1. ഭരണഘടനയുടെ 324-ാം അനുച്ഛേദവും 1951-ലെ ജനപ്രാതിനിധ്യനിയമത്തിലെ 20 B വകുപ്പും ന​ൽകുന്ന അധികാരങ്ങൾപ്രകാരം നിയോജകമണ്ഡലത്തിലെ തെരഞ്ഞെടുപ്പുനടപടികൾ നിരീക്ഷിക്കാൻ ഇന്ത്യയുടെ തെരഞ്ഞെടുപ്പു കമ്മീഷൻ കേന്ദ്രനിരീക്ഷകരെ നിയോഗിക്കും.

2. നിയമനംമുതൽ തെരഞ്ഞെടുപ്പുപ്രക്രിയ പൂർത്തിയാകുന്നതുവരെയുള്ള കാലയളവിൽ കമ്മീഷന്റെ മേൽനോട്ടത്തിലും നിയന്ത്രണത്തിലും അച്ചടക്കത്തിലുമാണു നിരീക്ഷക​രുടെ പ്രവർത്തനം.

3. നമ്മുടെ ജനാധിപത്യവ്യവസ്ഥയുടെ അടിത്തറയായ തെരഞ്ഞെടുപ്പുകളുടെ നീതിയുക്തവും നിഷ്പക്ഷവും വിശ്വാസപൂർണവുമായ നടത്തിപ്പ് ഉറപ്പാക്കുക എന്ന നിർണായകവും ഗൗരവമേറിയതുമായ ഉത്തരവാദിത്വമാണു നിരീക്ഷകർക്കുള്ളത്. ഈ ഉദ്യോഗസ്ഥർ കമ്മീഷന്റെ കണ്ണും കാതുമായി പ്രവർത്തിക്കുകയും, കൃത്യമായ ഇടവേളകളിലും ആവശ്യമുള്ളപ്പോഴും കമ്മീഷനു റിപ്പോർട്ടുകൾ നൽകുകയും ചെയ്യും.

4. സ്വതന്ത്രവും നീതിയുക്തവും സുതാര്യവും ഏവരെയും ഉൾക്കൊള്ളുന്നതുമായ തെരഞ്ഞെടുപ്പുകൾ നടത്തുക എന്ന ഭരണഘടനാപരമായ കടമ നിറവേറ്റാൻ നിരീക്ഷകർ കമ്മീഷനെ സഹായിക്കും. മാത്രമല്ല, വോട്ടർമാരുടെ അവബോധം വർധിപ്പിക്കുന്നതിനും തെരഞ്ഞെടുപ്പുകളിലെ പങ്കാളിത്തം ഉറപ്പാക്കുന്നതിനും അവർ സംഭാവനയേകും.

5. മെച്ചപ്പെടുത്തലുകൾ വരുത്തേണ്ട മേഖലകൾ തിരിച്ചറിയുന്നതും, നിർദിഷ്ട-പ്രായോഗിക ശുപാർശകൾ രൂപപ്പെടുത്തുന്നതുമാണു നിരീക്ഷകരുടെ പ്രധാന ലക്ഷ്യം.

6. ഭരണപരമായ സേവനങ്ങളിലെ ഉയർന്നസ്ഥാനവും ദീർഘകാല പരിചയവും കണക്കിലെടുത്ത്, സ്വതന്ത്രവും നീതിയുക്തവുമായ വോട്ടെടുപ്പുകൾ നടത്താൻ പൊതു-പൊലീസ് നിരീക്ഷകർ കമ്മീഷനെ സഹായിക്കും. താഴേത്തട്ടിൽ തെരഞ്ഞെടുപ്പുപ്രക്രിയയുടെ കാര്യക്ഷമവും ഫലപ്രദവുമായ നടത്തിപ്പിനും അവർ മേൽനോട്ടം വഹിക്കും.

7. സ്ഥാനാർഥികളുടെ തെരഞ്ഞെടുപ്പുചെലവുകൾ നിരീക്ഷിക്കാനാണു ചെലവുനിരീക്ഷകരെ നിയമിക്കുന്നത്.

8. ബിഹാറിലെ നിയമസഭാ പൊതുതെരഞ്ഞെടുപ്പിനും ജമ്മു കശ്മീർ (നിയമസഭാമണ്ഡലങ്ങൾ (AC) - ബഡ്ഗാം, നഗ്രോട്ട), രാജസ്ഥാൻ (AC - അന്ത), ഝാർഖണ്ഡ് (AC - ഘാട്‌ശില), തെലങ്കാന (AC - ജൂബിലി ഹിൽസ്), പഞ്ചാബ് (AC - തരൻ താരൻ), മിസോറം (AC - ഡമ്പ), ഒഡിഷ (AC - നുവാപഡ) എന്നിവിടങ്ങളിലെ വരാനിരിക്കുന്ന ഉപതെരഞ്ഞെടുപ്പുകൾക്കുമായി വിവിധ സംസ്ഥാനങ്ങളിൽ സേവനമനുഷ്ഠിക്കുന്ന 470 ഉദ്യോഗസ്ഥരെ (320 IAS, 60 IPS, 90 IRS/IRAS/ICAS) കേന്ദ്രനിരീക്ഷകരായി (പൊതു-പൊലീസ്- ചെലവ് വിഭാഗങ്ങളിൽ) വിന്യസിക്കാൻ ഇന്ത്യയുടെ തെരഞ്ഞെടുപ്പു കമ്മീഷൻ തീരുമാനിച്ചു.

-AT-