ملٹری نرسنگ سروس (ایم این ایس) نے یکم اکتوبر 2025 کو نئی دہلی میں ایک تاریخی یادگاری تقریب کے ساتھ اپنا صد سالہ جشن منایا۔ اس تقریب میں دفاع کے وزیر مملکت جناب سنجے سیٹھ مہمان خصوصی تھے۔ افتتاحی سیشن کی ایک خاص بات فوجی نرسنگ سروس کے لیے ایک یادگاری ڈاک ٹکٹ اور پہلے دن کے کور کا اجراء تھا۔ یہ ڈاک ٹکٹ ایم این ایس افسران کے صدی پر محیط سفر کی قومی شناخت کے طور پر نمایاں ہے، جو ان کی ہمدردی، پیشہ ورانہ مہارت اور قابل فخر میراث کی علامت ہے۔ اس کے علاوہ ایم این ایس افسران کی کامیابیوں اور تجربات کو بیان کرنے والی صد سالہ ڈائری کی بھی رونمائی کی گئی۔

دفاع کے وزیر مملکت نے ملٹری نرسنگ سروس پر ایک دستاویزی فلم بھی جاری کی، جس میں آغاز سے لے کر اس کے موجودہ قد تک اس کے شاندار سفر کا پتہ لگایا گیا ہے۔ اس فلم میں جنگوں، انسانی امداد، امن مشنز اور قوم کی تعمیر میں خدمات کی نمائش کی گئی۔

اپنے خطاب میں، دفاع کے وزیر مملکت جناب سنجے سیٹھ نے ایم این ایس کی نسل در نسل اس کی شاندار خدمات کی ستائش کی، امن اور تنازعات میں اس کے کردار کو یکساں تسلیم کرتے ہوئے پیشہ ورانہ مہارت، ہمدردی اور قوم کی تعمیر کے لیے اس کی غیر متزلزل وابستگی کی تعریف کی۔ ووہان سے انخلاء کے مشنوں میں ان کی موجودگی، آپریشن نمستے اور آپریشن سمندر سیتو جیسے اقدامات میں ان کا کردار، اور ہندوستان بھر میں پی ایم کیئرز ہسپتالوں کا ان کا انتظام - یہ سب اجتماعی طور پر یہ ظاہر کرتے ہیں کہ وہ صرف نرسنگ آفیسر نہیں ہیں، بلکہ قوم کی خدمت میں صف اول کے سورما ہیں۔

انہوں نے ان بہادر خواتین کو خصوصی طور پر خراج عقیدت پیش کیا جنہوں نے آپریشن سندور کے دوران ملک کے لیے ایک نیا بینچ مارک طے کیا- ونگ کمانڈر ویومیکا سنگھ اور کرنل صوفیہ قریشی۔ جذبہ، صبر اور پرواز کی شجاعت نے ’ناری شکتی‘ (خواتین کی قوت) کی نمائندگی  کی۔ انہوں نے کہا کہ بھارت تیزی کے ساتھ ایک ترقی یافتہ ملک بننے کی جانب گامزن ہے، اور اس سفر میں خواتین ہر میدان میں قائدانہ کردار ادا کر رہی ہیں۔

دن کی کارروائی کا آغاز مسلح افواج کی بہادری اور قربانیوں کو خراج تحسین پیش کرتے ہوئے میجر جنرل لیسما پی وی، اے ڈی جی ایم این ایس کے ذریعہ قومی جنگی یادگار پر پھولوں کی چادر چڑھانے کی تقریب سے ہوا۔ بعد ازاں مانیک شا سنٹر میں صد سالہ یادگاری تقریب منعقد ہوئی۔ ڈائریکٹر جنرل آرمڈ فورسز میڈیکل سروسز (ڈی جی اے ایف ایم ایس)، آرمی، نیوی اور ایئر فورس کے ڈائریکٹر جنرلز میڈیکل سروسز سمیت سینئر حکومتی اور مسلح افواج کے افسران بھی موجود تھے۔ اس موقع پر ملک بھر سے ایم این ایس کے سابق فوجیوں اور موجودہ سروس افسران کی شرکت ملاحظہ کی گئی۔

*********

 (ش ح –ا ب ن)

U.No:6923

(Release ID: 2173849) Visitor Counter : 3