ରାଷ୍ଟ୍ରପତି ଶ୍ରୀମତୀ ଦ୍ରୌପଦୀ ମୁର୍ମୁ ଆଜି ଭୁବନେଶ୍ୱରସ୍ଥିତ ଅଖିଳ ଭାରତୀୟ ଆୟୁର୍ବିଜ୍ଞାନ ପ୍ରତିଷ୍ଠାନର ପଞ୍ଚମ ସମାବର୍ତ୍ତନ ଉତ୍ସବରେ ଉଦବୋଧନ ଦେଇଛନ୍ତି । ଓଡ଼ିଶାର ରାଜ୍ୟପାଳ ଶ୍ରୀ ହରିବାବୁ କମ୍ଭମପାଟି, ଓଡିଶାର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଜି, କେନ୍ଦ୍ର ଶିକ୍ଷା ମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନ, ଓଡ଼ିଶା ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ, ସଂସଦୀୟ ବ୍ୟାପାର, ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରୀ ଡକ୍ଟର ମୁକେଶ ମହାଲିଙ୍ଗ, ଭୁବନେଶ୍ୱର ସାଂସଦ ଅପରାଜିତ ଷଡ଼ଙ୍ଗୀ ପ୍ରମୁଖ ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ ।

ସମାରୋହକୁ ସମ୍ବୋଧିତ କରି ରାଷ୍ଟ୍ରପତି କହିଥିଲେ, ଗତ ୧୨ ବର୍ଷ ମଧ୍ୟରେ ଏହି ଅନୁଷ୍ଠାନ ଉଲ୍ଲେଖନୀୟ ଭାବେ ପ୍ରଗତି ହାସଲ କରିଛି। ୨୦୦୩ ମସିହାରେ ଦୂରଦୃଷ୍ଟିସମ୍ପନ୍ନ ମହାନ ରାଷ୍ଟ୍ରନେତା ତଥା ପୂର୍ବତନ ପ୍ରଧାନମନ୍ତ୍ରୀ ଶ୍ରୀ ଅଟଳ ବିହାରୀ ବାଜପେୟୀଙ୍କ ଦ୍ୱାରା ଶିଳାନ୍ୟାସ କ୍ରମେ ପ୍ରତିଷ୍ଠା ହୋଇଥିବା ଏମ୍ସ ରାଜ୍ୟରେ ସ୍ୱାସ୍ଥ୍ୟସେବା ଏବଂ ସାମାଜିକ କଲ୍ୟାଣ କାର୍ଯ୍ୟକଳାପ କ୍ଷେତ୍ରରେ କେବଳ ଓଡ଼ିଶାରେ ନୁହେଁ, ପଶ୍ଚିମବଙ୍ଗ, ଛତିଶଗଡ଼, ଝାଡ଼ଖଣ୍ଡ ଏବଂ ଅନ୍ୟ ରାଜ୍ୟରେ ମଧ୍ୟ ଜନସାଧାରଣଙ୍କ ବିଶ୍ୱାସ ହାସଲ କରିବାରେ ସକ୍ଷମ ହୋଇଛି।

ଭୁବନେଶ୍ୱର ଏମ୍ସର ସଫଳତା ଉପରେ ଆଲୋକପାତ କରି ଶ୍ରୀମତୀ ମୁର୍ମୁ କହିଥିଲେ, ଗତ ଗୋଟିଏ ବର୍ଷ ମଧ୍ୟରେ, ଭୁବନେଶ୍ୱର ଏମ୍ସ ବହିର୍ବିଭାଗରେ ୧୦ ଲକ୍ଷରୁ ଅଧିକ ରୋଗୀ ଚିକିତ୍ସା ପାଇଛନ୍ତି। ୧୭ ଲକ୍ଷ ରୋଗ ନିଦାନ ପରୀକ୍ଷା ଏବଂ ୨୫,୦୦୦ ଅସ୍ତ୍ରୋପଚାର କରାଯାଇଛି।

ସେ ଏହା ମଧ୍ୟ ଉଲ୍ଲେଖ କରିଥିଲେ ଯେ ଏମ୍ସର ସ୍ପେଶାଲିଟି ଏବଂ ସୁପର ସ୍ପେଶାଲିଟି ବା ବିଶେଷଜ୍ଞ ସେବା ସହିତ ପ୍ରତିଷ୍ଠାନ ବିଭିନ୍ନ ବିଭାଗରେ ସାମଗ୍ରିକ ସ୍ୱାସ୍ଥ୍ୟସେବା ପ୍ରଦାନ କରିଆସୁଛି। ଶିକ୍ଷାଦାନ, ଗବେଷଣା କିମ୍ବା ସ୍ୱାସ୍ଥ୍ୟସେବା ହେଉ, ଏମ୍ସ ଭୁବନେଶ୍ୱର ପ୍ରତ୍ୟେକ କ୍ଷେତ୍ରରେ ଗୌରବ ଅର୍ଜନ କରିଛି। ବିଶ୍ୱ ସ୍ୱାସ୍ଥ୍ୟ ସଂଗଠନ (ଡବ୍ଲୁଏଚଓ) ମଧ୍ୟ ଶଲ୍ୟ ଚିକିତ୍ସା ଉପକରଣ ଏବଂ ପ୍ରତିରୋପଣ ପୁନଃପ୍ରକ୍ରିୟାକରଣରେ ଉଚ୍ଚ ମାନ ବଜାୟ ରଖିବା ପାଇଁ ଏସିଆ ସେଫ୍ ସର୍ଜିକାଲ୍ ଇମ୍ପ୍ଲାଣ୍ଟ କନସୋର୍ଟିୟମ୍ (ଏଏସଏସଆଇସି) ଗୁଣବତ୍ତା ଉନ୍ନତି କାର୍ଯ୍ୟକ୍ରମ (କ୍ୟୁଆଇପି) ପୁରସ୍କାର ସହିତ ଏମ୍ସ ଭୁବନେଶ୍ୱରର ଉତ୍କର୍ଷତାକୁ ସ୍ୱୀକୃତି ଦେଇଛି। ପ୍ରତିଷ୍ଠାନ ଲଗାତାର ପାଞ୍ଚ ବର୍ଷ ଧରି ଅସାଧାରଣ ସ୍ୱଚ୍ଛତା ଏବଂ ଅନ୍ୟ ହସ୍ପିଟାଲ ସେବା ପାଇଁ ଜାତୀୟ କାୟାକଳ୍ପ ପୁରସ୍କାର ମଧ୍ୟ ପାଇଛି ବୋଲି ଶ୍ରୀମତୀ ମୁର୍ମୁ କହିଥିଲେ।

ଭୁବନେଶ୍ୱର ଏମ୍ସର ଅଧ୍ୟାପକ ଏବଂ ଛାତ୍ରଛାତ୍ରୀଙ୍କୁ ପ୍ରଶଂସା କରି ଶ୍ରୀମତୀ ମୁର୍ମୁ କହିଥିଲେ ଯେ, ପ୍ରତିଷ୍ଠାନରେ ଗୁଣାତ୍ମକ ଗବେଷଣାରେ ମଧ୍ୟ ଉତ୍କର୍ଷତା ପ୍ରଦର୍ଶନ କରାଯାଇଛି। ଏଠାକାର ଅନେକ ଡାକ୍ତର ଚିକିତ୍ସା ମାଧ୍ୟମରେ ସମାଜ ସେବାରେ ନିୟୋଜିତ ଅଛନ୍ତି। ସେ ଡାକ୍ତରମାନଙ୍କୁ ଈଶ୍ୱରଙ୍କ ପ୍ରତିନିଧି ରୂପେ ଅଭିହିତ କରିବା ସହିତ ଉତ୍ତୀର୍ଣ୍ଣ ଛାତ୍ରଛାତ୍ରୀମାନଙ୍କୁ ସମାଜ କଲ୍ୟାଣରେ ଯୋଗଦାନ ଦେବାକୁ ଆହ୍ୱାନ କରିଥିଲେ। ସେମାନେ ନିଜ ନିଜ କ୍ଷେତ୍ରରେ ଉତ୍କର୍ଷ ହାସଲ କରିବେ ବୋଲି ରାଷ୍ଟ୍ରପତି ଆଶା ବ୍ୟକ୍ତ କରିଥିଲେ।

ଓଡ଼ିଶାର ରାଜ୍ୟପାଳ ଶ୍ରୀ ହରି ବାବୁ କମ୍ଭମପାଟି ତାଙ୍କ ଅଭିଭାଷଣରେ କହିଥିଲେ, ‘‘ଦେଶସାରା ଏମ୍ସ ଭଳି ଅନୁଷ୍ଠାନ ପ୍ରତିଷ୍ଠା ଜରିଆରେ ଏକ ସମାନ ଏବଂ ସୁଲଭ ସ୍ୱାସ୍ଥ୍ୟସେବା ବ୍ୟବସ୍ଥା ଯୋଗାଇ ଦେବା ଏକ ଦୂରଦୃଷ୍ଟିପୂର୍ଣ୍ଣ ପଦକ୍ଷେପ ଥିଲା। ଏହାଫଳରେ ଗୁଣାତ୍ମକ ଚିକିତ୍ସା ପ୍ରତ୍ୟେକଙ୍କ ପାଖରେ ସେମାନଙ୍କ ସ୍ଥାନ ଏବଂ ଆର୍ଥିକ ସ୍ଥିତି ନିର୍ବିଶେଷରେ ପହଞ୍ଚିପାରୁଛି । ଏମ୍ସ ଭୁବନେଶ୍ୱର ଏହାକୁ ବାସ୍ତବତାରେ ପରିଣତ କରିବାରେ ଏକ ଅଗ୍ରଣୀ ଭୂମିକା ଗ୍ରହଣ କରିଛି। ସେ ଏହା ମଧ୍ୟ କହିଛନ୍ତି ଯେ ଏମ୍ସ ଭୁବନେଶ୍ୱର ଜାତୀୟ ସ୍ତରରେ ପ୍ରସିଦ୍ଧି ହାସଲ କରିଛି ଏବଂ ଏମ୍ସ ନୂଆଦିଲ୍ଲୀ ପରେ ଦ୍ୱିତୀୟ ସ୍ଥାନରେ ଅଛି। ଏହା ପୂର୍ବ ଭାରତରେ ଡାକ୍ତରୀ ଶିକ୍ଷା, ଗବେଷଣା ଏବଂ ରୋଗୀ ସେବା ପାଇଁ ଏକ ଆଦର୍ଶ ପାଲଟିଛି।

ସେ ଆହୁରି ମଧ୍ୟ କହିଛନ୍ତି, କରୋନା ମହାମାରୀ ସମୟରେ ଏମ୍ସ ଭୁବନେଶ୍ୱର ପରୀକ୍ଷା, ଚିକିତ୍ସା, ଟିକାକରଣ ଏବଂ ଜନସଚେତନତାର ଏକ କେନ୍ଦ୍ର ଭାବରେ କାର୍ଯ୍ୟ କରିଥିଲା। ଏହା ଚିକିତ୍ସା ଉତ୍କର୍ଷତା ଏବଂ ପ୍ରତିଷ୍ଠାନ ଦ୍ୱାରା ପୂରଣ କରାଯାଇଥିବା ସାମାଜିକ ଦାୟିତ୍ୱକୁ ଦର୍ଶାଏ। ସେ ତାଙ୍କ ବକ୍ତବ୍ୟ ଶେଷରେ କହିଥିଲେ, ଏମ୍ସ ଭୁବନେଶ୍ୱର କେବଳ ଏକ ପ୍ରତିଷ୍ଠାନ ନୁହେଁ, ବରଂ ସେବା, ନବସୃଜନ ଏବଂ ବିଶ୍ୱାସର ଏକ ଐତିହ୍ୟ।

ଏହି ଅବସରରେ ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ କହିଥିଲେ, ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟିସମ୍ପନ୍ନ ଏବଂ ଗତିଶୀଳ ନେତୃତ୍ୱରେ, ଏମ୍ସ ଭୁବନେଶ୍ୱରର ବିକାଶ ବହୁଗୁଣିତ ହୋଇଛି। ପ୍ରଧାନମନ୍ତ୍ରୀ ସ୍ୱାସ୍ଥ୍ୟସେବା ସେବାର ଡିଜିଟାଲ ରୂପାନ୍ତରଣ ଏବଂ ଆଧୁନିକୀକରଣ ଉପରେ ଗୁରୁତ୍ୱ ଦେଇଛନ୍ତି। ଏମ୍ସ ଭୁବନେଶ୍ୱରରେ ଇ-ପେମେଣ୍ଟ ସୁବିଧା ଭଳି ପଦକ୍ଷେପ ପ୍ରଧାନମନ୍ତ୍ରୀଙ୍କ ଡିଜିଟାଲ ଇଣ୍ଡିଆର ଦୃଷ୍ଟିକୋଣ ସହିତ ସମନ୍ୱିତ। ଏହା ଜନସାଧାରଣଙ୍କ ପାଇଁ ସ୍ୱାସ୍ଥ୍ୟସେବା ଅଧିକ ସୁଗମ ଏବଂ ଦକ୍ଷ କରିଛି।

ସେ ଏହା ମଧ୍ୟ କହିଛନ୍ତି, ସିକଲ୍ ସେଲ୍ ଆନିମିଆ ଭଳି ରୋଗର ନିରାକରଣ ଉପରେ ପ୍ରଧାନମନ୍ତ୍ରୀ ଗୁରୁତ୍ୱ ଦେଇଛନ୍ତି । ଏମ୍ସ ଭୁବନେଶ୍ୱରକୁ ଉତ୍କର୍ଷ କେନ୍ଦ୍ର ଭାବରେ ମାନ୍ୟତା, ପ୍ରତିଷ୍ଠାନକୁ ପ୍ରଦାନ କରାଯାଇଥିବା ଗୁରୁତ୍ୱକୁ ପ୍ରତିଫଳିତ କରେ। ଅଳ୍ପ ସମୟ ମଧ୍ୟରେ, ଏମ୍ସ ଭୁବନେଶ୍ୱର ଉତ୍କର୍ଷତା, ଶିକ୍ଷା ଏବଂ ସ୍ୱାସ୍ଥ୍ୟସେବାର ଆଦର୍ଶ ଅନୁଷ୍ଠାନ ପାଲଟିଛି। ଏହାର ଅଧ୍ୟାପକ ଏବଂ ଛାତ୍ରଛାତ୍ରୀଙ୍କ ଦୃଷ୍ଟିକୋଣ, ସମର୍ପଣ ଏବଂ ପ୍ରତିବଦ୍ଧତା ଯୋଗୁଁ, ଏହା ଚିକିତ୍ସା ଶିକ୍ଷା ଏବଂ ଗବେଷଣା ପାଇଁ ଏକ ଅଗ୍ରଣୀ ପ୍ରତିଷ୍ଠାନ ପାଲଟିଛି। ଏହି ପ୍ରତିଷ୍ଠାନ କେବଳ ଓଡ଼ିଶାର ନୁହେଁ, ବରଂ ସମଗ୍ର ଦେଶର ଗର୍ବ।

ଡାକ୍ତରୀ ଛାତ୍ରଛାତ୍ରୀଙ୍କୁ ସମ୍ବୋଧିତ କରି ଶ୍ରୀ ମାଝୀ କହିଥିଲେ, ସ୍ୱାସ୍ଥ୍ୟସେବା କ୍ଷେତ୍ରରେ ଦେଖାଯାଉଥିବା ଆହ୍ୱାନର ମୁକାବିଲା କରିବା ପାଇଁ ବିଶ୍ୱକୁ ଆପଣଙ୍କ ଜ୍ଞାନ, କରୁଣା ଏବଂ ସାଧୁତାର ପୂର୍ବ ଅପେକ୍ଷା ଅଧିକ ଆବଶ୍ୟକତା ଅଛି। ସହାନୁଭୂତି ସହିତ ସ୍ୱାସ୍ଥ୍ୟସେବା ଯୋଗାଇ ଦେବା ପାଇଁ ମୁଖ୍ୟମନ୍ତ୍ରୀ ଡାକ୍ତରୀ ଛାତ୍ରଛାତ୍ରୀଙ୍କୁ ଅନୁରୋଧ କରିଥିଲେ। ସେ ଭିତ୍ତିଭୂମିକୁ ସୁଦୃଢ଼ କରିବା ସହିତ ଗୁଣାତ୍ମକ ସ୍ୱାସ୍ଥ୍ୟସେବା ସୁନିଶ୍ଚିତ କରିବା ପାଇଁ ସରକାରଙ୍କ ପ୍ରତିବଦ୍ଧତାକୁ ମଧ୍ୟ ବ୍ୟକ୍ତ କରିଥିଲେ । ରାଜ୍ୟରେ ଆୟୁଷ୍ମାନ ଭାରତ ସହିତ ଗୋପବନ୍ଧୁ ଜନ ଆରୋଗ୍ୟ ଯୋଜନା କାର୍ଯ୍ୟକାରୀ ହୋଇଥିବା ମୁଖ୍ୟମନ୍ତ୍ରୀ ସୂଚନା ଦେଇଥିଲେ । ସେ କହିଥିଲେ ରାଜ୍ୟର ସାଢ଼େ ୩ କୋଟିରୁ ଅଧିକ ଲୋକଙ୍କ ସମେତ ବରିଷ୍ଠ ନାଗରିକମାନଙ୍କ ସ୍ୱାସ୍ଥ୍ୟସେବା ଯୋଗାଇବା ଉପରେ ବିଶେଷ ଗୁରୁତ୍ୱ ଦିଆଯାଇଛି। ସେ ପରବର୍ତ୍ତୀ ପିଢ଼ିର ସ୍ୱାସ୍ଥ୍ୟସେବା ନେତୃତ୍ୱ ଏବଂ ପରିବାରକୁ ସମର୍ଥନ କରିବା ପାଇଁ ଅଧ୍ୟାପକ ଏବଂ କର୍ମଚାରୀମାନଙ୍କୁ ଧନ୍ୟବାଦ ଜଣାଇଥିଲେ।

ସ୍ୱାସ୍ଥ୍ୟ ପାଇଁ ପ୍ରଧାନମନ୍ତ୍ରୀଙ୍କ ଦୃଷ୍ଟିକୋଣକୁ ଉଦ୍ଧୃତ କରି କେନ୍ଦ୍ର ଶିକ୍ଷା ମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନ କହିଥିଲେ, ଉତ୍ତମ ସ୍ୱାସ୍ଥ୍ୟ ହେଉଛି ମାନବ ପ୍ରଗତି ଏବଂ ସମୃଦ୍ଧିର ମୂଳଦୁଆ। ଏଥିପାଇଁ କୌଣସି ସର୍ଟକଟ ନାହିଁ। ଆଜି, ବିପର୍ଯ୍ୟସ୍ତ ପ୍ରଯୁକ୍ତିବିଦ୍ୟା, ପରିବର୍ତ୍ତିତ ଭୂ-ରାଜନୈତିକ ସ୍ଥିତି ଏବଂ ନୂତନ ଆକାଂକ୍ଷାର ଯୁଗରେ, ସ୍ୱାସ୍ଥ୍ୟ ଆମ ସମାଜର ପ୍ରମୁଖ କ୍ଷେତ୍ର ମଧ୍ୟରୁ ଅନ୍ୟତମ। ସେ ଏହା ମଧ୍ୟ କହିଥିଲେ ଯେ, ପ୍ରଧାନମନ୍ତ୍ରୀ ୨୦୪୭ ସୁଦ୍ଧା ଭାରତକୁ ଏକ ବିକଶିତ ଦେଶ କରିବା ପାଇଁ ଏକ ସ୍ପଷ୍ଟ ଆହ୍ୱାନ ଦେଇଛନ୍ତି । ଏଥିରେ ଯୋଗଦାନ ଦେବା ସହିତ ଓଡ଼ିଶା ୨୦୩୬ ସୁଦ୍ଧା ଏକ ବିକଶିତ ରାଜ୍ୟ ହେବାକୁ ଆକାଂକ୍ଷା ପୋଷଣ କରୁଛି।

ଏମ୍ସ ଭୁବନେଶ୍ୱରର ସଫଳତା ଉପରେ ଆଲୋକପାତ କରି କେନ୍ଦ୍ର ମନ୍ତ୍ରୀ କହିଥିଲେ, ସାମଗ୍ରିକ ଏନଆଇଆରଏଫ ରାଙ୍କିଂରେ ଏହି ଅନୁଷ୍ଠାନ ପଞ୍ଚଦଶ ସ୍ଥାନ ହାସଲ କରିଛି । ମେଡିକାଲ କଲେଜ ମଧ୍ୟରେ ଦ୍ୱାଦଶ ଏବଂ ଉଦୀୟମାନ ଏମ୍ସ ମଧ୍ୟରେ ଦ୍ୱିତୀୟ ସ୍ଥାନ ପାଇଛି। ଶ୍ରୀ ପ୍ରଧାନ ଆହୁରି କହିଥିଲେ, ଭୁବନେଶ୍ୱର ବିଶ୍ୱ ପାଇଁ ଏକ ନୂତନ ଯୁଗର ମେଡଟେକ୍ କେନ୍ଦ୍ର ହେବା ପାଇଁ ଏକ ଉପଯୁକ୍ତ ପ୍ରାର୍ଥୀ। ସେ ଓଡ଼ିଶାରେ ଦୁର୍ବଳ ବର୍ଗର ଲୋକଙ୍କ ଦ୍ୱାରା ସମ୍ମୁଖୀନ ହେଉଥିବା ସ୍ୱାସ୍ଥ୍ୟଗତ ଆହ୍ୱାନ ବିଷୟରେ ମଧ୍ୟ ଉଲ୍ଲେଖ କରିଥିଲେ। ଏଠାରୁ ଉତ୍ତୀର୍ଣ୍ଣ ହେଉଥିବା ଡାକ୍ତରୀ ଛାତ୍ରଛାତ୍ରୀଙ୍କୁ ଏହି ଆହ୍ୱାନଗୁଡ଼ିକର ସମାଧାନ ଖୋଜିବା ଏବଂ ସମାଜରେ ସ୍ୱାସ୍ଥ୍ୟ ଅଧିକାର ସୁନିଶ୍ଚିତ କରିବା ପାଇଁ ଦାୟିତ୍ୱ ନେବାକୁ କେନ୍ଦ୍ର ମନ୍ତ୍ରୀ ଅନୁରୋଧ କରିଥିଲେ।

ସମାବର୍ତ୍ତନ ଉତ୍ସବରେ, ମୋଟ ୬୪୩ ଜଣ ଛାତ୍ରଛାତ୍ରୀଙ୍କୁ ଡିଗ୍ରୀ ପ୍ରଦାନ କରାଯାଇଥିଲା। ଏମାନଙ୍କ ମଧ୍ୟରୁ ୧୯୬ ଜଣ ଏମବିବିଏସ ଡିଗ୍ରୀ, ୧୫୮ ଜଣ ଏମଏସ, ୪୯ ଜଣ ଏମଡି, ୧୧୬ ଜଣ ପୋଷ୍ଟ-ଡକ୍ଟରାଲ ଫେଲୋ, ୬୨ ଜଣ ବିଏସସି ନର୍ସିଂ ଏବଂ ୪୧ ଜଣ ଏମଏସସି ନର୍ସିଂ ଡିଗ୍ରୀଧାରୀ ଅଛନ୍ତି । ଏମ୍ସ ଭୁବନେଶ୍ୱରର ବିଭିନ୍ନ ବିଭାଗରେ କୃତିତ୍ୱ ହାସଲ କରିଥିବା ୫୯ ଜଣ କୃତୀ ଛାତ୍ରଛାତ୍ରୀଙ୍କୁ ସ୍ୱର୍ଣ୍ଣ ପଦକ ପ୍ରଦାନ କରାଯାଇଥିଲା।

ଭୁବନେଶ୍ୱର ଏମ୍ସର ଅଧ୍ୟକ୍ଷ ପ୍ରଫେସର୍‌ ଡାକ୍ତର ଶୈଳେଶ କୁମାର, କାର୍ଯ୍ୟନିର୍ବାହୀ ନିର୍ଦ୍ଦେଶକ ତଥା ସିଇଓ ଡାକ୍ତର ଆଶୁତୋଷ ବିଶ୍ୱାସଙ୍କ ସମେତ ଅନ୍ୟ ଅଧ୍ୟାପକ ଅଧ୍ୟାପିକାଗଣ, ଛାତ୍ରଛାତ୍ରୀ ଓ କର୍ମଚାରୀ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ।

*****

PS