ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଥିବା କେନ୍ଦ୍ର କ୍ୟାବିନେଟ ଆଜି ଜାତୀୟ ସମବାୟ ଉନ୍ନୟନ ନିଗମକୁ ୨୦୨୫-୨୬ ରୁ ୨୦୨୮-୨୯ ପର୍ଯ୍ୟନ୍ତ ଚାରି ବର୍ଷ ପାଇଁ ୨୦୦୦ କୋଟି ଟଙ୍କାର କେନ୍ଦ୍ରୀୟ ଅନୁଦାନ ସହାୟତା ଯୋଜନାକୁ ମଞ୍ଜୁରୀ ଦେଇଛନ୍ତି। ଏହା ଅଧୀନରେ, ୨୦୨୫-୨୬ ଆର୍ଥିକ ବର୍ଷରୁ ପ୍ରତିବର୍ଷ ୫୦୦ କୋଟି ଟଙ୍କାର ଅନୁଦାନ ସହାୟତା ପ୍ରଦାନ କରାଯିବ।

୨୦୨୫-୨୬ ରୁ ୨୦୨୮-୨୯ ଆର୍ଥିକ ବର୍ଷ ପର୍ଯ୍ୟନ୍ତ ୨୦୦୦ କୋଟି ଟଙ୍କାର ଅନୁଦାନ ସହାୟତା ଆଧାରରେ, ଏନସିଡିସି ଚାରି ବର୍ଷ ମଧ୍ୟରେ ଖୋଲା ବଜାରରୁ ୨୦,୦୦୦ କୋଟି ଟଙ୍କା ସଂଗ୍ରହ କରିପାରିବ। ଏହି ପାଣ୍ଠିଗୁଡ଼ିକୁ ଏନସିଡିସି ଦ୍ୱାରା ସମବାୟ ସଂସ୍ଥାମାନଙ୍କୁ ନୂତନ ପ୍ରକଳ୍ପ ସ୍ଥାପନ / କାରଖାନା ବିସ୍ତାର ଏବଂ କାର୍ଯ୍ୟକାରୀ ପୁଞ୍ଜି ଆବଶ୍ୟକତା ପୂରଣ ପାଇଁ ଋଣ ପ୍ରଦାନ କରିବା ନିମନ୍ତେ ବ୍ୟବହାର କରାଯିବ।

ଆର୍ଥିକ ପ୍ରଭାବ:

ଏନସିଡିସିକୁ ୨୦୦୦ କୋଟି ଟଙ୍କା (୨୦୨୫-୨୬ ଆର୍ଥିକ ବର୍ଷରୁ ୨୦୨୮-୨୯ ଆର୍ଥିକ ବର୍ଷ ପର୍ୟ୍ୟନ୍ତ ପ୍ରତିବର୍ଷ ୫୦୦ କୋଟି ଟଙ୍କା) ଅନୁଦାନର ଉତ୍ସ ଭାରତ ସରକାରଙ୍କ ବଜେଟ୍ ସହାୟତା ମାଧ୍ୟମରେ ଦିଆଯିବ। ଏନସିଡିସିକୁ ଦିଆଯିବାକୁ ଥିବା ଏହି ୨୦୦୦ କୋଟି ଟଙ୍କାର ଅନୁଦାନ ସହାୟତା ଆଧାରରେ, ଏନସିଡିସି ଚାରି ବର୍ଷ ମଧ୍ୟରେ ଖୋଲା ବଜାରରୁ ୨୦,୦୦୦ କୋଟି ଟଙ୍କା ସଂଗ୍ରହ କରିପାରିବ।

ଲାଭ:

ଏହା ଦ୍ବାରା ଦେଶବ୍ୟାପୀ ଦୁଗ୍ଧ, ପଶୁପାଳନ, ମତ୍ସ୍ୟପାଳନ, ଚିନି, ବୟନଶିଳ୍ପ, ଖାଦ୍ୟ ପ୍ରକ୍ରିୟାକରଣ, ସଂରକ୍ଷଣ ଏବଂ ଶୀତଳ ଭଣ୍ଡାର ଭଳି ବିଭିନ୍ନ କ୍ଷେତ୍ରର ୧୩,୨୮୮ ସମବାୟ ସମିତି; ଶ୍ରମ ଏବଂ ମହିଳା ନେତୃତ୍ୱାଧୀନ ସମବାୟ ସମିତିଗୁଡ଼ିକର ପ୍ରାୟ ୨.୯ କୋଟି ସଦସ୍ୟ ଉପକୃତ ହେବାର ସମ୍ଭାବନା ଅଛି।

କାର୍ଯ୍ୟାନ୍ୱୟନ ନୀତି ଏବଂ ଉଦ୍ଦେଶ୍ୟ:

(କ) ଏହି ଯୋଜନା ଜାତୀୟ ସମବାୟ ବିକାଶ ନିଗମ ଦ୍ୱାରା କାର୍ୟ୍ୟକାରୀ କରାଯିବ ଯାହା ପ୍ରକଳ୍ପ ପାଣ୍ଠି ବଣ୍ଟନ, ଅନୁସରଣ, ପ୍ରକଳ୍ପ ତଦାରଖ ଏବଂ ପାଣ୍ଠିରୁ ପ୍ରଦାନ କରାଯାଇଥିବା ଋଣର ଆଦାୟ ପାଇଁ ଦାୟୀ ରହିବ।

(ଖ) ଏନସିଡିସି ନିୟମାବଳୀ ଅନୁଯାୟୀ, ଏନସିଡିସି ରାଜ୍ୟ ସରକାରଙ୍କ ମାଧ୍ୟମରେ କିମ୍ବା ସିଧାସଳଖ ସମବାୟ ସମିତିଗୁଡ଼ିକୁ ଋଣ ପ୍ରଦାନ କରିବ। ଯେଉଁ ସମବାୟ ସଂସ୍ଥାଗୁଡ଼ିକ ଏନସିଡିସିର ପ୍ରତ୍ୟକ୍ଷ ପାଣ୍ଠି ନିର୍ଦ୍ଦେଶାବଳୀର ମାନଦଣ୍ଡ ପୂରଣ କରୁଛନ୍ତି, ସେମାନଙ୍କୁ ଗ୍ରହଣୀୟ ସିକ୍ୟୁରିଟି କିମ୍ବା ରାଜ୍ୟ ସରକାରଙ୍କ ଗ୍ୟାରେଣ୍ଟି ଭିତ୍ତିରେ ସିଧାସଳଖ ଆର୍ଥିକ ସହାୟତା ପାଇଁ ବିବେଚନା କରାଯିବ।

(ଗ) ଏନସିଡିସି ବିଭିନ୍ନ କ୍ଷେତ୍ର ପାଇଁ ପ୍ରକଳ୍ପ ସୁବିଧା ସ୍ଥାପନ/ଆଧୁନିକୀକରଣ/ପ୍ରଯୁକ୍ତିବିଦ୍ୟା ଉନ୍ନତି/ବିସ୍ତାର ଏବଂ ସେମାନଙ୍କ ବ୍ୟବସାୟକୁ ଦକ୍ଷତାର ସହିତ ଏବଂ ଲାଭଦାୟକ ଭାବରେ ପରିଚାଳନା କରିବା ପାଇଁ କାର୍ଯ୍ୟକାରୀ ପୁଞ୍ଜି ପାଇଁ ସମବାୟ ସମିତିଗୁଡ଼ିକୁ ଦୀର୍ଘକାଳୀନ ଋଣ ପ୍ରଦାନ କରିବ।

ନିଯୁକ୍ତି ସୃଷ୍ଟି ସମ୍ଭାବନା ଏବଂ ପ୍ରଭାବ:

(କ) ଏହି ସମବାୟ ସଂସ୍ଥାଗୁଡ଼ିକୁ ପ୍ରଦାନ କରାଯାଇଥିବା ପାଣ୍ଠି ଆୟ ସୃଷ୍ଟିକାରୀ ପୁଞ୍ଜି ସମ୍ପତ୍ତି ସୃଷ୍ଟି କରିବ ଏବଂ ସମବାୟ ସଂସ୍ଥାଗୁଡ଼ିକୁ ଆବଶ୍ୟକୀୟ ନଗଦ କାର୍ଯ୍ୟକାରୀ ପୁଞ୍ଜି ପ୍ରଦାନ କରିବ।

(ଖ) ଆର୍ଥିକ ଲାଭ ବ୍ୟତୀତ, ଗଣତନ୍ତ୍ର, ସମାନତା ଏବଂ ସାମୁଦାୟିକ ଚିନ୍ତାର ନୀତି ମାଧ୍ୟମରେ ସମବାୟ ସଂସ୍ଥାଗୁଡ଼ିକ ସାମାଜିକ-ଆର୍ଥିକ ବ୍ୟବଧାନ ପୂରଣ କରିବା ଏବଂ କର୍ମଶକ୍ତିରେ ମହିଳାମାନଙ୍କର ଅଂଶଗ୍ରହଣ ବୃଦ୍ଧି କରିବା ପାଇଁ ଏକ ଅତ୍ୟାବଶ୍ୟକୀୟ ଉପକରଣ।

(ଗ) ଋଣର ଉପଲବ୍ଧତା ସମବାୟ ସଂସ୍ଥାଗୁଡ଼ିକୁ ସେମାନଙ୍କର କ୍ଷମତା ବୃଦ୍ଧି, ଆଧୁନିକୀକରଣ, କାର୍ୟ୍ୟକଳାପ ବିବିଧତା, ଉତ୍ପାଦକତା ଏବଂ ଲାଭ ବୃଦ୍ଧି ଏବଂ ଅଧିକ ନିଯୁକ୍ତି ସୃଷ୍ଟି କରିବାକୁ ସକ୍ଷମ କରିବ, ଯାହା ଦ୍ୱାରା କୃଷକ ସଦସ୍ୟଙ୍କ ଆର୍ଥିକ ଅବସ୍ଥା ଉନ୍ନତ ହେବ।

(ଘ) ଏହା ସହିତ, ଭିତ୍ତିଭୂମି ବିକାଶ ପାଇଁ ମିଆଦୀ ଋଣ ମଧ୍ୟ ବିଭିନ୍ନ ଦକ୍ଷତା ଅନୁସାରେ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି କରିବ।

ପୃଷ୍ଠଭୂମି:

ଭାରତୀୟ ଅର୍ଥନୀତିରେ ସମବାୟ କ୍ଷେତ୍ରର ଗୁରୁତ୍ୱପୂର୍ଣ୍ଣ ଅବଦାନ ରହିଛି। ଗ୍ରାମାଞ୍ଚଳର ସାମାଜିକ-ଆର୍ଥିକ ଉନ୍ନତି, ଭିତ୍ତିଭୂମି ବିକାଶ ଏବଂ ନିଯୁକ୍ତି ସୃଷ୍ଟିରେ ସମବାୟ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ। ଦେଶର ସମସ୍ତ ଉତ୍ପାଦନ କ୍ଷେତ୍ରରେ ସମବାୟ କ୍ଷେତ୍ରର ଗୁରୁତ୍ୱପୂର୍ଣ୍ଣ ଅବଦାନ ରହିଛି। ଭାରତରେ ସମବାୟ ସଂସ୍ଥାଗୁଡ଼ିକ ଋଣ ଏବଂ ବ୍ୟାଙ୍କିଙ୍ଗ, ସାର, ଚିନି, ଦୁଗ୍ଧ, ବିପଣନ, ଉପଭୋକ୍ତା ସାମଗ୍ରୀ, ହସ୍ତତନ୍ତ, ହସ୍ତଶିଳ୍ପ, ମତ୍ସ୍ୟଚାଷ, ଗୃହ ନିର୍ମାଣ ଇତ୍ୟାଦିରେ ବିବିଧ କାର୍ୟ୍ୟକଳାପରେ ନିୟୋଜିତ। ଦେଶରେ ୮ ଲକ୍ଷ ୨୫ ହଜାରରୁ ଅଧିକ ସମବାୟ ସଂସ୍ଥା ରହିଛି ଯାହାର ୨୯ କୋଟିରୁ ଅଧିକ ସଦସ୍ୟ ଅଛନ୍ତି। ଦେଶର ୯୪ ପ୍ରତିଶତ ଚାଷୀ କୌଣସି ନା କୌଣସି ରୂପରେ ସମବାୟ ସହିତ ଜଡିତ।

ଗ୍ରାମୀଣ ଅର୍ଥନୀତିରେ ଗୁରୁତ୍ୱପୂର୍ଣ୍ଣ ସାମାଜିକ-ଆର୍ଥିକ ଅବଦାନ ଯୋଗୁଁ, ଦୁଗ୍ଧ, କୁକୁଡ଼ା ଏବଂ ପଶୁପାଳନ, ମତ୍ସ୍ୟଚାଷ, ଚିନି, ବୟନ, ଖାଦ୍ୟ ପ୍ରକ୍ରିୟାକରଣ, ସଂରକ୍ଷଣ ଏବଂ ଶୀତଳ ଭଣ୍ଡାର, ଶ୍ରମ ସମବାୟ ଏବଂ ମହିଳା ସମବାୟ ଇତ୍ୟାଦି ଦୁର୍ବଳ କ୍ଷେତ୍ର ପାଇଁ ଦୀର୍ଘକାଳୀନ ଏବଂ କାର୍ୟ୍ୟକାରୀ ପୁଞ୍ଜି ଋଣ ସହାୟତା ଆବଶ୍ୟକ।

TKM