માનનીય યુવા બાબતો અને રમતગમત મંત્રી ડૉ. મનસુખ માંડવિયાએ ગુરુવારે દેશભરના નાગરિકોને રાષ્ટ્રીય રમત દિવસ 2025 નિમિત્તે ફિટનેસ અને રમતગમત માટે એક કલાક સમર્પિત કરવા હાકલ કરી, જે દર વર્ષે 29 ઓગસ્ટે હોકીના દિગ્ગજ મેજર ધ્યાનચંદની જન્મજયંતિ નિમિત્તે ઉજવવામાં આવે છે.

આ વર્ષે, આ ઉજવણીનું નેતૃત્વ ફિટ ઇન્ડિયા મિશન દ્વારા ભારતીય રમતગમત ઇકોસિસ્ટમ સાથે ભાગીદારીમાં કરવામાં આવશે, અને 29 થી 31 ઓગસ્ટ દરમિયાન ત્રણ દિવસીય, સમગ્ર ભારતમાં રમતગમત ચળવળ તરીકે આયોજિત કરવામાં આવશે.

2036માં ઓલિમ્પિક અને પેરાલિમ્પિક રમતોનું આયોજન કરવાના ભારતના વિઝન સાથે જોડાયેલ, આ ઉજવણીનો ઉદ્દેશ્ય રમતગમત અને ફિટનેસ પ્રવૃત્તિઓમાં મોટા પાયે ભાગીદારીને પ્રેરિત કરવાનો છે, જે વિશ્વને દર્શાવે છે કે ભારતમાં રમતગમત ઝડપથી રાષ્ટ્રવ્યાપી જન ચળવળમાં વિકસી રહી છે. બ્લોક અને જિલ્લાઓથી લઈને શાળાઓ, યુનિવર્સિટીઓ, કાર્યસ્થળો અને રહેણાંક સમુદાયો સુધી, દેશભરના નાગરિકો રમતગમતના સામૂહિક ઉજવણીમાં એક થશે, મિત્રતા, આદર અને શ્રેષ્ઠતાના ઓલિમ્પિક મૂલ્યો અને નિશ્ચય, હિંમત, પ્રેરણા અને સમાનતાના પેરાલિમ્પિક મૂલ્યોને સ્વીકારશે.

ત્રણ દિવસીય પ્રવૃત્તિઓના માળખાની રૂપરેખા આપતાં, ડૉ. માંડવિયાએ જણાવ્યું હતું કે 29 ઓગસ્ટના રોજ રાષ્ટ્રવ્યાપી સભાઓ અને સ્મારક કાર્યક્રમો દ્વારા મેજર ધ્યાનચંદને વિશેષ શ્રદ્ધાંજલિ આપવામાં આવશે.

"રાષ્ટ્રીય રમતગમત દિવસ આપણા હોકીના દિગ્ગજ મેજર ધ્યાનચંદજીના માનમાં ઉજવવામાં આવે છે. આ વખતે આપણે 29થી 31 ઓગસ્ટ દરમિયાન રાષ્ટ્રીય રમતગમત દિવસની ત્રણ દિવસીય ઉજવણીનું આયોજન કરી રહ્યા છીએ. હું આપણા બધા નાગરિકોને 'એક ઘંટા ખેલ કે મેદાન મેં' સમર્પિત કરવા વિનંતી કરીશ. જો ખેલતે હૈં વો  ખિલતે હૈં, એમ આપણા માનનીય પ્રધાનમંત્રી નરેન્દ્ર મોદીજીએ કહ્યું છે. ફક્ત સ્વસ્થ નાગરિકો જ સમૃદ્ધ રાષ્ટ્રનું નિર્માણ કરી શકે છે. તેથી, હું ફરીથી દેશભરના નાગરિકો, વિદ્યાર્થીઓ, કર્મચારીઓ અને સંસ્થાઓને રમતના મેદાનોમાં બહાર નીકળવા અને તંદુરસ્ત રાષ્ટ્ર માટે રમતગમત અને શારીરિક પ્રવૃત્તિ માટે એક કલાક સમર્પિત કરવા કહીશ," ડૉ. માંડવિયાએ ગુરુવારે જણાવ્યું હતું.

"અમે રાષ્ટ્રીય રમત દિવસને ઓલિમ્પિક અને પેરાલિમ્પિક ચળવળ સાથે જોડ્યો છે, જ્યાં દેશના તમામ નાગરિકો ઓલિમ્પિક અને પેરાલિમ્પિક મૂલ્યો સાથે રમતગમત અને ફિટનેસ પ્રવૃત્તિઓમાં ઉત્સાહપૂર્વક ભાગ લે છે, અને સાથે સાથે તેને તેમના રોજિંદા જીવનમાં એક આદત પણ બનાવે છે," તેમણે ઉમેર્યું હતું.

 

ભારતના પ્રથમ ઓલિમ્પિક સુવર્ણ ચંદ્રક વિજેતા અભિનવ બિન્દ્રા અને ફૂટબોલ દિગ્ગજ સુનિલ છેત્રીએ પણ સોશિયલ મીડિયા પર આરોગ્ય અને ફિટનેસના આ ઉજવણીમાં ભાગ લેવા માટે તમામ ઉંમરના અને સમુદાયના લોકોને વિનંતી કરી હતી.

National Sports Day humein khel ke saath fitness aur Olympic values ki importance ko bhi yaad dilata hai. Chaliye mil kar participate karein, apne mohalle aur schools mein khel ko apnayein.

29 se 31 August tak chalne wale three-day mega celebrations mein jud kar khel ko apni…

— Sunil Chhetri (@chetrisunil11) August 21, 2025

દરેક જિલ્લાના મુખ્ય સ્ટેડિયમો સંસદ સભ્યોની ભાગીદારી સાથે ઉજવણીથી જીવંત બનશે, જ્યારે દેશના અગ્રણી રમતવીરો સ્થાનિક કાર્યક્રમોમાં જોડાશે જેથી ભાગ લેનારાઓને રમતગમતને જીવનના માર્ગ તરીકે સ્વીકારવા માટે પ્રેરણા અને પ્રોત્સાહિત કરી શકાય.

આ ઉજવણી 30 ઓગસ્ટે દેશભરમાં ફિટ ઇન્ડિયા કાર્નિવલ-શૈલીના કાર્યક્રમોના આયોજન સાથે ચાલુ રહેશે. સક્રિય જીવન માટે વધુ જાગૃતિ અને ઉત્સાહને પ્રોત્સાહન આપવા માટે રમતગમત અને ફિટનેસ પર કેન્દ્રિત ચર્ચાઓ, પેનલ ચર્ચાઓ, વાર્તાલાપ અને સ્પર્ધાઓની શ્રેણી દેશભરમાં યોજવામાં આવશે.

31 ઓગસ્ટના રોજ, દેશભરના નાગરિકો રાષ્ટ્રીય રમતગમત ચળવળની થીમ હેઠળ ફિટ ઇન્ડિયા "સન્ડે ઓન સાયકલ"માં સક્રિયપણે ભાગ લેશે, જે લોકોને નિયમિત ફિટનેસ પ્રેક્ટિસ તરીકે સાયકલ ચલાવવા અને તેને તેમની જીવનશૈલીનો અભિન્ન ભાગ બનાવવા માટે પ્રોત્સાહિત કરશે. વધુમાં, ફિટ ઇન્ડિયા એપ પર્યાવરણને અનુકૂળ ટેવોને પ્રોત્સાહન આપવા અને નાગરિકોને સ્વસ્થ અને વધુ ટકાઉ જીવનશૈલી અપનાવવા માટે પ્રેરણા આપવા માટે કાર્બન સેવિંગ્સ ઇન્સેન્ટિવાઇઝેશન ઘટકની એક સુવિધા શરૂ કરશે.

ખેલો ભારત નીતિ 2025 અને રાષ્ટ્રીય રમતગમત શાસન અધિનિયમ 2025 દ્વારા, યુવા બાબતો અને રમતગમત મંત્રાલય 2047 સુધીમાં ભારત માત્ર એક વિકસિત રાષ્ટ્ર જ નહીં પરંતુ વૈશ્વિક રમતગમત મહાસત્તા પણ બને તે સુનિશ્ચિત કરવા માટે પાયો નાખશે.

રાષ્ટ્રીય રમતગમત દિવસ 2025 એક ફિટ, સક્રિય અને આંતરરાષ્ટ્રીય સ્તરે સ્પર્ધાત્મક રમતગમત રાષ્ટ્ર બનાવવા તરફ વધુ એક નિર્ણાયક પગલું હશે, જે વિકસિત ભારતની અનુભૂતિ તરફ આગળ વધશે.

SM/IJ/GP/JD
(Release ID: 2159542)