زراعت، کسانوں کی بہبود اور دیہی ترقی کے مرکزی وزیر جناب شیوراج سنگھ چوہان نے منگل کو لوک سبھا میں وقفہ سوالات کے دوران ملک میں زراعت کی صورتحال کے بارے میں ایک جامع اپ ڈیٹ فراہم کیا۔ انہوں نے اس بات کو اجاگر کرنے کے لیے حقائق اور اعداد و شمار کا اشتراک کیا کہ کسانوں کی آمدنی بڑھانے کی مہم وزیر اعظم نریندر مودی کی قیادت میں بتدریج آگے بڑھ رہی ہے۔

مرکزی وزیر نے زرعی ترقی کے لیے چھ اہم اقدامات کا خاکہ پیش کیا:

پیداوار کو بڑھانا

کسانوں کی آمدنی بڑھانے کے لیے پیداوار لاگت کو کم کرنا

زرعی پیداوار کی منصفانہ قیمتوں کو یقینی بنانا

نقصان کی صورت میں مناسب معاوضہ فراہم کرنا

زرعی تنوع کو فروغ دینا، بشمول پھلوں، سبزیوں، ادویاتی پودوں کی کاشت، زرعی جنگلات، ماہی پروری اور مویشی پالنا۔

قدرتی کاشتکاری کی حوصلہ افزائی اور آئندہ نسلوں کے لیے مٹی کی حفاظت کے لیے کھادوں کے متوازن استعمال

 

جناب چوہان نے کہا کہ گزشتہ 10 سالوں میں فصل کی پیداوار 246.42 ملین ٹن سے بڑھ کر 353.96 ملین ٹن ہو گئی ہے۔ دالوں کی پیداوار 16.38 ملین ٹن سے بڑھ کر 25.24 ملین ٹن ہو گئی اور تیل کے بیجوں کی پیداوار 27.51 ملین ٹن سے بڑھ کر 42.61 ملین ٹن ہو گئی۔ باغبانی کی پیداوار بھی 280.70 ملین ٹن سے بڑھ کر 367.72 ملین ٹن تک پہنچ گئی۔ وزیر زراعت نے ملک میں دودھ کی پیداوار میں نمایاں اضافہ کو بھی نوٹ کیا، جو مکمل طور پر کسانوں کے ذریعے کارفرما ہے۔

کسانوں کی آمدنی کے معاملے پرجناب چوہان نے زور دے کر کہا کہ نیشنل ڈیموکریٹک الائنس (این ڈی اے) حکومت کے تحت بہت سے کسانوں نے اپنی آمدنی دوگنی سے بھی زیادہ کر لی ہے، جیسا کہ انہوں نے سابقہ یو پی اے (متحدہ ترقی پسند اتحاد) حکومت کے 27,000 کروڑ روپے کے زرعی بجٹ کا موجودہ مختص 1.27 لاکھ کروڑ سے موازنہ کیا۔ جناب چوہان نے کہا کہ پی ایم کسان سمان ندھی، جو پہلے موجود نہیں تھی، اب 10 کروڑ کسانوں کو فائدہ پہنچاتی ہے، انہوں نے مزید کہا کہ مرکزی حکومت سالانہ تقریباً 2 لاکھ کروڑ روپے کی کھاد سبسڈی فراہم کر رہی ہے۔

وزیر زراعت نے کہا کہ مودی حکومت کے تحت ادارہ جاتی قرضہ بھی یو پی اے دور میں 7 لاکھ کروڑ روپے سے بڑھ کر آج 25 لاکھ کروڑ روپے تک پہنچ گیا ہے۔ پردھان منتری فصل بیمہ یوجنا کے بارے میں، انہوں نے کہا کہ مرکز نے کسانوں کے کھاتوں میں 35,000 کروڑ کے جمع شدہ پریمیم کے مقابلے میں 1.83 لاکھ کروڑ کے دعوے براہ راست تقسیم کیے ہیں۔

آمدنی میں اضافے کو فروغ دینے کے لیے حکومت میکانائزیشن پر سبسڈی دے رہی ہے اور ’پر ڈراپ مور کراپ‘ اقدام کے تحت ڈرپ اور اسپرنکلر سسٹم فراہم کر رہی ہے۔ پولی ہاؤسز، گرین ہاؤسز میں سرمایہ کاری کی جا رہی ہے اور پھلوں اور سبزیوں کی پیداوار کو بڑھانے اور منصفانہ خریداری کو یقینی بنانے کے لیے بھی کوششیں جاری ہیں۔

وزیر نے اس بات پر زور دیا کہ کسانوں کی آمدنی بڑھانے کے لیے، حکومت نے کم از کم امدادی قیمتوں (ایم ایس پی) میں لاگت پر کم از کم 50 فیصد منافع کے مارجن کو یقینی بنانے کا فیصلہ کیا۔ فی الحال بڑے پیمانے پر خریداری جاری ہے، اور کسان فصلوں کے نقصان کا معاوضہ وصول کر رہے ہیں۔ وزیر نے کہا کہ یوریا اور ڈی اے پی (ڈیمونیم فاسفیٹ) جیسی سبسڈی والی کھادیں بھی وسیع پیمانے پر دستیاب کی جا رہی ہیں۔

جناب چوہان نے مزید روشنی ڈالی کہ چھوٹے زمینداروں اور کرایہ دار کسانوں کے لیے خصوصی اسکیمیں تیار کی گئی ہیں۔ مرکز نے مالکان کو کرایہ دار کسانوں کوپی ایم ایف بی وائی فوائد حاصل کرنے کی اجازت دی ہے۔ حال ہی میں، اس اسکیم کے تحت 6.55 لاکھ کرایہ دار اور حصہ دار کسانوں کا احاطہ کیا گیا، جس سے کل 41.62 لاکھ سے زیادہ کسانوں کو فائدہ پہنچا۔

جناب چوہان نے ایوان کو یہ بھی بتایا کہ پی ایم آشا اسکیم 100فیصدایم ایس پی پر دالوں اور تیل کے بیجوں جیسے تور، مسور اور اُڑد کی خریداری کے لیے شروع کی گئی ہے۔ اس بات کو یقینی بنانے کے لیے اقدامات کیے جا رہے ہیں کہ مڈل مین کسانوں کا استحصال نہ کریں، اور یہ کہ ایم ایس پی کی شرحیں مؤثر طریقے سے فراہم کی جائیں۔

انہوں نے اعداد و شمار کا حوالہ دیا جس سے ظاہر ہوتا ہے کہ ایم ایس پی کی شرحوں میں نمایاں اضافہ ہوا ہے:

روپے میں:

دھان: 1,310 (2013–14) → 2,369

باجرہ: 1,250 → 2,775

راگی: 1,500 → 4,886

مکئی: 1,310 → ₹2,400

تور: 4,300 → 8,000

مونگ: 4,500 → 8,768

اُڑد: 4,300 → 7,800

مونگ پھلی: 4,000 → 7,263

سورج مکھی: 3,700 → 7,721

سویا بین: 2,560 → 5,328

تل: 4,500 → 9,846

نائجر کا بیج: 3,500 → 9,537

کپاس: 3,700 →7,710

انہوں نے زور دے کر کہا کہ ایم ایس پیز نہ صرف دوگنا ہو گئے ہیں بلکہ خریداری کے حجم میں بھی نمایاں اضافہ ہوا ہے۔ گزشتہ حکومت کے دور میں 10 سالوں میں صرف 6 لاکھ میٹرک ٹن دالوں کی خریداری کی گئی۔ موجودہ حکومت کے تحت یہ تعداد 1.82 کروڑ میٹرک ٹن تک بڑھ گئی ہے۔

اپنے تبصرے کے اختتام پر، جناب چوہان نے کہا کہ وزیر اعظم نریندر مودی کسانوں کے حقیقی خیر خواہ ہیں، اور انہوں نے پی ایم ایف بی وائی کو مزید کسان دوست بنانے کے لیے دوبارہ تشکیل دیا ہے۔ اگر کوئی انشورنس کمپنی آخری تاریخ کے 21 دنوں کے اندر واجب الادا دعوے کی ادائیگی میں ناکام رہتی ہے، تو 12فیصد سود وصول کیا جائے گا اور کسان کے اکاؤنٹ میں براہ راست جمع کر دیا جائے گا۔ یہی 12فیصدسود لاگو ہوتا ہے اگر کوئی ریاستی حکومت پریمیم کے اپنے حصے میں تاخیر کرتی ہے۔

وزیر نے مزید کہا کہ فصلوں کی کٹائی کے تجربات سے متعلق چیلنجوں کا مقابلہ سیٹلائٹ پر مبنی ریموٹ سینسنگ کا استعمال کرتے ہوئے ٹیکنالوجی پر مبنی پیداوار کے تخمینے کے نظام یس ٹیک کے ذریعے کیا جا رہا ہے۔ یہ تبدیلی شفافیت کو فروغ دے گی اورپی ایم ایف بی وائی کے تحت بروقت اور درست معاوضے کو یقینی بناتے ہوئے فصلوں کے نقصان کا ڈیجیٹل جائزہ لے سکے گی۔

******

(ش ح۔اص)

UR No 3572

(Release ID: 2149978)