ਯਾਤਰੀਆਂ ਨੂੰ ਸੁਵਿਧਾਜਨਕ ਅਤੇ ਕੁਸ਼ਲ ਟੋਲਿੰਗ ਅਨੁਭਵ ਪ੍ਰਦਾਨ ਕਰਨ ਲਈ ਸ਼ੁਰੂ ਕੀਤੀ ਗਈ ਫਾਸਟੈਗ ਸਲਾਨਾ ਪਾਸ ਸੁਵਿਧਾ ਨੇ ਦੇਸ਼ ਭਰ ਵਿੱਚ ਪੰਜ ਲੱਖ ਉਪਯੋਗਕਰਤਾਵਾਂ ਦਾ ਇਤਿਹਾਸਿਕ ਅੰਕੜਾ ਪਾਰ ਕਰ ਲਿਆ ਹੈ। ਫਾਸਟੈਗ ਸਲਾਨਾ ਪਾਸ ਸੁਵਿਧਾ 15 ਅਗਸਤ 2025 ਨੂੰ ਸ਼ੁਰੂ ਕੀਤੀ ਗਈ ਸੀ। ਇਸ ਨੂੰ ਨੈਸ਼ਨਲ ਹਾਈਵੇਅ ਉਪਯੋਗਕਰਤਾਵਾਂ ਤੋਂ ਜ਼ਬਰਦਸਤ ਹੁੰਗਾਰਾ ਮਿਲਿਆ। ਪਿਛਲੇ ਚਾਰ ਦਿਨਾਂ ਵਿੱਚ ਸਭ ਤੋਂ ਵੱਧ ਸਲਾਨਾ ਪਾਸ ਤਮਿਲ ਨਾਡੂ ਵਿੱਚ ਖਰੀਦੇ ਗਏ, ਉਸ ਤੋਂ ਬਾਅਦ ਕਰਨਾਟਕ ਅਤੇ ਹਰਿਆਣਾ ਦਾ ਸਥਾਨ ਰਿਹਾ। ਸਾਰੇ ਟੋਲ ਪਲਾਜ਼ਾਂ ‘ਤੇ ਫਾਸਟੈਗ ਸਲਾਨਾ ਪਾਸ ਰਾਹੀਂ ਸਭ ਤੋਂ ਵੱਧ ਲੈਣ-ਦੇਣ ਤਮਿਲ ਨਾਡੂ, ਕਰਨਾਟਕ ਅਤੇ ਆਂਧਰ ਪ੍ਰਦੇਸ਼ ਵਿੱਚ ਦਰਜ ਕੀਤੇ ਗਏ।

ਰਾਜਮਾਰਗਯਾਤਰਾ ਐਪ (Rajmargyatra App), ਗੂਗਲ ਪਲੇਸਟੋਰ ‘ਤੇ 15 ਲੱਖ ਤੋਂ ਵੱਧ ਡਾਊਨਲੋਡ ਦੇ ਨਾਲ 23ਵੇਂ ਸਥਾਨ ‘ਤੇ ਅਤੇ ਯਾਤਰਾ ਸ਼੍ਰੇਣੀ ਵਿੱਚ ਦੂਸਰੇ ਸਥਾਨ ‘ਤੇ ਪਹੁੰਚ ਗਈ ਹੈ। ਇਸ ਦੀ ਰੇਟਿੰਗ 4.5 ਸਟਾਰ ਹੈ। ਫਾਸਟੈਗ ਸਲਾਨਾ ਪਾਸ ਲਾਂਚ ਹੋਣ ਦੇ ਚਾਰ ਦਿਨਾਂ ਦੇ ਅੰਦਰ ਹੀ ਇਸ ਐਪ ਨੇ ਟੌਪ ਸਰਕਾਰੀ ਐਪ ਬਣਨ ਦੀ ਉਪਲਬਧੀ ਵੀ ਹਾਸਲ ਕਰ ਲਈ ਹੈ।

ਨੈਸ਼ਨਲ ਹਾਈਵੇਅ ਉਪਯੋਗਕਰਤਾਵਾਂ ਨੂੰ ਸਹਿਜ ਅਤੇ ਕਿਫਾਇਤੀ ਯਾਤਰਾ ਵਿਕਲਪ ਪ੍ਰਦਾਨ ਕਰਦੇ ਹੋਏ, ਫਾਸਟੈਗ ਸਲਾਨਾ ਪਾਸ ਸੁਵਿਧਾ 15 ਅਗਸਤ 2025 ਨੂੰ ਸ਼ੁਰੂ ਕੀਤੀ ਗਈ ਸੀ। ਇਹ ਨੈਸ਼ਨਲ ਹਾਈਵੇਅਜ਼ ਅਤੇ ਨੈਸ਼ਨਲ ਐਕਸਪ੍ਰੈੱਸਵੇਅਜ਼ ‘ਤੇ ਲਗਭਗ 1,150  ਸਾਰੇ ਟੋਲ ਪਲਾਜ਼ਾਂ ‘ਤੇ ਲਾਗੂ ਹੈ। ਇਹ ਸਲਾਨਾ ਪਾਸ ਇੱਕ ਸਾਲ ਦੀ ਵੈਧਦਾ ਲਈ 3,000 ਰੁਪਏ ਦੀ ਇੱਕਮੁਸ਼ਤ ਫੀਸ ਭੁਗਤਾਨ ਜਾਂ 200 ਟੋਲ ਪਲਾਜ਼ਾ ਕ੍ਰਾਸਿੰਗ ਰਾਹੀਂ ਫਾਸਟੈਗ ਨੂੰ ਵਾਰ-ਵਾਰ ਰਿਚਾਰਜ ਕਰਨ ਦੀ ਜ਼ਰੂਰਤ ਨੂੰ ਸਮਾਪਤ ਕਰਦਾ ਹੈ। ਇਹ ਪਾਸ ਵੈਧ ਫਾਸਟੈਗ ਵਾਲੇ ਸਾਰੇ ਗੈਰ-ਵਪਾਰਕ ਵਾਹਨਾਂ ਲਈ ਲਾਗੂ ਹੈ। ਇਹ ਦੇਸ਼ ਭਰ ਦੇ ਨੈਸ਼ਨਲ ਹਾਈਵੇਅਜ਼ ‘ਤੇ ਪਹੁੰਚਯੋਗ ਯਾਤਰਾ ਅਨੁਭਵ ਲਈ ਰਾਜਮਾਰਗਯਾਤਰਾ ਐਪ (Rajmargyatra App)  ਜਾਂ ਐੱਨਐੱਚਏਆਈ ਵੈੱਬਸਾਈਟ ਰਾਹੀਂ ਇੱਕਮੁਸ਼ਤ ਫੀਸ ਭੁਗਤਾਨ ਦੇ ਦੋ ਘੰਟੇ ਦੇ ਅੰਦਰ ਸਰਗਰਮ ਹੋ ਜਾਂਦਾ ਹੈ।

****

ਐੱਸਆਰ/ਜੀਡੀਐੱਚ/ਪੀਐੱਨ/ਐੱਚਕੇ