ಎಲ್ಲರಿಗೂ ನನ್ನ ನಮಸ್ಕಾರಗಳು,

ಬೆಂಗಳೂರಿನ ಬಿಲ್ಡರ್ ಗಳು ಮತ್ತು ಉದ್ಯಮಿಗಳ ಈ ಸಮಾವೇಶವು ನಿಜಕ್ಕೂ ಬಹಳ ಮುಖ್ಯವಾದದ್ದು. ಜನಸಂಖ್ಯೆಯ ಪರಿಸ್ಥಿತಿ ಮತ್ತು ಆರ್ಥಿಕ ಪ್ರಗತಿಯ ವಿಷಯದಲ್ಲಿ ಮುಂಬೈ, ದೆಹಲಿ, ಬೆಂಗಳೂರು ದೇಶದಲ್ಲಿ ಮೊದಲ ಮೂರು ಸ್ಥಾನಗಳಲ್ಲಿವೆ. ಪ್ರಾರಂಭದಲ್ಲಿ, ದುರದೃಷ್ಟಕರ ಘಟನೆಗೆ ನನ್ನ ಸಂತಾಪವನ್ನು ವ್ಯಕ್ತಪಡಿಸಲು ಬಯಸುತ್ತೇನೆ, ಮೃತರ ಕುಟುಂಬಕ್ಕೆ ಸಂತಾಪ ಮತ್ತು ಗಾಯಗೊಂಡವರು ಶೀಘ್ರವಾಗಿ ಗುಣಮುಖರಾಗಲಿ ಎಂದು ನಾನು ಹಾರೈಸುತ್ತೇನೆ.

ಗಣ್ಯ ಪ್ರೇಕ್ಷಕರೇ, ಪಹಲ್ಗಾಮ್ ನಲ್ಲಿ ರಾಷ್ಟ್ರವು ದೊಡ್ಡ ದುರಂತವನ್ನು ಎದುರಿಸಿತು. ಅಲ್ಲಿ ಅಮಾನವೀಯತೆ, ಬರ್ಬರತೆ ಮತ್ತು ಉದ್ದೇಶಪೂರ್ವಕ ಹತ್ಯೆಗಳು ನಡೆದವು. ಭಾರತದ ಸಾಮರ್ಥ್ಯಕ್ಕೆ ಸವಾಲು ಹಾಕಲಾಯಿತು, ನಮ್ಮ ನಾಗರಿಕತೆಯ ಮೇಲೆ ಒತ್ತಡ ಹೇರಲಾಯಿತು. ಆದರೆ ಇದು ನಮ್ಮ ಸಶಸ್ತ್ರ ಪಡೆಗಳಿಗೆ ಗೌರವ ಸಲ್ಲಿಸುವ ಸಮಯ. ಅವರು ದೃಢವಾಗಿ ದಾಳಿ ಮಾಡಿದರು ಮತ್ತು ಜಾಗತಿಕವಾಗಿ ಪ್ರಶಂಸೆ ಪಡೆದರು. ಆಪರೇಷನ್ ಸಿಂಧೂರ್ ತನ್ನ ಉದ್ದೇಶವನ್ನು ನಿಖರತೆ, ನಿರ್ದಿಷ್ಟತೆ ಮತ್ತು ಗುರಿಯಿಟ್ಟು ನಾಶಪಡಿಸುವ ಮೂಲಕ ಯಶಸ್ವಿಯಾಗಿ ಪೂರೈಸಿತು.

ಮುರಿದ್ಕೆ ಮತ್ತು ಬಹಾವಲ್ಪುರ್ ನಮ್ಮ ಸಶಸ್ತ್ರ ಪಡೆಗಳ ಶಕ್ತಿಗೆ ಸಾಕ್ಷಿಯಾಗಿವೆ. ಜಗತ್ತಿಗೆ ಯಾವುದೇ ಪುರಾವೆಯ ಅಗತ್ಯವಿಲ್ಲ. ಏಕೆಂದರೆ, ಆ ದೇಶದ ಮಿಲಿಟರಿ ಅಧಿಕಾರಿಗಳು, ರಾಜಕಾರಣಿಗಳು ಮತ್ತು ಭಯೋತ್ಪಾದಕರು ಶವಪೆಟ್ಟಿಗೆಗಳನ್ನು ಖಬ್ರಿಸ್ತಾನ್ ಗೆ ತೆಗೆದುಕೊಂಡು ಹೋದರು.

ಮಾನವ ಕುಲದ ಆರನೇ ಒಂದು ಭಾಗಕ್ಕೆ ನೆಲೆಯಾಗಿರುವ ಭಾರತವು ಇಡೀ ಜಗತ್ತಿಗೆ ಸ್ಪಷ್ಟ ಸಂದೇಶವನ್ನು ರವಾನಿಸಿದೆ. ಭಾರತವು ಇನ್ನು ಮುಂದೆ ಭಯೋತ್ಪಾದನೆಯನ್ನು ಸಹಿಸುವುದಿಲ್ಲ ಮತ್ತು ಅದಕ್ಕಾಗಿಯೇ ಭಾರತದಲ್ಲಿ ತಯಾರಿಸಲಾದ ನಮ್ಮ ಬ್ರಹ್ಮೋಸ್ನ ಸಾಮರ್ಥ್ಯವನ್ನು ಜೈಶ್-ಎ-ಮೊಹಮ್ಮದ್ ಮತ್ತು ಲಷ್ಕರ್-ಎ-ತೈಬಾ ಕೇಂದ್ರ ಕಚೇರಿಗಳಲ್ಲಿ ಉದ್ದೇಶಿತ ನಾಶದ ಮೂಲಕ ಪ್ರದರ್ಶಿಸಲಾಯಿತು. ನಮ್ಮ ಸಶಸ್ತ್ರ ಪಡೆಗಳ ಶೌರ್ಯಕ್ಕಾಗಿ ನಿಮ್ಮೆಲ್ಲರೊಂದಿಗೆ ನನ್ನ ಕೃತಜ್ಞತೆಯನ್ನು ವ್ಯಕ್ತಪಡಿಸಲು ನನ್ನಲ್ಲಿ ಯಾವುದೇ ಪದಗಳಿಲ್ಲ, ಆದರೆ ಈ ಸಂದರ್ಭದಲ್ಲಿ, ಜನರ ನಡುವೆ ಇರುವುದರಿಂದ, ನನ್ನ ಆಲೋಚನೆಗಳನ್ನು ಹಂಚಿಕೊಳ್ಳಲು ಬಯಸುತ್ತೇನೆ.

ಅದು ಆರ್ಥಿಕತೆಯಾಗಿರಲಿ ಅಥವಾ ರಾಷ್ಟ್ರೀಯ ಭದ್ರತೆಯಾಗಿರಲಿ, ನೀವೆಲ್ಲರೂ ಒಂದು ಮಹತ್ವದ ಪಾತ್ರವನ್ನು ವಹಿಸಬೇಕಿದೆ. ಆ ಪಾತ್ರವು ಬಹಳ ಮುಖ್ಯವಾದದ್ದು ಏಕೆಂದರೆ ಈಗ ಸಾಂಪ್ರದಾಯಿಕ ಯುದ್ಧಗಳ ಕಾಲ ಮುಗಿದಿದೆ. ಯುದ್ಧವನ್ನು ತಾಂತ್ರಿಕ ಸಾಮರ್ಥ್ಯದಿಂದ ಗೆಲ್ಲಬೇಕಾಗುತ್ತದೆ. ಭಾರತದ ತಾಂತ್ರಿಕ ಶಕ್ತಿ, ತಾಂತ್ರಿಕ ಪರಾಕ್ರಮವನ್ನು ವ್ಯಾಖ್ಯಾನಿಸುವ ವಿಷಯಕ್ಕೆ ಬಂದಾಗ, ನಾವು ಬೆಂಗಳೂರನ್ನು ನೆನಪಿಸಿಕೊಳ್ಳಬೇಕು. ಅದರ ಪ್ರತಿಭೆ, ಅದರ ಕೊಡುಗೆ, ಬೆಂಗಳೂರು ಜಗತ್ತಿಗೆ ಅಸೂಯೆ ಹುಟ್ಟಿಸಿದೆ. ಇದು ನಮ್ಮ ಯುವ ಮನಸ್ಸುಗಳು ಅದ್ಭುತಗಳನ್ನು ಮಾಡಿದ ಸ್ಥಳವಾಗಿದೆ.

ಜಾಗತಿಕ ಮಟ್ಟದಲ್ಲಿ ಪ್ರಖ್ಯಾತಿ ಪಡೆದ ಸಂಸ್ಥೆಗಳು ಮತ್ತು ಕಾರ್ಪೊರೇಟ್ ಗಳು ಈ ಸ್ಥಳದಿಂದ ಹುಟ್ಟಿಕೊಂಡಿವೆ. ಆದುದರಿಂದ, ಹಿಂದೆ ದೊಡ್ಡ ಬದಲಾವಣೆಗಳನ್ನು ಉತ್ತೇಜಿಸಿದ ಈ ನಾವೀನ್ಯತೆಯ ಕೇಂದ್ರಕ್ಕೆ ಈಗ ದೊಡ್ಡ ಸವಾಲು ಎದುರಾಗಿದೆ ಎಂದು ನಾನು ಒತ್ತಿ ಹೇಳಬಯಸುತ್ತೇನೆ. ಏಕೆಂದರೆ, ನಾವು ಈಗ ಒಂದು ವಿಭಿನ್ನ ಯುಗದಲ್ಲಿ ಬದುಕುತ್ತಿದ್ದೇವೆ. ವಿನಾಶಕಾರಿ ತಂತ್ರಜ್ಞಾನಗಳು, ಕೃತಕ ಬುದ್ಧಿಮತ್ತೆ, ಇಂಟರ್ನೆಟ್ ಆಫ್ ಥಿಂಗ್ಸ್, ಮಷಿನ್ ಲರ್ನಿಂಗ್, ಮತ್ತು ಬ್ಲಾಕ್ ಚೈನ್ ನಂತಹವುಗಳು ಈಗ ಹೊಸ ರೂಢಿಯಾಗಿವೆ. ಇವುಗಳನ್ನು ಅವಕಾಶಗಳಾಗಿ ಪರಿವರ್ತಿಸಬಹುದಾದ ಸವಾಲುಗಳಾಗಿವೆ. ಇಲ್ಲದಿದ್ದರೆ, ಈ ಸವಾಲುಗಳು ನಮ್ಮ ಆರ್ಥಿಕತೆಗೆ ಹಿತಕರವಾಗಿರುವುದಿಲ್ಲ.

ಆದ್ದರಿಂದ ನಮ್ಮ ಸಂಪನ್ಮೂಲಗಳು, ಮಾನವ ಸಂಪನ್ಮೂಲಗಳು ತಂತ್ರಜ್ಞಾನದ ಬಳಕೆಯಲ್ಲಿ ದೊಡ್ಡ ಬದಲಾವಣೆಯನ್ನು ತರಲು ಸಜ್ಜಾಗುವಂತೆ ಗರಿಷ್ಠ ಪ್ರಯತ್ನಗಳನ್ನು ಮಾಡಬೇಕಾಗಿದೆ. ಮತ್ತು ಇದು ಕಾರ್ಪೊರೇಟ್ ಗಳು, ವ್ಯಾಪಾರ, ವಾಣಿಜ್ಯ ಮತ್ತು ಕೈಗಾರಿಕೆಗಳಿಗೆ ಒಂದು ಸವಾಲಾಗಿದೆ, ನಾವು ಅತ್ಯುನ್ನತ ಮಟ್ಟದ ಸಂಶೋಧನೆಯಲ್ಲಿ ತೊಡಗಿಸಿಕೊಳ್ಳಬೇಕು. ನಮ್ಮ ಸಂಶೋಧನಾ ಸಾಮರ್ಥ್ಯವು ಜಗತ್ತಿನಲ್ಲಿ ಭಾರತ ಎಷ್ಟು ಪ್ರಬಲವಾಗಿರುತ್ತದೆ ಎಂಬುದನ್ನು ನಿರ್ಧರಿಸುತ್ತದೆ. ನಮ್ಮ ತಾಂತ್ರಿಕ ಪ್ರವೇಶ, ನಮ್ಮ ತಾಂತ್ರಿಕ ನಾವೀನ್ಯತೆಯು ನಾವು ಎಷ್ಟು ಸುರಕ್ಷಿತವಾಗಿರುತ್ತೇವೆ ಎಂಬುದನ್ನು ನಿರ್ಧರಿಸುತ್ತದೆ.

ವ್ಯಾಪಾರ-ಉದ್ಯಮದ ಬೆಳವಣಿಗೆಗೆ ಶಾಂತಿಯು ಅಡಿಪಾಯ, ಜನರ ನಡುವಿನ ಸಾಮರಸ್ಯಕ್ಕೆ ಸೌಹಾರ್ದತೆ ಅತ್ಯಗತ್ಯ. ಶಾಂತಿಯೆನ್ನುವುದು ಚೌಕಾಸಿಯ ವಸ್ತುವಲ್ಲ, ಅದು ಶಕ್ತಿಯ ಸ್ಥಾನದಿಂದ ಉದ್ಭವಿಸುತ್ತದೆ. ಅದು ಸಾಮರ್ಥ್ಯದ ಪ್ರತೀಕ. ನಾವು ಯುದ್ಧಕ್ಕೆ ಸದಾ ಸನ್ನದ್ಧರಾಗಿದ್ದಾಗ ಮಾತ್ರವೇ ಅಚಲವಾದ ಶಾಂತಿಯನ್ನು ಸ್ಥಾಪಿಸಲು ಸಾಧ್ಯ. ಒಂದು ಕಾಲವಿತ್ತು, ಆಗ ನಮ್ಮ ಉದ್ಯಮ ಕ್ಷೇತ್ರದ ಪಾತ್ರ ಕೇವಲ ಶಸ್ತ್ರಾಸ್ತ್ರಗಳು ಮತ್ತು ಮಾರಕ ಆಯುಧಗಳ ತಯಾರಿಕೆಗೆ ಸೀಮಿತವಾಗಿತ್ತು. ಆದರೆ ಇಂದು, ಉದ್ಯಮವು ಸಂಪೂರ್ಣವಾಗಿ ಒಂದು ಹೊಸ ಆಯಾಮದಲ್ಲಿ ತನ್ನ ಕೊಡುಗೆಯನ್ನು ನೀಡಬೇಕಿದೆ; ಆ ಹೊಸ ಆಯಾಮವೇ ತಂತ್ರಜ್ಞಾನ. ಮತ್ತು ಈ ಕ್ಷೇತ್ರದಲ್ಲಿ, ನಾವು ಸಂಶೋಧನೆಯ ಮೂಲಕ ಜಗತ್ತನ್ನು ಮುನ್ನಡೆಸಲೇಬೇಕು. ಏಕೆಂದರೆ, ದೀರ್ಘಾವಧಿಯಲ್ಲಿ ಸಂಶೋಧನೆಯೇ ನಮ್ಮ ಅಚಲವಾದ ಶಕ್ತಿಯಾಗಿದೆ. ನಾವು ಅಂತರರಾಷ್ಟ್ರೀಯ ಗಡಿಗಳನ್ನು ಭೇದಿಸಿ ಜಗತ್ತಿಗೆ ಒಂದು ಸ್ಪಷ್ಟ ಸಂದೇಶವನ್ನು ರವಾನಿಸಿದ್ದೇವೆ ಎಂದು ಹೆಮ್ಮೆ ಪಡುವುದಾದರೆ, ಅದರ ಹಿಂದಿದ್ದ ಏಕೈಕ ಶಕ್ತಿ ನಮ್ಮ ತಂತ್ರಜ್ಞಾನವೇ.

ಅದು ಉತ್ತರ ಪ್ರದೇಶದಲ್ಲಿ ತಯಾರಾದ ಬ್ರಹ್ಮೋಸ್ ಆಗಿತ್ತು. ನಮಗೆ ರಕ್ಷಣೆ ನೀಡಿದ್ದು ಆಕಾಶ್ ಕ್ಷಿಪಣಿ. ಆದರೆ ಇವೆಲ್ಲವೂ ತಂತ್ರಜ್ಞಾನದಿಂದಲೇ ಸೃಷ್ಟಿಯಾದವು. ಆದುದರಿಂದ, ನಾನು ಸರಿಯಾದ ಸ್ಥಳದಲ್ಲಿಯೇ ಇದ್ದೇನೆ. ಏಕೆಂದರೆ ಬೆಂಗಳೂರು ಎಂಥಹ ಸ್ಥಳವೆಂದರೆ, ಇಲ್ಲಿ ಪ್ರತಿಭೆ ಬೆಳೆಯುತ್ತದೆ, ಇಲ್ಲಿ ಪ್ರತಿಭೆ ಅರಳುತ್ತದೆ, ಇಲ್ಲಿನ ಉದ್ಯಮವು ಜಾಗತಿಕ ಸಮುದಾಯದ ಅರಿವಿಗೆ ಬರುವಂತೆ ವೇಗವಾಗಿ ಬೆಳೆದು ಕಣ್ಣು ಮಿಟುಕಿಸುತ್ತದೆ. ಆದ್ದರಿಂದ, ಅತ್ಯಂತ ಕಠಿಣವಾದ ಸವಾಲಿಗೆ ಪರಿಹಾರವಿರುವುದು ಬೆಂಗಳೂರಿನಲ್ಲಿಯೇ.

ಕಳೆದ ಹತ್ತು ವರ್ಷಗಳಲ್ಲಿ ಭಾರತವು ಅಭೂತಪೂರ್ವ ಅಭಿವೃದ್ಧಿಯನ್ನು ಕಂಡಿದೆ. ಆರ್ಥಿಕತೆಯಲ್ಲಿ ತೀವ್ರ ಏರಿಕೆ, ಅದ್ಭುತವಾದ ಮೂಲಸೌಕರ್ಯಗಳ ಬೆಳವಣಿಗೆ, ಮತ್ತು ಹಳ್ಳಿಯ ಮಟ್ಟದವರೆಗೂ ಡಿಜಿಟಲ್ ತಂತ್ರಜ್ಞಾನದ ಆಳವಾದ ವ್ಯಾಪಿಸುವಿಕೆ ನಡೆದಿದೆ. ಈ ಅವಧಿಯಲ್ಲಿ, ನಾವು ವಿಶ್ವದ ದೊಡ್ಡ ಆರ್ಥಿಕತೆಗಳಲ್ಲಿ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಆರ್ಥಿಕತೆಯಾಗಿದ್ದೇವೆ. ನಾವು 11ನೇ ಸ್ಥಾನದಿಂದ ಒಂದಂಕಿಯ ಸ್ಥಾನಕ್ಕೆ, ಅಂದರೆ 5ನೇ ಸ್ಥಾನಕ್ಕೆ, ನಂತರ 4ನೇ ಸ್ಥಾನಕ್ಕೆ ಪಯಣ ಬೆಳೆಸಿದ್ದೇವೆ. ಮತ್ತು ಈಗ, ಅತಿ ಶೀಘ್ರದಲ್ಲಿಯೇ ವಿಶ್ವದ ಮೂರನೇ ಅತಿದೊಡ್ಡ ಜಾಗತಿಕ ಆರ್ಥಿಕತೆಯಾಗುವ ಗುರಿಯನ್ನು ಹೊಂದಿದ್ದೇವೆ. ಆದರೆ, ನಮ್ಮ ನಡುವೆ ಇರುವ ಹಿರಿಯ ರಾಜಕಾರಣಿಗಳಿಗೆ ಮತ್ತು ಉದ್ಯಮ ವಲಯಕ್ಕೆ ನಾನೊಂದು ಪ್ರಶ್ನೆಯನ್ನು ಕೇಳಬಯಸುತ್ತೇನೆ.

ಭಾರತವು ಇನ್ನು ಮುಂದೆ ಕೇವಲ ಭವಿಷ್ಯದ ಭರವಸೆಯ ದೇಶವಾಗಿ ಉಳಿದಿಲ್ಲ. ಭಾರತವು ಹಿಂದೆಂದಿಗಿಂತಲೂ ಹೆಚ್ಚಿನ ವೇಗದಲ್ಲಿ ಮುನ್ನುಗ್ಗುತ್ತಿದೆ. ಈ ಏರಿಕೆ ನಿರಂತರವಾಗಿದೆ, ಇದನ್ನು ತಡೆಯಲು ಸಾಧ್ಯವಿಲ್ಲ. ಆದರೆ ನಾವು ಇನ್ನೂ ಹೆಚ್ಚಿನದನ್ನು ಸಾಧಿಸಬೇಕಿದೆ, ಅದರ ಕಾರಣವನ್ನು ನಾನು ನಿಮಗೆ ವಿವರಿಸುತ್ತೇನೆ. ವಿಕಸಿತ ಭಾರತ ಇನ್ನು ಮುಂದೆ ಕೇವಲ ನಮ್ಮ ಕನಸಲ್ಲ. ಅದು ನಮ್ಮ ಗುರಿ. ಆ ಗುರಿಯನ್ನು ನಾವು ಖಂಡಿತವಾಗಿಯೂ ತಲುಪುತ್ತೇವೆ. ಆದರೆ ಆ ಗುರಿಯನ್ನು ತಲುಪಲು, ನಾವು ದೊಡ್ಡ ಮಟ್ಟದ ಪ್ರಗತಿಯನ್ನು ಸಾಧಿಸಬೇಕಾಗುತ್ತದೆ, ಮತ್ತು ಆ ಪ್ರಗತಿಯು ತಲಾ ಆದಾಯವನ್ನು ಹಲವಾರು ಪಟ್ಟು ಹೆಚ್ಚಿಸುವುದರ ಮೂಲಕ ಸಾಧ್ಯವಾಗಬೇಕು. ಆರ್ಥಿಕತೆಯ ಗಾತ್ರ ಮುಖ್ಯವಾದರೂ, ನಮ್ಮ ಜನಸಂಖ್ಯೆಯ ಪ್ರಮಾಣಕ್ಕೆ ಅನುಗುಣವಾಗಿ ನಮ್ಮ ಆರ್ಥಿಕತೆಯು ಎಷ್ಟು ಅಭಿವೃದ್ಧಿ ಹೊಂದಿದೆ ಎಂದು ನಾವು ಗಮನಿಸಬೇಕು. ನಾವು 1.4 ಬಿಲಿಯನ್ ಜನರಿದ್ದೇವೆ. ಆದ್ದರಿಂದ, ಪ್ರಾಯೋಗಿಕ ಅಂದಾಜಿನ ಪ್ರಕಾರ, ತಲಾ ಆದಾಯವು 8 ಪಟ್ಟು ಹೆಚ್ಚಾಗಬೇಕಾಗುತ್ತದೆ.

ನಮ್ಮ ಈ ಅಭಿವೃದ್ಧಿಯ ಪಯಣದ ಚಾಲಕಶಕ್ತಿಯೇ ನೀವು. ನನ್ನ ಮುಂದೆ ಆಸೀನರಾಗಿರುವ ನಿಮ್ಮೊಂದಿಗೆ ನನ್ನ ಆಲೋಚನೆಗಳನ್ನು ಹಂಚಿಕೊಳ್ಳುತ್ತಿದ್ದೇನೆ, ಏಕೆಂದರೆ ಈ ದೇಶದ ಬೆಳವಣಿಗೆಯಲ್ಲಿ ನೀವೇ ಅತ್ಯಂತ ಮಹತ್ವದ ಪಾಲುದಾರರು. ಈ ಅಭಿವೃದ್ಧಿಯ ಇಂಜಿನ್ ಪೂರ್ಣ ವೇಗದಲ್ಲಿ ಮುನ್ನುಗ್ಗಲು ನಿಮ್ಮ ಕೊಡುಗೆ ಅತ್ಯಗತ್ಯ. ಆದರೆ ಒಂದು ಮೂಲಭೂತ ವ್ಯತ್ಯಾಸವಿದೆ. ರಾಜಕೀಯದಲ್ಲಿರುವವರಿಗೂ, ಉದ್ಯಮದಲ್ಲಿರುವ ನಿಮಗೂ ಇರುವ ವ್ಯತ್ಯಾಸವೇನೆಂದರೆ, ನೀವು ಬ್ಯಾಲೆನ್ಸ್ ಶೀಟ್ ನೋಡಿ ತೃಪ್ತರಾಗುತ್ತೀರಿ. ಆದರೆ ರಾಜಕಾರಣಿಗಳ ತೃಪ್ತಿ ಅದಕ್ಕಷ್ಟೇ ಸೀಮಿತವಲ್ಲ. ಅವರು ರಾಷ್ಟ್ರವನ್ನು ಇನ್ನಷ್ಟು ಎತ್ತರಕ್ಕೆ ಕೊಂಡೊಯ್ಯಲು ಸದಾ ಹಂಬಲಿಸುತ್ತಾರೆ, ಶ್ರಮಿಸುತ್ತಾರೆ. ಈ ಕಾರಣದಿಂದಾಗಿಯೇ, ದೇಶದಲ್ಲಿ ಹೊಸ 'ಗ್ರೀನ್ಫೀಲ್ಡ್' ಯೋಜನೆಗಳು ಬರಬೇಕಾದ ವೇಗದಲ್ಲಿ ಬರುತ್ತಿಲ್ಲ. ನಾನು ನಿಮ್ಮಲ್ಲಿ ಕಳಕಳಿಯಿಂದ ಮನವಿ ಮಾಡುವುದೇನೆಂದರೆ, ದಯವಿಟ್ಟು ಈ ಬಗ್ಗೆ ಆಳವಾಗಿ ಯೋಚಿಸಿ.

ಹೊಸ ಯೋಜನೆಗಳನ್ನು ಸ್ಥಾಪಿಸಲು ಗುಂಪುಗಳಲ್ಲಿ ಸೇರಿಕೊಳ್ಳಿ. ಅದೇ ಯೋಜನೆಯ ಸಾಮರ್ಥ್ಯವನ್ನು ಹೆಚ್ಚಿಸುವುದು ಉತ್ತಮ, ಆದರೆ ನೀವು ಹೊಸ ಯೋಜನೆಯನ್ನು ಹೊಂದಿದ್ದರೆ, ಉದ್ಯೋಗ, ಅವಕಾಶಗಳು ಮತ್ತು ಬೆಳವಣಿಗೆಯ ಸಾಮರ್ಥ್ಯದ ಸಮಾನ ವಿತರಣೆ ಇರುತ್ತದೆ. ಎರಡನೆಯ ವಿಷಯವೆಂದರೆ, ನಾನು ಕೃಷಿ ಸಮುದಾಯದಿಂದ ಬಂದವನು. ದೇಶದ ಬೆಳವಣಿಗೆಯ ಪಥದಲ್ಲಿ ಕೃಷಿ ಕ್ಷೇತ್ರವು ನಿರ್ಣಾಯಕ ಪಾತ್ರವನ್ನು ವಹಿಸುತ್ತದೆ. ಆದರೆ ಪ್ರಸ್ತುತ, ಕೃಷಿ ಕ್ಷೇತ್ರದ ಕೊಡುಗೆ ಕೇವಲ ಕೃಷಿ ಉತ್ಪನ್ನಗಳನ್ನು ಉತ್ಪಾದಿಸುವುದು ಮತ್ತು ಅವುಗಳನ್ನು ಮಾರುಕಟ್ಟೆ ಮಾಡುವುದಕ್ಕೆ ಸೀಮಿತವಾಗಿದೆ. ಅವರು ಮಾರುಕಟ್ಟೆ ಕಾರ್ಯವಿಧಾನದ ಭಾಗವಾಗಿಲ್ಲ. ಕೃಷಿ ಕ್ಷೇತ್ರವು ಮಾರುಕಟ್ಟೆ ಸರಪಳಿಯ ಭಾಗವಾಗಿಲ್ಲ. ಕೈಗಾರಿಕೆಯು ಮುಖ್ಯವಾಗಿ ಕೃಷಿ ಉತ್ಪನ್ನಗಳ ಆಧಾರದ ಮೇಲೆ ನಿಂತಿದೆ. ಈಗ ಕೈಗಾರಿಕೆಯು ಕೃಷಿ ಮತ್ತು ಕೈಗಾರಿಕೆಗಳ ನಡುವೆ ಹೆಚ್ಚಿನ ಸಹಯೋಗವನ್ನು ತರಲು ತೀವ್ರವಾಗಿ ಚಿಂತಿಸಬೇಕಾಗುತ್ತದೆ.

ರೈತರಿಗೆ ಕೈಹಿಡಿದು ನಡೆಸಬೇಕಿದೆ. ಕೃಷಿ ವಲಯದಿಂದಲೇ ಉದ್ಯಮಿಗಳು ಹುಟ್ಟಿಬರಬೇಕಿದೆ. ನಾನು ಅವರನ್ನು 'ಕೃಷಿ-ಉದ್ಯಮಿಗಳು' ಎಂದು ಕರೆಯುತ್ತೇನೆ. ಆದರೆ ಅವರು ತಾವಾಗಿಯೇ ಆ ಮಟ್ಟಕ್ಕೆ ಬೆಳೆಯಲು ಸಾಧ್ಯವಿಲ್ಲ. ಆಹಾರ ಸಂಸ್ಕರಣೆಯು ಒಂದು ಮೂಲಭೂತ ಅಂಶವಾಗಿದೆ. ಹಲವಾರು ಉದ್ಯಮಗಳು ಬರಬಹುದು. ಮೌಲ್ಯವರ್ಧನೆಗಳು ನಡೆಯಬಹುದು. ತಂತ್ರಜ್ಞಾನವು ಇದನ್ನು ನಿರ್ಧರಿಸುತ್ತದೆ. ಒಂದು ವೇಳೆ, ಉತ್ಪಾದನೆ ಹೆಚ್ಚಾದರೆ, ಅಧಿಕ ಇಳುವರಿ ಬಂದರೆ, ರೈತ ನಿಸ್ಸಂಶಯವಾಗಿ ನಷ್ಟ ಅನುಭವಿಸುತ್ತಾನೆ. ಏಕೆಂದರೆ ಬೆಲೆಗಳು ಕುಸಿಯುತ್ತವೆ. ಇವೆಲ್ಲವೂ ಮಾರುಕಟ್ಟೆ ಚಾಲಿತ. ಹಾಗಾದರೆ ನಾವು ಬೆಲೆಯನ್ನು ಸ್ಥಿರವಾಗಿಡುವುದು ಹೇಗೆ? ಕೃಷಿ ಭೂಮಿಯಲ್ಲಿಯೇ ಅಥವಾ ಅದರ ಸಮೀಪದಲ್ಲಿಯೇ ಹೇರಳವಾದ ಉತ್ಪಾದನೆಗೆ ಮೌಲ್ಯವರ್ಧನೆ ಮಾಡುವ ಮೂಲಕ ನಾವು ಬೆಲೆಯನ್ನು ಉಳಿಸಿಕೊಳ್ಳಬಹುದು.

ಟೊಮೆಟೊಗಳನ್ನು ರಸ್ತೆಯಲ್ಲಿ ಸುರಿಯುವ ದೃಶ್ಯವು ನಮ್ಮ ರಾಷ್ಟ್ರೀಯ ಮನಸ್ಥಿತಿಗೆ ಒಳ್ಳೆಯದಲ್ಲ. ಹೇರಳವಾಗಿ ಉತ್ಪಾದನೆ ಇದ್ದರೆ, ಅದನ್ನು ಕಚ್ಚಾ ವಸ್ತುವಾಗಿ ಪರಿವರ್ತಿಸಿ ಸಂಬಂಧಪಟ್ಟ ಕೈಗಾರಿಕಾ ವಲಯಕ್ಕೆ ಕಳುಹಿಸಲು ಮೊಬೈಲ್ ಕೈಗಾರಿಕಾ ಘಟಕಗಳನ್ನು ಸ್ಥಾಪಿಸುವಂತಹ ಕಾರ್ಯವಿಧಾನವನ್ನು ನಾವು ಅಭಿವೃದ್ಧಿಪಡಿಸಬೇಕು. ಆದ್ದರಿಂದ ಕಾರ್ಪೊರೇಟ್ ಗಳು ತಮ್ಮ ಲಾಭವನ್ನು ಕೃಷಿ ವಲಯದೊಂದಿಗೆ ಹಂಚಿಕೊಳ್ಳುವ ಸಮಯ ಇದೀಗ ಬಂದಿದೆ.

ನೆನಪಿಡಿ, ಸಂಶೋಧನೆಯಲ್ಲಿರಲಿ ಅಥವಾ ಕೃಷಿ ಭೂಮಿಯಲ್ಲಿರಲಿ, ನಿಮ್ಮ ಹೂಡಿಕೆಯು ಅಂತಿಮವಾಗಿ ನಿಮಗೆ ಲಾಭವನ್ನು ತರುತ್ತದೆ. ಅದು ಸುಸ್ಥಿರ ಆರ್ಥಿಕತೆ ರೂಪುಗೊಳ್ಳಲು ಸಹಾಯ ಮಾಡುತ್ತದೆ. ಕಾರ್ಪೊರೇಟ್ಗಳು, ವ್ಯಾಪಾರಿಗಳು, ವಾಣಿಜ್ಯೋದ್ಯಮಿಗಳು ಮತ್ತು ಉದ್ಯಮಿಗಳು ಆರ್ಥಿಕ ರಾಷ್ಟ್ರೀಯತೆಯ ತತ್ವಕ್ಕೆ ಬದ್ಧರಾಗಿರಬೇಕೆಂದು ನಾನು ಆಗ್ರಹಿಸುತ್ತೇನೆ. ನಾನು ಸುಮಾರು ಮೂರುವರೆ ದಶಕಗಳ ಹಿಂದೆ ಸಂಸದ ಮತ್ತು ಮಂತ್ರಿಯಾಗಿದ್ದಾಗ, ನಮ್ಮ ವಿದೇಶಿ ವಿನಿಮಯ ಮೀಸಲು ಕೇವಲ ಒಂದು ಬಿಲಿಯನ್ ಯುಎಸ್ ಡಾಲರ್ನಷ್ಟಿತ್ತು. ಆ ಕಾರಣದಿಂದ ನಮ್ಮ ಅಮೂಲ್ಯವಾದ ಚಿನ್ನವನ್ನು ವಿಮಾನದ ಮೂಲಕ ಸ್ವಿಟ್ಜರ್ ಲ್ಯಾಂಡ್ಗೆ ಸಾಗಿಸಿ ಎರಡು ಬ್ಯಾಂಕ್ ಗಳಲ್ಲಿ ಇಡಬೇಕಾಯಿತು.

ಈಗ ಅದು 700 ಬಿಲಿಯನ್ ಯುಎಸ್ ಡಾಲರ್ ಗಳಿಗಿಂತ ಹೆಚ್ಚಿದೆ. ಆದರೆ ಒಂದೊಮ್ಮೆ ಯೋಚಿಸಿ, ಈ ದೇಶದಲ್ಲಿಯೇ ತಯಾರಾಗುವ ವಸ್ತುಗಳನ್ನು ನಾವು ಆಮದು ಮಾಡಿಕೊಳ್ಳುವುದನ್ನು ನಿಲ್ಲಿಸಿದರೆ, ಅದು 700 ಬಿಲಿಯನ್ ಯುಎಸ್ ಡಾಲರ್ ಆಗಿರುವುದಿಲ್ಲ. ಅದು 800 ಬಿಲಿಯನ್ ಯುಎಸ್ ಡಾಲರ್ಗಳಿಗಿಂತ ಹೆಚ್ಚಾಗುತ್ತದೆ. ಏಕೆಂದರೆ ನಾವು ಗಾಳಿಪಟ, ಮೇಣದಬತ್ತಿ, ದೀಪ, ಪೀಠೋಪಕರಣ, ಪರದೆಗಳು, ಮತ್ತು ಉಡುಪುಗಳನ್ನು ಆಮದು ಮಾಡಿಕೊಳ್ಳುತ್ತೇವೆ. ಮತ್ತು ಇದರಿಂದ ನಾವು ತಕ್ಷಣವೇ ನಮ್ಮ ಆರ್ಥಿಕತೆಗೆ ಹಾನಿಕಾರಕವಾದ ಮೂರು ಕೆಲಸಗಳನ್ನು ಮಾಡುತ್ತೇವೆ. ಮೊದಲನೆಯದಾಗಿ, ನಾವು ನಮ್ಮದೇ ಜನರಿಗೆ ಸಿಗಬೇಕಾದ ಕೆಲಸವನ್ನು ತಪ್ಪಿಸುತ್ತೇವೆ. ಎರಡನೆಯದಾಗಿ, ಉದ್ಯಮಶೀಲತೆಯ ಮನೋಭಾವವನ್ನು ಕುಂಠಿತಗೊಳಿಸುತ್ತೇವೆ ಮತ್ತು ಮೂರನೆಯದಾಗಿ, ನಮ್ಮ ವಿದೇಶಿ ವಿನಿಮಯದ ನಿಧಿಗೆ ನಷ್ಟವುಂಟುಮಾಡುತ್ತೇವೆ.

ಈಗ ಇದನ್ನು ಮಾಡುವುದು ಹೇಗೆ? ಇದಕ್ಕೆ ಎರಡು ದಾರಿಗಳಿವೆ. ಒಂದು, ಜನರು ಇದನ್ನು ಮಾಡಬಹುದು. ಆದರೆ ಅದಕ್ಕಿಂತ ಸುಲಭವಾದ ದಾರಿಯೊಂದಿದೆ, ಏಕೆಂದರೆ ಆಮದು ಮಾಡಿಕೊಳ್ಳುವುದು ಕಾರ್ಪೊರೇಟ್ಗಳು, ವ್ಯಾಪಾರ, ಉದ್ಯಮ ಮತ್ತು ವ್ಯವಹಾರಸ್ಥರು. ನೀವೇ ನಿರ್ಧರಿಸಬೇಕು. ಇದನ್ನು ಸರ್ಕಾರ ನಿರ್ಧರಿಸಲು ಸಾಧ್ಯವಿಲ್ಲ, ಏಕೆಂದರೆ ನಾವು ಜಾಗತಿಕ ನಿಯಂತ್ರಣ ವ್ಯವಸ್ಥೆಯನ್ನು ಹೊಂದಿದ್ದೇವೆ. ಆದರೆ ಜನರು ನಿರ್ಧರಿಸಬಹುದು. ಮಹಾತ್ಮ ಗಾಂಧಿಯವರನ್ನು ನಮ್ಮ ಸ್ವಾತಂತ್ರ್ಯ ಚಳುವಳಿಗೆ ಒಂದು ಹರಿತವಾದ ಆಯಾಮವನ್ನು ನೀಡಿದ್ದಕ್ಕಾಗಿ ಸ್ಮರಿಸಲಾಗುತ್ತದೆ. ಏಕೆಂದರೆ ಅವರು ಜನರಿಗೆ 'ಸ್ವದೇಶಿ'ಯಲ್ಲಿ ನಂಬಿಕೆ ಇಡಲು ಕರೆ ನೀಡಿದರು. ನಮ್ಮ ಈಗಿನ ಪ್ರಧಾನಮಂತ್ರಿ, ನರೇಂದ್ರ ಮೋದಿಯವರು, ಅದಕ್ಕೆ 'ವೋಕಲ್ ಫಾರ್ ಲೋಕಲ್' ಎಂಬ ಹೊಸ ಆಯಾಮವನ್ನು ನೀಡಿದ್ದಾರೆ.

ನಾನು ನಿಮ್ಮಲ್ಲಿ ಬೇಡಿಕೊಳ್ಳುತ್ತೇನೆ, ದಯವಿಟ್ಟು ಎಲ್ಲಾ ಸಂಘಟನೆಗಳೂ ಒಗ್ಗೂಡಿ. ಈ ವಿಷಯದ ಬಗ್ಗೆ ಒಂದು ನಿಲುವನ್ನು ತೆಗೆದುಕೊಳ್ಳಿ. ರಾಷ್ಟ್ರವು ನಿಮಗೆ ಸದಾ ಆಭಾರಿಯಾಗಿರುತ್ತದೆ. ಮತ್ತು, ನಾವು ಸಂಕಷ್ಟದ ಸಮಯದಲ್ಲಿ ನಮ್ಮ ಹಿತಾಸಕ್ತಿಗಳಿಗೆ ವಿರೋಧವಾಗಿ ನಿಲ್ಲುವ ದೇಶಗಳಿಂದ ಆಮದು ಮಾಡಿಕೊಂಡಾಗ, ಅವರು ಪರೋಕ್ಷವಾಗಿ ನಮ್ಮ ಭದ್ರತೆಗೆ ಧಕ್ಕೆ ತರುತ್ತಾರೆ. ನಾವು ಏಕೆ ದೇಶಭಕ್ತಿಯನ್ನು ಪ್ರದರ್ಶಿಸಬಾರದು! ಆದ್ದರಿಂದ, ನಾನು ಇನ್ನೊಂದು ವಿಷಯಕ್ಕೆ ಬರುತ್ತೇನೆ. ದೇಶದಲ್ಲಿನ ರಾಜಕೀಯ ಪಕ್ಷಗಳು ರಾಜಕೀಯದ ವಾತಾವರಣವನ್ನು ಕಡಿಮೆ ಮಾಡಬೇಕಿದೆ. ರಾಜಕೀಯ ಪಕ್ಷಗಳ ನಡುವಿನ ಸಂವಾದವು ಸಂಘರ್ಷದ್ದಾಗಿರಬಾರದು. ಸಂವಾದವು ಸೌಹಾರ್ದಯುತವಾಗಿರಬೇಕು. ಸ್ನೇಹಿತರೆ, ಪ್ರಜಾಪ್ರಭುತ್ವವನ್ನು ವ್ಯಾಖ್ಯಾನಿಸುವುದೇ ಸಂವಾದ ಮತ್ತು ಚರ್ಚೆಯ ಮೂಲಕ. 

ವೇದಾಂತದ ಸಿದ್ಧಾಂತದಂತೆ, ಪ್ರಜಾಸತ್ತಾತ್ಮಕ ಮೌಲ್ಯಗಳ ಗುಣಗಾನವು ಅಭಿವ್ಯಕ್ತಿ ಸ್ವಾತಂತ್ರ್ಯ ಮತ್ತು ವಾದ-ವಿವಾದವಿಲ್ಲದೆ ಸಾಧ್ಯವಿಲ್ಲ. ನಾವು 'ಅನಂತವಾದ' ಎಂದು ಯಾವುದನ್ನು ಕರೆಯುತ್ತೇವೆಯೋ, ಅದರ ಅರ್ಥವೇನು? ನಿಮಗೆ ಅಭಿವ್ಯಕ್ತಿ ಸ್ವಾತಂತ್ರ್ಯದ ಹಕ್ಕಿದೆ. ಒಂದು ವೇಳೆ ಯಾರಾದರೂ ನಿಮ್ಮ ಅಭಿವ್ಯಕ್ತಿ ಸ್ವಾತಂತ್ರ್ಯದ ಹಕ್ಕಿನ ಮೇಲೆ ಆಘಾತವನ್ನುಂಟು ಮಾಡಿದರೆ, ಅದನ್ನು ಕುಂಠಿತಗೊಳಿಸಿದರೆ ಅಥವಾ ನಿಯಂತ್ರಿಸಿದರೆ, ಆಗ ಪ್ರಜಾಪ್ರಭುತ್ವದಲ್ಲಿ ಕೊರತೆಯುಂಟಾಗುತ್ತದೆ. ಆದರೆ, ಅಭಿವ್ಯಕ್ತಿಯ ಆಧಾರವು ಎಷ್ಟರಮಟ್ಟಿಗೆ ಹೆಚ್ಚಾಗುವುದೆಂದರೆ, ಬೇರೆಯವರ ಮಾತನ್ನೇ ಕೇಳದಂತಾಗುತ್ತದೆ, ಮತ್ತು ಅಭಿವ್ಯಕ್ತಿ ಮಾಡುವವರು 'ನಾನು ಹೇಳಿದ್ದೇ ಅಂತಿಮ ವಾಕ್ಯ' ಎಂದು ತಿಳಿದುಕೊಳ್ಳುತ್ತಾರೆ. ಇದರರ್ಥ, ವಾದ-ವಿವಾದವನ್ನೇ ಮುಕ್ತಾಯಗೊಳಿಸಿದಂತೆ.

ನನ್ನ ಜೀವನದ ಅನುಭವದ ಪ್ರಕಾರ, ನೀವು ನಿಮ್ಮ ದೃಷ್ಟಿಕೋನದ ಬಗ್ಗೆ ಹೆಮ್ಮೆಪಡಬೇಕು, ಆದರೆ ಯಾವಾಗಲೂ ಇನ್ನೊಂದು ದೃಷ್ಟಿಕೋನವಿದೆ ಎಂಬುದನ್ನು ಎಂದಿಗೂ ಮರೆಯಬೇಡಿ. ಮತ್ತು ಇನ್ನೊಂದು ದೃಷ್ಟಿಕೋನವು, ಹೆಚ್ಚಾಗಿ, ಸರಿಯಾದ ದೃಷ್ಟಿಕೋನವಾಗಿರುತ್ತದೆ. ಏಕೆಂದರೆ ಪ್ರಜಾಪ್ರಭುತ್ವದಲ್ಲಿ ಅಹಂಕಾರ ಅಥವಾ ದುರಹಂಕಾರಕ್ಕೆ ಸ್ಥಾನವಿಲ್ಲ. ಆದರೆ ಚರ್ಚೆಯು ಕಲುಷಿತಗೊಂಡರೆ, ರಾಜಕೀಯದ ವಾತಾವರಣವು ತೀವ್ರಗೊಳ್ಳುತ್ತದೆ. ಅದು ರಾಷ್ಟ್ರಕ್ಕೆ ಒಳ್ಳೆಯದಲ್ಲ.

ಆದ್ದರಿಂದ, ನಾನು ಎಲ್ಲಾ ರಾಜಕೀಯ ಪಕ್ಷಗಳಿಗೆ ಮನವಿ ಮಾಡುತ್ತೇನೆ. ರಾಷ್ಟ್ರೀಯ ಭದ್ರತೆಯ ವಿಷಯಗಳು, ರಾಷ್ಟ್ರೀಯತೆಗೆ ಸಂಬಂಧಿಸಿದ ವಿಷಯಗಳು, ಮತ್ತು ಅಭಿವೃದ್ಧಿಗೆ ಸಂಬಂಧಿಸಿದ ವಿಷಯಗಳನ್ನು ರಾಷ್ಟ್ರೀಯ ದೃಷ್ಟಿಕೋನದಿಂದ ನೋಡಬೇಕೇ ಹೊರತು, ಪಕ್ಷಪಾತದ ದೃಷ್ಟಿಕೋನದಿಂದಲ್ಲ. ರಾಜಕೀಯ ಕ್ಷೇತ್ರದಲ್ಲಿರುವ ಜನರ ರಾಜಕೀಯ ಜಾಣ್ಮೆಯ ಬಗ್ಗೆ ನನಗೆ ಕಿಂಚಿತ್ತೂ ಅನುಮಾನವಿಲ್ಲ. ಮತ್ತು ಅಂತಹವರು ಎಲ್ಲಾ ರಾಜಕೀಯ ಪಕ್ಷಗಳಲ್ಲಿಯೂ ಲಭ್ಯರಿದ್ದಾರೆ. ಭಾರತವು ಪ್ರವರ್ಧಮಾನಕ್ಕೆ ಬರುತ್ತಿರುವ ಒಂದು ಒಕ್ಕೂಟ ವ್ಯವಸ್ಥೆಯ ಸಮಾಜವಾಗಿದ್ದು, ಇಲ್ಲಿ ಕೇಂದ್ರ ಮತ್ತು ರಾಜ್ಯಗಳ ನಡುವೆ ಒಂದು ತಾಳಮೇಳ ಇರಬೇಕಾಗುತ್ತದೆ. ಆದ್ದರಿಂದ, ರಾಜಕೀಯ ನಾಯಕರು ಮತ್ತು ರಾಜಕೀಯ ಪಕ್ಷಗಳ ನಡುವೆ ಸಂವಾದ ನಡೆಯಲೇಬೇಕು. ಆ ಸಂವಾದದ ಅನುಪಸ್ಥಿತಿಯು ನಮ್ಮ ರಾಷ್ಟ್ರೀಯ ಮನಸ್ಥಿತಿಗೆ ಒಳ್ಳೆಯದಲ್ಲ.

ಇತರ ಎರಡು ಆತಂಕಕಾರಿ ವಿಷಯಗಳತ್ತ ನಿಮ್ಮ ಗಮನ ಸೆಳೆಯಲು ಇಚ್ಛಿಸುತ್ತೇನೆ. ನಾವು ನಮ್ಮ ದೇಶದಲ್ಲಿ ಸಾರ್ವಜನಿಕ ಸುವ್ಯವಸ್ಥೆಗೆ ಧಕ್ಕೆ ತರುತ್ತಿದ್ದೇವೆ. ಸಾರ್ವಜನಿಕ ಸುವ್ಯವಸ್ಥೆ ಕಾಪಾಡುವುದು ಪ್ರಜಾಪ್ರಭುತ್ವಕ್ಕೆ ಒಂದು ದೊಡ್ಡ ಸವಾಲು. ಸಾರ್ವಜನಿಕ ಸುವ್ಯವಸ್ಥೆಯನ್ನು ಉಲ್ಲಂಘಿಸಲು ಜನರು ಬೀದಿಗಿಳಿಯುವ ಮನೋಭಾವವನ್ನು ನಾವು ಹೇಗೆ ಸಹಿಸಿಕೊಳ್ಳಬಹುದು! ಇದು ಖಂಡಿತವಾಗಿಯೂ ಸರಿಯಲ್ಲ. ಉತ್ತರ ಪ್ರದೇಶದಲ್ಲಿ ಸಾರ್ವಜನಿಕ ಅವ್ಯವಸ್ಥೆಯು ದಿನನಿತ್ಯದ ವಿದ್ಯಮಾನವಾಗಿತ್ತು, ಈಗ ಅಲ್ಲಿ ಸಾರ್ವಜನಿಕ ಸುವ್ಯವಸ್ಥೆಯು ಸಾಮಾನ್ಯವಾಗಿದೆ. ಮತ್ತು ಎರಡನೆಯದಾಗಿ, ಸಾರ್ವಜನಿಕ ಆಸ್ತಿಯನ್ನು ಧ್ವಂಸ ಮಾಡುವುದು, ಲೂಟಿ ಮಾಡುವುದು, ಬೆಂಕಿ ಹಚ್ಚುವುದು ಹಾಗೂ ಖಾಸಗಿ ಆಸ್ತಿಪಾಸ್ತಿಗಳನ್ನು ನಾಶಪಡಿಸುವುದನ್ನು ಕಲ್ಪಿಸಿಕೊಳ್ಳಿ. ಅಂತಹ ವ್ಯಕ್ತಿಗಳನ್ನು ಹೆಸರಿಸಿ ಅವಮಾನಿಸಬೇಕು. ವ್ಯವಸ್ಥೆಯು ಬಹಳ ವೇಗವಾಗಿ ಕಾರ್ಯನಿರ್ವಹಿಸಬೇಕು. ರಾಷ್ಟ್ರೀಯ ಮನೋಭಾವವಿಲ್ಲದ ಇಂತಹ ವ್ಯಕ್ತಿಗಳನ್ನು ನಾವು ಸಹಿಸಲು ಸಾಧ್ಯವಿಲ್ಲ. ಆದ್ದರಿಂದ ನಾವು ಇಂತಹ ವಿಷಯಗಳ ಬಗ್ಗೆ ಒಂದು ನಿರ್ದಿಷ್ಟ ಮನೋಭಾವವನ್ನು ಬೆಳೆಸಿಕೊಳ್ಳಬೇಕಾಗಿದೆ.

ಘನತೆವೆತ್ತ ರಾಜ್ಯಪಾಲರು ನನಗೆ ಹೇಳುತ್ತಿದ್ದರು, ಯಾವುದೇ ಭಾರತೀಯ ವಿದೇಶಕ್ಕೆ ಹೋದಾಗಲೆಲ್ಲಾ, ಆತ ಶಿಸ್ತು, ಸಭ್ಯತೆ ಮತ್ತು ಆ ದೇಶದ ಕಾನೂನಿನ ಮೇಲಿನ ನಂಬಿಕೆಗೆ ಮಾದರಿಯಾಗುತ್ತಾನೆ. ಅದು ರಸ್ತೆಯಲ್ಲಿರಲಿ ಅಥವಾ ಬೇರೆಲ್ಲಿಯಾದರೂ ಇರಲಿ. ಆದರೆ ಆತ ಈ ದೇಶಕ್ಕೆ ಕಾಲಿಟ್ಟ ತಕ್ಷಣ, ಎಲ್ಲವೂ ತದ್ವಿರುದ್ಧವಾಗುತ್ತದೆ. ಆದ್ದರಿಂದ, ನಾವು ಶಿಕ್ಷಣದಿಂದ ಪ್ರಾರಂಭಿಸಬೇಕು. ಉಪಮುಖ್ಯಮಂತ್ರಿಗಳೇ, ಕರ್ನಾಟಕಕ್ಕಿಂತ ಉತ್ತಮವಾದ ಸ್ಥಳವಿರಲು ಸಾಧ್ಯವಿಲ್ಲ. ಶ್ರೇಷ್ಠವಾದ ಶೈಕ್ಷಣಿಕ ಸಂಸ್ಥೆಗಳ ಬಗ್ಗೆ ಚಿಂತಿಸಲು ಬೆಂಗಳೂರಿಗಿಂತ ಉತ್ತಮವಾದ ಸ್ಥಳವಿರಲು ಸಾಧ್ಯವಿಲ್ಲ. ಮತ್ತು ನಾವು ನಮ್ಮ ಮನೆಗಳಿಂದಲೇ ಪ್ರಾರಂಭಿಸಬೇಕು.

ನಾವು ಮಕ್ಕಳಿಗೆ ಹಿರಿಯರನ್ನು ಗೌರವಿಸಲು, ಗುರುಗಳನ್ನು ಗೌರವಿಸಲು, ನೆರೆಹೊರೆಯವರನ್ನು ಗೌರವಿಸಲು, ಸಮಾಜವನ್ನು ಗೌರವಿಸಲು ಕಲಿಸಬೇಕಾಗುತ್ತದೆ. ನಾವು ಮಕ್ಕಳಿಗೆ ಪರಿಸರದ ಬಗ್ಗೆ ಕಾಳಜಿ ವಹಿಸಲು ಕಲಿಸಬೇಕಾಗುತ್ತದೆ, ನಾವು ಮಕ್ಕಳಿಗೆ ಸ್ವದೇಶಿ ವಸ್ತುಗಳನ್ನು ಸ್ವೀಕರಿಸಲು ಕಲಿಸಬೇಕಾಗುತ್ತದೆ, ನಾವು ಮಕ್ಕಳಿಗೆ ಪ್ರಜೆಯ ಕರ್ತವ್ಯವೇನು ಎಂದು ಕಲಿಸಬೇಕಾಗುತ್ತದೆ. ಇದು ನಮ್ಮ ವೇದಗಳಲ್ಲಿ ಪ್ರತಿಫಲಿಸುತ್ತದೆ, ಒಮ್ಮೆ ಕಲಿಸಿದರೆ ನಮ್ಮ ಮುಂದೆ ಅದ್ಭುತ ಫಲಿತಾಂಶಗಳು ಬರುತ್ತವೆ.

ಬೆಂಗಳೂರಿನಲ್ಲಿ, ನಾನು ಇನ್ನೊಂದು ಮುಖ್ಯವಾದ ವಿಷಯದ ಬಗ್ಗೆ ಮಾತನಾಡಲು ಬಯಸುತ್ತೇನೆ. ನಾನು ಆರ್ಥಿಕ ರಾಷ್ಟ್ರೀಯತೆಯ ಬಗ್ಗೆ ಮಾತನಾಡುತ್ತಿದ್ದಾಗ, ಅದು ನಮ್ಮ ದೇಶದಲ್ಲಿ ತಯಾರಾಗುವ ವಸ್ತುಗಳ ಆಮದಿನ ಕುರಿತಾಗಿತ್ತು. ಈಗ ನಾನು ದೇಶದಲ್ಲಿ ತಯಾರಿಸದ ವಸ್ತುಗಳ ಆಮದು ಬಗ್ಗೆ ಬರುತ್ತೇನೆ. ದಯವಿಟ್ಟು ಆಮದು ಪರ್ಯಾಯಗಳಿಗಾಗಿ ಶ್ರಮಿಸಿ. ಪ್ರತಿ ವಲಯದಲ್ಲಿಯೂ, ನಾವು ಈ ವಸ್ತುಗಳನ್ನು ಏಕೆ ಆಮದು ಮಾಡಿಕೊಳ್ಳುತ್ತಿದ್ದೇವೆಂದು ನೀವು ಗುರುತಿಸಬೇಕು. ಆದ್ದರಿಂದ, ಕಾರ್ಪೊರೇಟ್ಗಳು ಹಲವಾರು ಹಂತಗಳನ್ನು ಹೊಂದಿವೆ, ದೊಡ್ಡ ಉದ್ಯಮಗಳಿವೆ. ಎರಡನೇ ಹಂತವಿದೆ, ಮೂರನೇ ಹಂತವಿದೆ. ಆದರೆ ನನ್ನ ಪ್ರಕಾರ ಹೆಚ್ಚು ಭರವಸೆಯಿರುವುದು ಎರಡನೇ ಮತ್ತು ಮೂರನೇ ಹಂತ. ಮತ್ತು ಅದಕ್ಕಿಂತ ಮುಖ್ಯವಾಗಿ ಉದ್ಯಮಿಗಳ ವರ್ಗ. ಏಕೆಂದರೆ, ನಾನು ಈಗ ನನ್ನ ಯುವ ಮಿತ್ರರನ್ನು ಕುರಿತು ಮಾತನಾಡುತ್ತೇನೆ.

ಅಂತರರಾಷ್ಟ್ರೀಯ ಹಣಕಾಸು ನಿಧಿಯು ಭಾರತವನ್ನು ಹೂಡಿಕೆ ಮತ್ತು ಅವಕಾಶಗಳ ಜಾಗತಿಕ ತಾಣವೆಂದು ಗುರುತಿಸಿದ್ದು, ಅದು ಖಂಡಿತವಾಗಿಯೂ ಸರ್ಕಾರಿ ಉದ್ಯೋಗಗಳಿಗಾಗಿ ಅಲ್ಲ. ಅದು ಅವಕಾಶಗಳಿಗಾಗಿ. ಆದ್ದರಿಂದ ನಮ್ಮ ಯುವಕರು ಇದನ್ನು ನೆನಪಿನಲ್ಲಿಡಲಿ. ಅವರು ಸ್ಟಾರ್ಟ್ಅಪ್ ಗಳನ್ನು ಆರಂಭಿಸಬಹುದು. ಅವರು ತಮ್ಮ ಆಲೋಚನೆಗಳಿಗೆ ರೆಕ್ಕೆಗಳನ್ನು ನೀಡಬಹುದು. ತಮಗಿರುವ ಅವಕಾಶಗಳು ಸದಾ ವಿಸ್ತರಿಸುತ್ತಲೇ ಇವೆ ಎಂಬುದನ್ನು ಅವರು ತಿಳಿದುಕೊಳ್ಳಬೇಕು.

ಇಂದು ಭಾರತವು ಭರವಸೆ ಮತ್ತು ಸಾಧ್ಯತೆಗಳ ವಾತಾವರಣದಿಂದ ತುಂಬಿ ತುಳುಕುತ್ತಿದೆ. ಸಕಾರಾತ್ಮಕ ಆಡಳಿತ ನೀತಿಗಳಿಂದಾಗಿ ಪ್ರತಿಯೊಬ್ಬ ವ್ಯಕ್ತಿಯೂ ತನ್ನ ಪ್ರತಿಭೆಯನ್ನು ಪೂರ್ಣ ಪ್ರಮಾಣದಲ್ಲಿ ಬಳಸಿಕೊಂಡು, ತನ್ನ ಕನಸು ಮತ್ತು ಮಹತ್ವಾಕಾಂಕ್ಷೆಗಳನ್ನು ನನಸಾಗಿಸಿಕೊಳ್ಳಬಲ್ಲಂತಹ ಒಂದು ಪರಿಸರ ವ್ಯವಸ್ಥೆ ಇಲ್ಲಿದೆ. ಆದರೆ, ಮೊದಲ ಹೆಜ್ಜೆಯನ್ನು ನೀವೇ ಇಡಬೇಕು. ಉದ್ಯಮಿಗಳನ್ನು ಪ್ರೋತ್ಸಾಹಿಸಿ ಮತ್ತು ಅವರಿಗೆ ಕೈಹಿಡಿದು ದಾರಿ ತೋರಿಸಿ. ದಯವಿಟ್ಟು ಉದ್ಯಮಿಗಳೊಂದಿಗೆ ಸ್ಪರ್ಧಿಸಬೇಡಿ. ಉದ್ಯಮಿಗಳಿಗೆ ನಿಮ್ಮಿಂದ ಸಂಪೂರ್ಣ ಬೆಂಬಲ ಸಿಗಬೇಕು.

ನೀವು ವ್ಯಾಪಾರ, ವಾಣಿಜ್ಯ ಮತ್ತು ವ್ಯವಹಾರದಲ್ಲಿ ಇರುವುದರಿಂದ, ಜಾಗತಿಕ ಸವಾಲುಗಳು ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿವೆ ಎಂದು ನಿಮಗೆ ತಿಳಿದಿದೆ. ಜಾಗತಿಕ ಸಂಘರ್ಷಗಳು ಕಡಿಮೆಯಾಗುತ್ತಿಲ್ಲ. ಉಕ್ರೇನ್, ರಷ್ಯಾ ಯುದ್ಧವು ಬಹುತೇಕ ಅಂತ್ಯವಿಲ್ಲದಂತಾಗಿದೆ. ಹಮಾಸ್, ಇಸ್ರೇಲ್ ಸಂಘರ್ಷ ಮುಂದುವರೆದಿದೆ. ಪೂರೈಕೆ ಸರಪಳಿಗಳು ಅಸ್ತವ್ಯಸ್ತಗೊಳ್ಳುತ್ತಿವೆ. ಈ ಸವಾಲಿನ ಪರಿಸ್ಥಿತಿಯಲ್ಲಿಯೂ ಅವಕಾಶಗಳ ಆಗರವಿದೆ. ಜಗತ್ತು ಅನಿಶ್ಚಿತತೆ ಮತ್ತು ಊಹಿಸಲಾಗದ ಸ್ಥಿತಿಯಿಂದ ವ್ಯಾಖ್ಯಾನಿಸಲ್ಪಟ್ಟಾಗ, ಪ್ರತಿಭೆ ಬೇರುಗಳಲ್ಲೇ ಅರಳುತ್ತದೆ ಮತ್ತು ಮುನ್ನುಗ್ಗುತ್ತದೆ. ಅವಕಾಶವನ್ನು ಬಳಸಿಕೊಳ್ಳಲು ಇದು ಸಕಾಲ.

ಧನ್ಯವಾದಗಳು.

 

*****

(Release ID: 2134948)