیہی ترقی کی ذمہ داری بھی سونپی ہے۔ ہمارا مقصد اس بات کو یقینی بنانا ہے کہ ہر بہن سیلف ہیلپ گروپوں کے ذریعے کم از کم ₹ 1 لاکھ سالانہ کمائے۔ تب ہی ان کی زندگی میں حقیقی تبدیلی آئے گی۔ جناب چوہان نے کہا۔ انہوں نے اس بات کا اعادہ کیا کہ مرکزی حکومت خواتین کو معاشی طور پر بااختیار بنانے کے لیے پوری طرح پرعزم ہے اور اس مقصد کو حاصل کرنے کے لیے کلیدی آلات کے طور پر سیلف ہیلپ گروپس کو مضبوط کرے گی۔

جناب چوہان نے بتایا کہ پردھان منتری آواس یوجنا – گرامین کے تحت مدھیہ پردیش کو اب تک 19 لاکھ مکانات مل چکے ہیں۔ انہوں نے کہا کہ جن لوگوں کے نام پہلے فہرست میں شامل نہیں تھے اب ان کا سروے کیا جا رہا ہے اور انہیں شامل کیا جائے گا۔ اب کوئی غریب کچے کے گھر میں نہیں رہے گا۔ اس بات پر زور دیتے ہوئے کہ دور دراز علاقوں تک بھی بجلی پہنچے گی، انہوں نے کہا، "بجلی فراہم کی جائے گی چاہے ایک جگہ پر صرف پانچ گھر ہی ہوں۔ ہماری حکومت کا مقصد ہر غریب خاندان کو پکے گھر، بجلی اور باوقار زندگی کو یقینی بنانا ہے۔" فصل کے نقصان پر جناب چوہان نے کہا، "کچھ کسانوں نے زیادہ بارش کی وجہ سے سویا بین کی فصلوں کو بھاری نقصان کی اطلاع دی ہے۔ حکومت ایک مکمل سروے کرے گی، اور فصل بیمہ اسکیم کے تحت معاوضہ فراہم کیا جائے گا۔ مرکز اور ریاست دونوں کسانوں کے چیلنجوں سے نمٹنے کے لیے تال میل سے کام کر رہے ہیں۔ کسانوں کو کسی قسم کا نقصان نہیں ہونے دیا جائے گا، اور ہر بار اس اسکیم کے تحت مستحق کسانوں کو فائدہ ملے گا۔

مرکزی وزیر نے سیہور ضلع کو مکمل طور پر تپ دق (ٹی بی) سے پاک بنانے کے اپنے عزم کا اعادہ کیا۔ انہوں نے کہا کہ ڈاکٹروں کی ٹیمیں سروے کر رہی ہیں۔ ٹی بی کے تمام مریضوں کو مکمل صحت یابی کو یقینی بنانے کے لیے مفت ادویات اور غذائیت کی امداد فراہم کی جائے گی۔ انہوں نے بتایا کہ اب تک 500 مریضوں کی اسکریننگ کی گئی ہے جن میں 90 حاملہ خواتین بھی شامل ہیں اور ان کے علاج معالجے کے تمام انتظامات کئے جا رہے ہیں۔ عوامی تعاون کی اپیل کرتے ہوئے جناب چوہان نے کہا، "ٹی بی کو ختم کرنے کی یہ مہم اجتماعی کوششوں سے ہی کامیاب ہوگی، اور ہم مل کر ضلع سیہور کو ٹی بی سے پاک بنائیں گے۔"

ش ح ۔ ال

UR-7159