U Myntri Sorkar Pdeng ba dei khmih ia ki tnad kam rep bad ka bha ka miat jong ki nongrep bad Rural Development Shivraj Singh Chouhan u la leit iashim bynta ha ka 'Meghalaya Pineapple Festival-2025' ha New Delhi mynta ka sngi. Ha kane ka sngi u Myntri Rangbah ka Meghalaya Conrad K. Sangma bad ki ophisar jong ka Sorkar Pdeng bad Sorkar Jylla ki la iadon lang.

Kane ka jingialang ka la sdang da ka jingiasoi ia ki Memorandum of Understanding (MoU) bapher bapher halor u sohtrun. Hadien kata, u myntri ka sorkar pdeng u la pyllait ia ka kot lyngkdop ‘Meghalaya's progress in agriculture sector’.

U myntri ka tnad ka rep ka riang jong ka sorkar pdeng u Shivraj Singh haba kren ha kane ka sngi u la ong ba u sohtrun na ka jylla Meghalaya u long uba pher ha ka jingbang bad ka jingbha. U la iaroh ia ki nongrep bad ki paidbah ka jylla Meghalaya kiba trei shitom. Ki mar rep kiba kynthup ia ki soh, ki jingbam ba bang, u sohtrun, u shynrai, u sying, coffee, sla sha, sohphan bad ki tid jong ka jylla ki long kiba bha shisha. Kiba bun na ki ki dei ki bym ber dawai bad ki donkam ban pynphriang kyrkieh sha kylleng ka pyrthei.

U myntri u la ong ba ka sorkar pdeng kan iatreilang bad u myntri rangbah ka jylla bad ki heh ophisar ka jylla na ka bynta ban shalan ia ki mar na ka thain shatei lammihngi shabar jong ka jylla bad shabar ka ri. Ki riew shimet ruh ki lah ban don ka bynta kaba kongsan ha kane ka kam. Ka long kaba pynsngewtynnad shisha ban ïohi ba ka sorkar jylla ka kyntiew ia kane lyngba ki MoU.

U Chauhan u la ong shuh shuh ba u Myntri Rangbah Ruh ka ri jong ngi u angnud ban kyntiew ia ka thain shatei lammihngi. Ka sorkar pdeng kan ai ka jingkyrshan kaba pura ia ka jylla Meghalaya na ka bynta ki kam pynroi kynthup ia ka rep ka riang.

U myntri ka tnad rep ka sorkar pdeng u la pyntip ba shen un sa wan biang sha Meghalaya ryngkat bad ka kynhun ki riewstad. U la ïathuh ruh ba ha ka por ba u la wan jngoh ïa ka jylla ha ka ‘Vikasit Krishi Sankalp Abhiyan’, ki nongrep ki la pynpaw ïa ki katto katne ki jingeh kiba ïadei bad ka rep ka riang. Ki nongrep ki la dawa ia ki lad ki lynti kiba biang na ka bynta ban pynneh ia ki mar rep. Ha kaba iadei bad kane, la ai ki jingbthah kiba donkam ia ki riewstad jong ka Indian Council of Agricultural Research. Ki lad ki lynti kiba skhem kin sa mih shen bad ki jingwad bniah ki dang iaid shakhmat.

U myntri sorkar pdeng u la ong ba ka jingpynkhreh ia ki mar rep ka long kaba donkam bad la pyrshang tyngeh ban seng ia ki jaka pynkhreh kiba iahap. Ka sorkar jylla ka la rah ruh ia ka jingtyrwa ban pyndonkam da ki liengsuin ban pynkit ia ki mar rep bad la pdiang ia kane ka jingtyrwa. Yn sa peit ruh ia ka lad ban kit ia kine ki mar lyngba ka rel. Yn pyrshang ruh ban pynbun ia ka jingpynmih ia u sohtrun ha man ka shi hectare. Yn pynkhreh ia ka rukom treikam kaba donkam na ka bynta ban kyntiew ia ka rep ka riang ha ka jylla Meghalaya ryngkat ka jingiatreilang bad ka sorkar jylla.

Haba pynkut ia ka jingkren jong u, u myntri ka tnad rep jong ka sorkar pdeng u la kyntu ia ki samla ban seng ia ki startup ha ka rep ka riang. U la kyrpad ruh ïa ki trai ri ba kin pyndonkam hok ïa ki mar rep jong ka Meghalaya. “Ki mar jong ngi ki long kiba bha tam ha ka pyrthei, ngim dei ban artatien ban pyndonkam ïa ki,” u la ong.

*******