کوچین شپ یارڈ لمیٹڈ (سی ایس ایل) آتم نربھر بھارت کی طرف بڑھ رہا ہے اور اس نے جہاز سازی میں طویل مدتی اسٹریٹجک تعاون کے لیے ایچ ڈی کوریا شپ بلڈنگ اینڈ آف شور انجینئرنگ (ایچ ڈی کے ایس او ای) کے ساتھ مفاہمت نامے پر دستخط کیے ہیں ۔  اس مفاہمت نامے کا تبادلہ تاریخی تقریب ’’سمدر اسے سمردھی-بھارت کے سمندری شعبے میں تبدیلی‘‘کے دوران ہوا ، جس کا افتتاح 20 ستمبر 2025 کو گجرات کے بھاو نگر میں وزیر اعظم جناب نریندر مودی نے کیا ۔

دونوں مفاہمت ناموں پر دستخط کی تقریب میں بندرگاہ، جہاز رانی اور آبی گزرگاہوں کے مرکزی وزیر جناب سربانند سونووال اور مرکزی وزیر مملکت جناب شانتنو ٹھاکر بھی موجود تھے۔ اس کے علاوہ، ہنڈائی کے گلوبل بزنس مینجمنٹ ڈویژن کے سربراہ اور سینئر نائب صدر جناب جنگ چانگن، اور کوچین شپ یارڈ لمیٹڈ کے چیئرمین اینڈ مینیجنگ ڈائریکٹر جناب مدھو ایس نائر بھی اس موقع پر موجود تھے۔

یہ شراکت داری سی ایس ایل  کی وراثت، بنیادی ڈھانچے اور ملکی مہارت کو ایچ ڈی کے ایس او ای  کی جدید ٹیکنالوجی اور عالمی تجربے کے ساتھ یکجا کرنے کی کوشش ہے، جو بھارت کی جہاز سازی کی صلاحیتوں کو مضبوط بنانے کی جانب ایک اہم قدم ہے۔ مفاہمت نامے کے تحت، سی ایس ایل  کے 310 میٹر لمبے نئے ڈرائی ڈاک، جس کا افتتاح معزز وزیر اعظم ہند نے 17 جنوری 2024 کو کیا تھا،  جس کا استعمال سویز میکس ٹینکروں، کنٹینر جہازوں، اور سالانہ چھ بڑے جہازوں کی گنجائش والے کیپسائز بلک کیریئرز کی تعمیر کے لیے کیا جائے گا۔

اس کے لیے ، کوچی میں تقریبا 80 ایکڑ میں ایک بلاک فیبری کیشن فیسلٹی (بی ایف ایف) کا منصوبہ بنایا گیا ہے ، جس کی سالانہ صلاحیت 1,20,000 میٹرک ٹن ہے ، جس میں تقریبا 3,700 کروڑ روپے کی سرمایہ کاری شامل ہے ۔  تقریب میں مجوزہ سہولت اور ترتیب کی تفصیلات پیش کی گئیں ۔  توقع ہے کہ اس پہل سے لاجسٹکس ، ایم ایس ایم ای ، سپلائی چین اور ذیلی صنعتوں جیسے شعبوں میں تقریبا 2,000 براہ راست روزگار پیدا ہوں گے اور بالواسطہ روزگار کا تخمینہ 2 سے 5 گنا زیادہ ہوگا ۔

یہ تعاون منتقلی کے مرحلے کے دوران سی ایس ایل کی موجودہ سہولیات پر جہاز سازی کے منصوبوں کے مشترکہ نفاذ پر توجہ مرکوز کرے گا، جبکہ ساتھ ہی نئے کاروباری شعبوں، گرین فیلڈ شپ یارڈز، اور ہنر کی ترقی کے مواقع بھی تلاش کرے گا۔ پیداواری صلاحیت میں اضافہ اور جدید نسل کے جہازوں کی فراہمی کے ذریعے، یہ شراکت داری قومی منصوبوں کے ساتھ ہم آہنگ ہے، جو بھارت کو عالمی جہاز سازی کے مرکز کے طور پر قائم کرنے کے مشن کو مضبوط کرتی ہے۔

مزید برآں، سی ایس ایل نے حکومت ہند کے جہاز سازی کے کلسٹرز کی ترقی کے وژن کے تحت، حکومت تمل ناڑو کی نوڈل ایجنسی گائیڈنس کے ساتھ ایک اور مفاہمت نامے پر دستخط کیے۔ دستخط کی تقریب میں سی ایس ایل کے چیئرمین اینڈ مینیجنگ ڈائریکٹر جناب مدھو ایس نائر، گائیڈنس تمل ناڑو کے منیجنگ ڈائریکٹر اینڈ سی ای او ڈاکٹر ڈاریز احمد بھی موجود تھے۔ اپنی طویل المدتی ترقی کی حکمت عملی کے حصے کے طور پر، سی ایس ایل کوریائی شراکت دار کے تعاون سے تمل ناڑو میں تقریباً 15,000 کروڑ روپے کی گرین فیلڈ سرمایہ کاری سے ایک جدید ترین شپ یارڈ قائم کرنے پر غور کر رہا ہے۔ اس منصوبے کے پہلے مرحلے میں تقریباً 10,000 ملازمتیں پیدا ہونے کی توقع ہے جن میں 4,000 براہ راست اور 6,000 بالواسطہ روزگار کے مواقع شامل ہیں، اور اس میں جہاز کی مرمت کی جدید سہولت بھی شامل ہو سکتی ہے۔

******

ش ح۔ش آ۔ ا ک م

U No. 6458

(Release ID: 2170141)