زراعت اور کسانوں کی بہبود اور دیہی ترقی کے مرکزی وزیر جناب شیوراج سنگھ چوہان نے آج نئی دلی میں ایک میٹنگ کی اور امدادی قیمت اسکیم (پی ایس ایس) کے تحت مدھیہ پردیش میں مونگ اور اڑد اور اتر پردیش میں اڑد کی خریداری کو منظوری دی ۔ انہوں نے متعلقہ ریاستی وزرائے زراعت کے ساتھ خریداری لاجسٹکس پر بھی تبادلہ خیال کیا اور نیفیڈ ، این سی سی ایف اور ریاستی عہدیداروں کو ضروری ہدایات دیں ۔

مدھیہ پردیش حکومت کی طرف سے موصولہ تجویز اور اس کے بعد وزارت کی طرف سے غور و خوض کے بعد ، مرکزی وزیر جناب شیوراج سنگھ نے ریاست میں پی ایس ایس کے تحت موسم گرما کی دال مونگ اور اڑد کی خریداری کے لیے منظوری دے دی ۔

اسی طرح اتر پردیش میں پی ایس ایس کے تحت اڑد کی خریداری کے لیے منظوری دی گئی ہے ۔

میٹنگ کے دوران ، جناب شیوراج سنگھ نے کہا کہ اگرچہ مونگ اور اڑد کی خریداری کے فیصلے سے مرکزی حکومت پر کافی مالی بوجھ پڑے گا ، لیکن وزیر اعظم جناب نریندر مودی کی قیادت میں حکومت ،  کسانوں کو مطلوبہ فوائد حاصل کرنے کو یقینی بنانے کے لیے پرعزم ہے ۔ انہوں نے زور دے کر کہا کہ خریداری کے عمل کو مناسب طریقے سے انجام دینا بہت ضروری ہے ۔ کسانوں سے براہ راست خریداری سے بچولیوں کا اثر کم ہوگا اور اس بات کو یقینی بنایا جائے گا کہ اصل فائدہ کسانوں تک پہنچے ۔

عہدیداروں کو ہدایات دیتے ہوئے  انہوں نے کسانوں کے مناسب رجسٹریشن کے لیے جدید ترین اور موثر ترین ٹیکنالوجی کے استعمال پر زور دیا ۔ انہوں نے ضرورت پڑنے پر خریداری مراکز کی تعداد بڑھانے اور پورے عمل کو منصفانہ اور شفاف طریقے سے انجام دینے کو یقینی بنانے کا مشورہ دیا ۔

اناج ذخیرہ کرنے میں بے ضابطگیوں کی شکایات پر تشویش کا اظہار کرتے ہوئے جناب شیوراج سنگھ چوہان نے وزرا اور عہدیداروں پر زور دیا کہ وہ اس مسئلے کو حل کرنے کے لیے ٹھوس اقدامات کریں ۔ انہوں نے اتر پردیش کے وزیر زراعت کو یقین دلایا کہ مرکزی حکومت کسانوں کے بہترین مفاد میں ہر ممکن کوشش کرے گی ۔

میٹنگ میں مدھیہ پردیش کے کسانوں کی بہبود اور زراعت کی ترقی کے وزیر جناب ایدل سنگھ کنسانہ ، اتر پردیش کے وزیر زراعت جناب سوریا پرتاپ شاہی،  مرکزی سکریٹری زراعت جناب دیویش چترویدی اور دیگر سینئر عہدیداروں نے شرکت کی ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 (ش ح – ا ع خ-ت ح)

U. No. 2102