U Myntri Sorkar Pdeng ba dei khmih ia ka Tnad Communications bad ka Tnad Development of North Eastern Region (DONER), u Jyotiraditya M. Scindia, ha ka sngi Ba ar u la ïashim bynta ha ka jingïalang jong ka kynhun treikam ba ha khlieh duh kaba la pynleit jingmut ha kaba pynkhlaiñ ïa ka kam shna jaiñ bad ka jingtrei kti ha ka thaiñ shatei lammihngi. Ïa kane ka jingïalang la pynïaid da u Myntri Rangbah ka Jylla Nagaland u Neiphiu Rio, ha ryngkat ki nongïashim bynta ba pawkhmat ba kynthup ïa u Myntri Sorkar Pdeng ba dei khmih ia ka Tnad Tnad Textiles u Giriraj Singh, u Myntri Rangbah ka Jylla Mizoram u Lalduhoma, u Myntri ba dei khmih ia ka Tnad Handloom & Textiles jong ka jylla Assam Urkhao Gwra Brahma, ki heh ophisar jong ka Tnad DoNER, lem bad ki heh ophisar na ka sorkar jylla Manipur bad Sorkar India.

U Myntri Sorkar Pdeng u la pynpaw ïa ka lad kaba khraw ba don ha ka thaiñ shatei lammihngi ban ïalam ïa ka jingkylla ha ka kam ba iadei bad ka riam ka beit ba lah ban neh jong ka ri India, da kaba pynkynmaw ïa ka jingthmu jong u Myntri Rangbahduh ka ri Narendra Modi kaba long ‘Ka riam na ka bynta ka mariang bad ka jingpynkupbor.’ Lyngba ka pateng ba riewspah jong ka ha ki rukom treikam kiba ïadei bad ka mariang, ka jingtbit ha ka kam shna jingshna, bad ka jingtrei kti ba kyrpang, ka thaiñ ka don ha ka kyrdan kaba kyrpang ban ïalam ïa ka jingkylla sha ka rukom kaba khuid, kaba kynthup lang ia ka pyrthei baroh kawei. U Scindia u la ong, "Ka thaiñ shatei lammihngi ka dei ban pyndonkam ïa ka pateng kaba riewspah jong ka ha ki jingshna jain bad ki jingtrei kti ban pynmih ïa ki lad kamai kajih, ban kyntiew ïa ka jingsaindur thymmai, bad ban buh ïa ka pateng jong ka kolshor jong ka India ha ka rynsan jong ka pyrthei.”

U Myntri Sorkar Pdeng ka Tnad Textiles, u Giriraj Singh u la ong ba ka Tnad Textiles kan trei halor ki jingai jingmut ba kordor ba la iasam da ki jylla ka thain shatei lammihngi ha ka jingialang jong ka kynhun treikam ba ha khlieh duh mynta ka sngi da ka jingaiti bad jingiatreilang kaba pura, khnang ba ka jingsaindur, ka kolshor, bad ki nongtrei kti jong ka thain shatei lammihngi kin ioh ia ka rynsan ha kylleng ka pyrthei.

Ka jingialang ka la pynleit jingmut ha kaba pynim biang ia ka jinglong jingman jong ki kam trei kti bad ki kam shna jain lyngba ki jingiarap ba la thmu kum ka jingpynbha ia ka lad ban ioh ia ki iew ki hat, ka jingpyndonkam ia ka teknoloji, ka jingkyntiew ia ka bor treikam, bad ka jingplie ia ki lad kamai kiba lah ban neh. Ka kynhun treikam ka thmu ban iatreilang bad baroh ki nongshim bynta ban kyntiew ia ka kam trei kti bad kam shna jain kum u mawjam jong ka roi ka par kaba neh bad ka jingkiew shaphrang kaba kynthup lang ha ka thain.

Ha kane ka jingialang, u Myntri Sorkar Pdeng u la pynpaw ia ka jingthmu ban wanrah jingkylla na ka bynta kane ka tnad, da kaba ban jur ia ka jingpynkylla thymmai lyngba ki jingkyntiew ia ki jingdon jingem, ka jingpyniasoh lad digital bad ka jingsaindur, bad ka jingkyntiew ia ka sap. Ki sienjam ba kongsan ki kynthup ia ka jingseng ia ki kynhun jong ki nongtrei kti, ka jingseng ia ki Common Facility Centre, bad ka jingithuh ia ki mar ba kongsan ha kylleng ka thain na ka bynta ban kyntiew ia ka ri. Ka rukom treikam ka ban jur ia ka jingpynkhreh ia ka iew da kaba pyniadei ia ki Self-Help Group bad ki jinglong jingman jong ka pyrthei bad kyntiew ia ka kam naduh ki kyrdan kiba hapoh tam, da kaba thmu ban pynkupbor ia ki kam shna jingshna ha ka ri ban roi hapoh ka ri bad shabar ri.

***