भारत हा आपली शाश्वतता बांधिलकी निभावण्यात सर्वोत्तम कामगिरी करणाऱ्या जी 20 देशांपैकी एक आहे. केंद्रीय वाणिज्य आणि उद्योग मंत्री पियुष गोयल यांनी आज नवी दिल्ली येथे सीआयआय च्या 20 व्या जागतिक शाश्वतता शिखर परिषदेत याबाबत अवगत केले.

पर्यावरणाच्या रक्षणासाठी भारताने बजावलेल्या भूमिकेवर भाष्य करताना गोयल यांनी नमूद केले की पंतप्रधान नरेंद्र मोदी यांनी COP 21 यशस्वी करण्यात निर्णायक भूमिका बजावली आहे. भारताची त्याच्या शाश्वतता उद्दिष्टांसाठी बांधिलकी दृढ आहे, 2014 पासून अक्षय ऊर्जेचे उद्दिष्ट पाचपटीने वाढविणे आणि "वन नेशन, वन ग्रीड" या तत्त्वाखाली राष्ट्रीय परस्पर संलग्न ग्रीड यशस्वीरित्या तयार करणे यासाठी भारत कटिबद्ध आहे, यावर गोयल यांनी भर दिला.

जागतिक विकासात भारताचे 18% योगदान असल्याने, लवकरच भारत जगातील तिसरी सर्वात मोठी अर्थव्यवस्था बनणार आहे आणि क्रयशक्ती समतेच्या बाबतीत आधीच 15 ट्रिलियन डॉलर्सची अर्थव्यवस्था आहे, देश जगाशी दृढपणे जोडला गेला आहे यावर गोयल यांनी भर दिला. ते म्हणाले की भारताचे भविष्य हे शाश्वतता, उच्च गुणवत्ता, खर्चाची स्पर्धात्मकता आणि सामाजिक उतरंडीत तळाशी असलेल्या शेवटच्या व्यक्तीपर्यंत पोहोचणाऱ्या समावेशक वाढीवर अवलंबून आहे.

विकसित राष्ट्रांनी पॅरिसमधील आश्वासनांची पूर्तता केली नाही अशी टीका गोयल यांनी केली. "विकसित जगाने आपल्याला खूप निराश केले आहे. विकसनशील देशांच्या किंवा अल्पविकसित देशांच्या प्रयत्नांना पाठबळ देण्यासाठी अब्जावधी डॉलर्सचे सवलतीचे अर्थसहाय्य किंवा अनुदान मिळावे, यासाठी पॅरिसमध्ये मोठमोठी आश्वासने दिली जात असली तरी वर्षाला किमान 100 अब्ज डॉलर्सचे आश्वासन दिले जाते. पण अजूनही यापैकी एकही आश्वासन पूर्ण होताना दिसत नाही," असे ते म्हणाले.

केवळ शाश्वत मार्ग, ऊर्जा कार्यक्षमता आणि जबाबदार वापरानेच भारताची स्पर्धात्मकता सुधारेल असे सांगत, शाश्वततेबाबत सामूहिक कृती करण्याचे आवाहन गोयल यांनी केले. तरुण भारताच्या आकांक्षा आणि 1.4 अब्ज लोकांच्या वचनबद्धतेसह, "भारताचे भविष्य सुरक्षित, सुरक्षित आणि लवचिक आहे, जे शाश्वतता, गुणवत्ता आणि समावेशकतेवर अवलंबून आहे" याकडे त्यांनी लक्ष वेधले.

मंत्री म्हणाले की भारत जगभरात व्यापार संबंध वाढवत आहे, मॉरिशस, ऑस्ट्रेलिया (पहिला टप्पा), ईएफटीए ब्लॉक, यूके आणि यूएई यांच्याशी आधीच एफटीए करार झाले आहेत, तर युरोपियन युनियन, चिली, पेरू, न्यूझीलंड, ऑस्ट्रेलिया (दुसरा टप्पा) आणि ओमान यांच्याशी चर्चा सुरू आहे. भारत द्विपक्षीय व्यापार करारासाठी अमेरिकेशी चर्चा करत आहे, असेही त्यांनी सांगितले.

भाषणाचा समारोप करताना भारताचे भवितव्य लवचिकता, शाश्वतता आणि सामूहिक बांधिलकीवर अवलंबून असल्याची ग्वाही गोयल यांनी दिली. ते म्हणाले की या सामूहिक बांधिलकी आणि मानसिकतेमुळे, जगातील सर्वात तरुण देशांपैकी एक असलेल्या तरुण भारताच्या आकांक्षा पूर्ण करून, 1.4 अब्ज लोकांच्या प्रयत्नाने, मला पूर्ण विश्वास आहे की भारताचे भविष्य उच्च गुणवत्ता, किफायतशीर स्पर्धात्मकतेच्या स्तंभावर आधारित सुरक्षित आणि शाश्वत आहे, जेणेकरून संपूर्ण जगाशी आत्मविश्वासाने व्यवहार करता येईल. पिरॅमिडच्या तळाशी शेवटच्या माणसापर्यंत पोहोचणारा सर्वसमावेशक विकास हेच आपले एकमेव आणि अंतिम ध्येय किंवा शिखर असेल जे आपल्याला गाठावे लागेल, याची खात्री करू शकतो.

***

माधुरी पांगे / वासंती जोशी / परशुराम कोर

सोशल मिडियावर आम्हाला फॉलो करा: @PIBMumbai    /PIBMumbai    /pibmumbai  pibmumbai[at]gmail[dot]com