কেন্দ্ৰীয় কয়লা আৰু খনি মন্ত্ৰী শ্ৰী জি কিষাণ ৰেড্ডীয়ে গুৱাহাটীত অনুষ্ঠিত দ্বিতীয় উত্তৰ-পূব খনি মন্ত্ৰী সন্মিলনত খনিজ আৰু কয়লা সমৃদ্ধ উত্তৰ-পূৰ্বাঞ্চলৰ ৰাজ্যসমূহলৈ ভাৰত চৰকাৰৰ সম্পূৰ্ণ সমৰ্থন পুনৰ দৃঢ় কৰে। অনুষ্ঠানৰ দ্বিতীয় দিনা সভাত ভাষণ প্ৰদান কৰি মন্ত্ৰীগৰাকীয়ে খননৰ আন্তঃগাঁথনি শক্তিশালী কৰা, প্ৰকল্পৰ অনুমোদন দ্ৰুতগতিত কৰা আৰু অঞ্চলটোত বহনক্ষম খনন পদ্ধতিক প্ৰসাৰিত কৰাৰ বাবে কেন্দ্ৰৰ প্ৰতিশ্ৰুতি সম্পৰ্কে আলোকপাত কৰে।

তেওঁ উল্লেখ কৰে যে উত্তৰ-পূৰ্বাঞ্চলৰ উন্নয়ন ২০৪৭ৰ বিকশিত ভাৰতৰ দৃষ্টিভংগীৰ মুল বিষয়, য’ত আঠখন ৰাজ্য ক্ৰমে অসম, অৰুণাচলপ্ৰদেশ, মণিপুৰ, মেঘালয়, মিজোৰাম, নাগালেণ্ড, ত্ৰিপুৰা আৰু ছিকিমক সঠিকভাৱে অষ্টলক্ষ্মী হিচাপে উদযাপন কৰা হয়। কেন্দ্ৰীয় মন্ত্ৰীগৰাকীয়ে আলোকপাত কৰে যে কেন্দ্ৰ-ৰাজ্যৰ সমন্বয় বৃদ্ধি কৰাটো নিয়োগ সৃষ্টি, বিনিয়োগ আকৰ্ষণ কৰা আৰু খনিজ আৰু কয়লা খণ্ডৰ উন্নয়নৰ জৰিয়তে সৰ্বাংগীন অৰ্থনৈতিক বিকাশৰ মূল চাবিকাঠি।

সন্মিলনত উত্তৰ-পূৰ্বাঞ্চলৰ আঠখন ৰাজ্যৰ প্ৰতিনিধিয়ে খনন আৰু কয়লা খণ্ডক আগুৱাই নিয়াৰ বাবে তেওঁলোকৰ ৰোডমেপ দাঙি ধৰে। মেঘালয়, অসম, অৰুণাচলপ্ৰদেশ আৰু ছিকিমৰ মন্ত্ৰীসকলে নাগালেণ্ডৰ মুখ্যমন্ত্ৰীৰ উপদেষ্টাগৰাকীৰ লগতে ৰাজ্যভিত্তিক কৌশল, কৃতিত্ব আৰু ভৱিষ্যতৰ পৰিকল্পনাৰ ৰূপৰেখা দাঙি ধৰে। তেওঁলোকে ব্লক নিলাম, গুৰুত্বপূৰ্ণ খনিজ পদাৰ্থৰ অন্বেষণ, কয়লা খনিৰ পুনৰুজ্জীৱিতকৰণ, সৰু সৰু খনিজ পদাৰ্থৰ বিকাশ সাধন আৰু বহনক্ষম খনিজ আৰ্হি গ্ৰহণৰ অগ্ৰগতিৰ শ্বেয়াৰ কৰে।

আলোচনাসমূহে অৰ্থনৈতিক বৃদ্ধিৰ সৈতে পৰিৱেশ সুৰক্ষাৰ মাজত ভাৰসাম্য ৰক্ষাৰ এক উমৈহতীয়া প্ৰতিশ্ৰুতি প্ৰতিফলিত কৰে। ৰাজ্যসমূহে আঞ্চলিক প্ৰত্যাহ্বানসমূহ অতিক্ৰম কৰিবলৈ আৰু তেওঁলোকৰ সম্পূৰ্ণ সম্পদৰ সম্ভাৱনা উপলব্ধি কৰিবলৈ অধিক কেন্দ্ৰীয় সহায়ৰ আহ্বান জনায়।

কনক্লেভত ভাষণ দি খনি মন্ত্ৰালয়ৰ অতিৰিক্ত সচিব শ্ৰী সঞ্জয় লোহিয়াই সমগ্ৰ দেশতে অন্বেষণৰ প্ৰচেষ্টা যথেষ্ট বৃদ্ধি কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে। তেওঁ ভাৰতীয় ভূতাত্ত্বিক জৰীপ (জিএছআই), খনিজ অন্বেষণ নিগম লিমিটেড (এমইচিএল) আৰু ৰাজ্য চৰকাৰসমূহক ঘনিষ্ঠ সমন্বয়ৰে কাম কৰিবলৈ আৰু বিশেষকৈ জটিল আৰু কৌশলগত খনিজসমূহৰ বাবে আধুনিক, লক্ষ্য নিৰ্ধাৰণ আৰু সময়ভিত্তিক অন্বেষণ পদ্ধতি গ্ৰহণ কৰিবলৈ আহ্বান জনায়।

তেওঁ লগতে কয় যে ভাৰত চৰকাৰে অন্বেষণৰ কাম-কাজ বৃদ্ধিৰ বাবে অভূতপূৰ্ব নীতি আৰু বাজেটৰ সহায় আগবঢ়াইছে আৰু এতিয়া সেই গতিবেগক তৃণমূল পৰ্যায়ত কাৰ্য্যত পৰিণত কৰাৰ সময়।

সন্মিলনৰ সমান্তৰালভাৱে কেন্দ্ৰীয় মন্ত্ৰী শ্ৰী জি কিষাণ ৰেড্ডীয়ে গুৱাহাটীত ভাৰতীয় খনি ব্যুৰো (আই বি এম)ৰ নতুন আঞ্চলিক কাৰ্যালয়ো উদ্বোধন কৰে। সন্মিলনত অসমৰ খনি মন্ত্ৰী শ্ৰী কৌশিক ৰায়, আই বি এমৰ মহানিয়ন্ত্ৰক শ্ৰী পিয়ুষ শৰ্মা, খনি মন্ত্ৰালয়ৰ সচিব শ্ৰী ভি এল কান্থা ৰাও,  খনি মন্ত্ৰালয়ৰ অতিৰিক্ত সচিব শ্ৰী সঞ্জয় লোহিয়াৰ লগতে কেন্দ্ৰীয় আৰু ৰাজ্য চৰকাৰৰ জ্যেষ্ঠ বিষয়াসকল উপস্থিত থাকে। উত্তৰ-পূৰ্বাঞ্চলৰ খনন খণ্ডৰ বাবে নিয়ন্ত্ৰণমূলক তদাৰকী, কাৰিকৰী সহায় আৰু সুবিধা প্ৰদান সেৱা শক্তিশালী কৰাত আই বি এমৰ নতুন কাৰ্যালয়ে গুৰুত্বপূৰ্ণ ভূমিকা গ্ৰহণ কৰিব বুলি আশা কৰা হৈছে।

দুদিনীয়া এই সন্মিলনে প্ৰধানমন্ত্ৰী শ্ৰী নৰেন্দ্ৰ মোদীৰ দৃষ্টিভংগীৰ অধীনত বহনক্ষম উন্নয়ন, শক্তি সুৰক্ষা আৰু অৰ্থনৈতিক পৰিৱৰ্তনৰ ৰাষ্ট্ৰীয় কাৰ্যসূচীৰ সৈতে আঞ্চলিক খনন কৌশলসমূহ একত্ৰিত কৰাৰ এক গুৰুত্বপূৰ্ণ মঞ্চ হিচাপে কাম কৰে।

****

Shuhaib T/DB