انڈین کوسٹ گارڈ (آئی سی جی) نے 11 جون، 2025 کو بچاؤ ٹیم کے پانچ ارکان اور ہوائی عملے کے ایک غوطہ خورکو سنگا پور کے کنٹینر کے جلتے ہوئے جہازایم وی وان ہائی 503 پر چڑھایا تاکہ ٹوئنگ آپریشن میں آسانی ہو۔ 09 جون 2025 کو کیرالہ کے ساحل پر آگ لگنے والا جہاز، کیرالہ کے بی پور سے تقریباً 42 سمندری میل کے فاصلے پر بھارت کے خصوصی اقتصادی زون (ای ای زیڈ) کے اندر جنوب مشرق کی طرف بڑھتا چلا جارہا ہے۔

یہ جہاز 2,128 میٹرک ٹن ایندھن اور سینکڑوں کنٹینرز لے کر جا رہا ہے، جن میں خطرناک کارگو بھی شامل ہے، جو سمندری ماحول اور علاقائی جہاز رانی کے راستوں کے لیے سنگین خطرہ ہے۔ آئی سی جی کی جانب سے آگ بجھانے کی شدید کوششوں نے نمایاں طور پر نظر آنے والے شعلوں کو کم کر دیا ہے، اب صرف کارگو ہولڈز اور خلیجوں میں دھواں نظر آ رہا ہے۔ تاہم، آگ اندرونی ڈیکوں اور قریب کے ایندھن کے ٹینکوں میں سرگرم  دکھائی دے رہی ہے۔

پانچ آئی سی جی جہاز، دو ڈورنیئر طیارے، اور ایک ہیلی کاپٹر آگ بجھانے کے جاری مشن میں مصروف ہیں، جن کی مدد ڈائریکٹوریٹ جنرل آف شپنگ کے دو جہاز کر رہے ہیں۔ جہاز کے مالکان کی طرف سے مقرر کردہ ایک بچاؤ ٹیم آئی سی جی کے ساتھ مل کر کام کر رہی ہے اور ہندوستانی فضائیہ سے اضافی فضائی مدد کی درخواست کی گئی ہے۔

آگ کو مکمل طور پر بجھانے کے بعدممکنہ ماحولیاتی تباہی کو روکنے کے لیے ایک ٹاور لائن قائم کرنے اور جہاز کو ساحل سے دور کھینچنے کی کوششیں جاری ہیں۔ صورتحال بدستور نازک ہے اور مسلسل نگرانی کی جا رہی ہے۔

************

ش ح۔ ش ت  ۔ اش ق  

 (U: 1694)