વાણિજ્ય અને ઉદ્યોગ મંત્રાલયના ઉદ્યોગ અને આંતરિક વેપાર પ્રમોશન વિભાગ (DPIIT) એ ભારતના સ્વચ્છ પરિવહન અને અદ્યતન ઉત્પાદન ક્ષેત્રોના વિકાસને વેગ આપવા માટે ભારતીય ઇલેક્ટ્રિક વાહન ઉત્પાદક એથર એનર્જી લિમિટેડ સાથે સમજૂતી કરાર (MoU) પર હસ્તાક્ષર કર્યા છે. આ સહયોગ સ્ટાર્ટઅપ પોલિસી ફોરમ (SPF)ની આગેવાની હેઠળ બિલ્ડ ઇન ઇન્ડિયા પહેલ હેઠળ કરવામાં આવી રહ્યો છે, જે 50થી વધુ નવીનતા-કેન્દ્રિત સ્ટાર્ટઅપ્સનું જોડાણ છે.

આ એમઓયુ ડીપીઆઈઆઈટી અને એથર એનર્જી વચ્ચે એક વ્યાપક ભાગીદારીની રૂપરેખા આપે છે. જે ડીપ-ટેક સ્ટાર્ટઅપ્સ માટે વ્યૂહાત્મક માર્ગદર્શન, EV મૂલ્ય શૃંખલામાં સ્ટાર્ટઅપ્સ માટે માળખાગત સહાય, ઈન્ડિયા સ્ટાર્ટઅપ ગ્રાન્ડ ચેલેન્જ જેવા સંયુક્ત નવીનતા કાર્યક્રમો, પ્રતિભા અને કૌશલ્ય વિકાસ પહેલનું સહ-હોસ્ટિંગ, અને સ્ટાર્ટઅપ મહાકુંભ જેવા કાર્યક્રમોમાં ભાગીદારી, તેમજ ગ્રાઉન્ડ લેવલે અનુભવ મેળવવા પર ધ્યાન કેન્દ્રિત કરશે.

ડીપીઆઈઆઈટીના સંયુક્ત સચિવ શ્રી સંજીવ સિંહ અને એથર એનર્જીના સહ-સ્થાપક અને સીઈઓ તરુણ મહેતાની ઉપસ્થિતિમાં આ એમઓયુ પર હસ્તાક્ષર કરવામાં આવ્યા હતા. આ પહેલ ટકાઉ પરિવહન તરફ ભારતના સંક્રમણને ટેકો આપશે અને ઉત્પાદન-લક્ષી સ્ટાર્ટઅપ્સ માટે વધુ સક્ષમ વાતાવરણ બનાવશે તેવી અપેક્ષા છે.

હસ્તાક્ષર સમારોહમાં બોલતા, ડીપીઆઈઆઈટીના સંયુક્ત સચિવ શ્રી સંજીવ સિંહે જણાવ્યું હતું કે, "ભારતમાં ઇલેક્ટ્રિક ગતિશીલતા ક્ષેત્ર પરિવર્તનના તબક્કામાં પ્રવેશી રહ્યું છે. એથર એનર્જી સાથેની આ ભાગીદારી દ્વારા, અમારું લક્ષ્ય એક સક્ષમ વાતાવરણના વિકાસને વેગ આપવાનું છે. જ્યાં સ્ટાર્ટઅપ્સ EV ઉત્પાદન, બેટરી નવીનતા અને સ્વચ્છ ઉર્જા ઉકેલોમાં અર્થપૂર્ણ યોગદાન આપી શકે છે."

એથર એનર્જીના સહ-સ્થાપક અને સીઈઓ તરુણ મહેતાએ જણાવ્યું હતું કે, “હાર્ડવેર અને ડીપ-ટેક સ્ટાર્ટઅપ્સ માટે સપોર્ટ સિસ્ટમને મજબૂત બનાવવા માટે DPIIT સાથે સહયોગ કરવાનો અમને આનંદ છે. નીતિગત સમર્થન અને મજબૂત ઉદ્યોગ ભાગીદારી સાથે, આ પહેલ સ્થાપકોને મુખ્ય તકનીકી પડકારોને દૂર કરવામાં અને ભારતમાં ઉચ્ચ-ગુણવત્તાવાળા ઉત્પાદનોને પ્રોત્સાહન આપવામાં મદદ કરી શકે છે.”

સ્ટાર્ટઅપ પોલિસી ફોરમના પ્રમુખ અને સીઈઓ શ્વેતા રાજપાલ કોહલીએ જણાવ્યું હતું કે, “DPIIT અને એથર એનર્જી વચ્ચેની આ ભાગીદારી સ્ટાર્ટઅપ પોલિસી ફોરમની બિલ્ડ ઇન ઇન્ડિયા પહેલને જીવંત બનાવે છે. સહયોગ દ્વારા ભારતના ઉત્પાદન ક્ષેત્રની સંભાવનાઓને મુક્ત કરવી એ વૈશ્વિક સ્તરે સ્પર્ધાત્મક નવીનતા ઇકોસિસ્ટમ બનાવવા માટે ચાવી છે.”

આ સહયોગથી EV અને ઉત્પાદન ક્ષેત્રમાં સ્ટાર્ટઅપ્સ માટે નવી તકો પૂરી પાડવાની અપેક્ષા છે, જેનાથી ભારતના આબોહવા અને ઔદ્યોગિક લક્ષ્યોને અનુરૂપ ભવિષ્ય માટે તૈયાર અને આત્મનિર્ભર સ્ટાર્ટઅપ ઇકોસિસ્ટમમાં ફાળો મળશે.

AP/IJ/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com