কেন্দ্ৰীয় মন্ত্ৰী সৰ্বানন্দ সোণোৱালে ন’ৰৱেৰ পৰিবহণ মন্ত্ৰী জন-ইভাৰ নাইগাৰ্ডৰ সৈতে ‘ফেৰী বিদ্যুৎকৰণ’ৰ ক্ষেত্ৰত ন’ৰৱেৰ বিশেষজ্ঞতাৰ অন্বেষণৰ অৰ্থে এক আলোচনাত ভাগ লয়৷ ইয়াৰ লগতে সোণোৱাল ন’ৰৱেৰ মন্ত্ৰী মাৰিয়ানে ছিভাৰ্টচেনৰ সৈতে জাহাজ পুনঃব্যৱহাৰ, বহনক্ষম মীন আৰু মহাসাগৰীয় নবীকৰণযোগ্য শক্তিৰ ওপৰত পাৰস্পৰিক সহযোগিতাৰ বিষয়ে আলোচনা কৰে৷

যোৱা ৪ জুন, ২০২৫ তাৰিখে ন’ৰৱেৰ অস্লোত কেন্দ্ৰীয় বন্দৰ, জাহাজ আৰু জলপথ মন্ত্ৰী সৰ্বানন্দ সোণোৱালে দুয়োখন দেশৰ মাজত সামুদ্ৰিক সম্পৰ্ক আৰু অধিক গভীৰ কৰাৰ বাবে একাধিক ক্ষেত্ৰত ভাৰত আৰু ন’ৰৱেৰ মাজত সহযোগিতাৰ সম্ভাৱনাৰ সন্ধান কৰিবলৈ দ্বিপাক্ষিক বৈঠক অনুষ্ঠিত কৰে।  এই সন্দৰ্ভত ন’ৰ- শ্বিপিং অনুষ্ঠানটিত অংশগ্ৰহণ কৰি মন্ত্ৰীগৰাকীয়ে ন’ৰৱেৰ পৰিবহণ মন্ত্ৰী জন-ইভাৰ নাইগাৰ্ডৰ লগতে মীন আৰু মহাসাগৰীয় নীতি মন্ত্ৰী মেৰিয়ান ছিভাৰ্টচেনৰ সৈতে বৈঠকত মিলিত হয়।

 ‘সেউজ সামুদ্ৰিক প্ৰযুক্তি’ৰ প্ৰয়োগ বৃদ্ধিৰ প্ৰয়াসত কেন্দ্ৰীয় মন্ত্ৰী সৰ্বানন্দ সোণোৱালে পৰিবহণ মন্ত্ৰী জন-ইভাৰ নাইগাৰ্ডৰ সৈতে এক বৈঠকত মিলিত হয়।  সেউজ আৰু বহনক্ষম মনোযোগেৰে সামুদ্ৰিক খণ্ডক আধুনিকীকৰণৰ বাবে ভাৰতৰ নৱীকৃত প্ৰচেষ্টাৰ ওপৰত আলোকপাত কৰি কেন্দ্ৰীয় মন্ত্ৰীগৰাকীয়ে সেউজ জাহাজ চলোৱা আৰু ডিজিটেল ৰূপান্তৰৰ ক্ষেত্ৰত দেশৰ পদক্ষেপসমূহৰ ওপৰত আলোকপাত কৰে। এই ক্ষেত্ৰত ন’ৰৱেই লাভ কৰা সফল ৰূপায়ণৰ ভিত্তিত দুয়োটা পক্ষই ফেৰী ব্যৱস্থাৰ বিদ্যুৎকৰণৰ ক্ষেত্ৰত সহযোগিতা গভীৰ কৰিবলৈ আৰু নিজ অভিজ্ঞতা সমূহৰ আদান-প্ৰদানৰ বাবেও সন্মত হয়৷

এই উপলক্ষে ভাষণ দি কেন্দ্ৰীয় মন্ত্ৰী সৰ্বানন্দ সোণোৱালে কয়, “মাননীয় প্ৰধানমন্ত্ৰী নৰেন্দ্ৰ মোডী ডাঙৰীয়াৰ সক্ষম নেতৃত্বত ভাৰতে মেৰিটাইম ইণ্ডিয়া ভিজন ২০৩০ আৰু মেৰিটাইম অমৃত কাল ভিজন ২০৪৭ৰ অধীনত বন্দৰৰ আন্তঃগাঁথনি, সেউজ জাহাজ চলোৱা, জাহাজ নিৰ্মাণ, আৰু ডিজিটেলাইজেশ্যনক আগুৱাই লৈ গৈছে৷ ভাৰতে নিজৰ বন্দৰসমূহক ৰাজহুৱা-ব্যক্তিগত  অংশীদাৰিত্ব (পিপিপি) আৰু সেউজ শক্তি সংহতিৰ জৰিয়তে এক গোলকীয় বিনিয়োগ কেন্দ্ৰলৈ ৰূপান্তৰিত কৰিছে৷  আমাৰ বন্দৰসমূহ এতিয়া কেৱল বাণিজ্যৰ দুৱাৰমুখ নহয়—এইবোৰ স্বচ্ছ শক্তি পৰিৱৰ্তনৰ অনুঘটক হৈ পৰিছে,ই সাগৰৰ পাৰৰ বতাহ, সেউজ হাইড্ৰজেন, আৰু কম কাৰ্বনযুক্ত লজিষ্টিকক সমৰ্থন কৰিছে।”

সেউজ উপকূলীয় জাহাজ কাৰ্যসূচী আৰু সেউজ ভ্ৰমণ ২০৫০ৰ ওপৰত নিৰ্মাণ কৰি দুয়োখন দেশে সেউজ সামুদ্ৰিক প্ৰযুক্তিৰ সহযোগিতাৰ বিষয়ে আলোচনা কৰে।  দুয়োপক্ষই স্মাৰ্ট লজিষ্টিক, ডিজিটেল বন্দৰ পৰিৱেশ তন্ত্ৰ, আৰু পৰিষ্কাৰ উপকূলীয় জাহাজ চলোৱাৰ ক্ষেত্ৰত যৌথ প্ৰচেষ্টাৰ সন্ধান কৰে।  ভাৰতৰ মাইট্ৰি পদক্ষেপ আৰু ন’ৰৱেৰ এ আই-চালিত বন্দৰ ব্যৱস্থাপনা, ডিজিটেল টুইন, আৰু এলএনজি, হাইড্ৰজেন, আৰু বৈদ্যুতিক প্ৰপালচনৰ দৰে বৈকল্পিক ইন্ধনৰ ক্ষেত্ৰত ন’ৰৱেৰ বিশেষজ্ঞতাই এক বহনক্ষম নীলা অৰ্থনীতিক সম্ভৱ কৰি তুলিব পৰাৰ সম্ভাৱনীয়তাৰ ওপৰত আলোচনা হয়৷

এই সন্দৰ্ভত ভাৰত ন’ৰৱেৰ যৌথ পদক্ষেপৰ ওপৰত আলোকপাত কৰি সৰ্বানন্দ সোণোৱালে লগতে কয়, ‘আমি গ্ৰীণ শ্বিপিং, গ্ৰীণ টাগ ট্ৰেঞ্জিচন, ই-মিথানল বাংকাৰিং, আৰু হাইড্ৰজেন চালিত জাহাজৰ ক্ষেত্ৰতো কাম কৰি আছোঁ।ভাৰত আৰু ন’ৰৱেই এই অংশীদাৰিত্ব অব্যাহত ৰাখি এই খণ্ডত উদীয়মান বিশ্বব্যাপী চাহিদাৰ বাবে বৈদ্যুতিক ফেৰী আৰু জাহাজ নিৰ্মাণ কৰি যাব পাৰে।ভাৰতে এই খণ্ডত উত্তম পদ্ধতিৰ বাবে ন’ৰৱেৰ সৈতে অংশীদাৰিত্ব কৰিবলৈ আগ্ৰহী  আমাৰ চহকী আৰু বিশাল অভ্যন্তৰীণ জলপথসমূহক অনুকূল কৰি তুলিবলৈ ফেৰী ব্যৱস্থাৰ বিদ্যুৎকৰণে মালবাহী তথা যাত্ৰীবাহী জাহাজৰ মসৃণ পৰিবহণৰ বাবে ডিকাৰ্বনাইজড আৰু দক্ষ পৰিবহণ ব্যৱস্থাৰ আমাৰ উমৈহতীয়া লক্ষ্যক আগুৱাই নিব।”

 ন’ৰৱেৰ মীন আৰু মহাসাগৰ নীতি মন্ত্ৰী মেৰিয়ান ছিভাৰ্টচেন নেছৰ সৈতে হোৱা দ্বিপাক্ষিক বৈঠকৰ সময়ত কেন্দ্ৰীয় মন্ত্ৰীয়ে জাহাজ পুনঃব্যৱহাৰ, নাৱিকৰ প্ৰশিক্ষণ, বহনক্ষম মীন আৰু সাগৰ ব্যৱস্থাপনা, মহাসাগৰৰ নবীকৰণযোগ্য শক্তি, আৰু অফশ্ব’ৰ হাইড্ৰ’কাৰ্বনৰ সম্ভাৱনা আৰু সুযোগৰ ওপৰত গুৰুত্ব আৰোপ কৰে।

 দুয়োগৰাকী নেতাই দুয়োখন দেশৰ দীৰ্ঘদিনীয়া সহযোগিতাৰ মূল্যবোধ, পাৰস্পৰিক সন্মান আৰু বহনক্ষম উন্নয়নৰ প্ৰতি অটল দায়বদ্ধতাৰ প্ৰতিফলন সমূহৰ ওপৰত আলোকপাত কৰে।  ভাৰত আৰু ন’ৰৱেৰ মাজত থকা বিশেষ সম্পৰ্কক প্ৰকাশ কৰি সৰ্বানন্দ সোণোৱালে কয়, ‘সামুদ্ৰিক ক্ষেত্ৰত ভাৰতৰ বাবে ন’ৰৱে সদায়েই এক গুৰুত্বপূৰ্ণ সংগী হিচাপে পৰিগণিত।আমাৰ দীৰ্ঘদিনীয়া সহযোগিতাই আমাৰ পাৰস্পৰিক মূল্যবোধ, সন্মান আৰু বহনক্ষম উন্নয়নৰ প্ৰতি এক শক্তিশালী দায়বদ্ধতাক প্ৰতিফলিত কৰে। এইক্ষেত্ৰত EFTA- India Trade and Economic Partnership Agreement এক লেখত লবলগীয়া মাইলৰ খুটি হৈ ৰব৷”

ভাৰত আৰু ন’ৰৱেৰ মাজত জাহাজ নিৰ্মাণৰ সহযোগিতাৰ এক ইতিহাস আছে।  দুয়োপক্ষই ন’ৰৱেৰ অত্যাধুনিক জাহাজ ডিজাইন বিশেষজ্ঞতা আৰু ভাৰতৰ শক্তিশালী জাহাজ নিৰ্মাণ ক্ষমতাৰ সহায় লৈ যৌথভাৱে বিশ্বমানৰ, পৰিৱেশ-বন্ধুত্বপূৰ্ণ জাহাজ উৎপাদন কৰিবলৈ সন্মত হয়—যিটোৱে বহনক্ষম সামুদ্ৰিক পৰিবহণৰ ক্ষেত্ৰত এক পৰিৱৰ্তনশীল পৰিৱৰ্তন ঘটাব।  জাহাজ পুনঃব্যৱহাৰ খণ্ডৰ ওপৰত আলোচনাত পৰিৱেশ, স্বাস্থ্য আৰু সুৰক্ষাৰ মানদণ্ড উন্নত কৰাৰ ওপৰত গুৰুত্ব আৰোপ কৰি বহনক্ষম জাহাজ ভংগৰ পদ্ধতিসমূহক প্ৰসাৰিত কৰিবলৈ বিশেষজ্ঞতা আৰু সেউজ প্ৰযুক্তিৰ সহায় লোৱাৰ ওপৰত গুৰুত্ব আৰোপ কৰা হয়।  গুজৰাটত আলং জাহাজ পুনঃব্যৱহাৰ ক্ষেত্ৰৰ ভূমিকাক এনে হস্তক্ষেপৰ সম্ভাৱ্য স্থান হিচাপে আলোকপাত কৰা হয়।

 সোণোৱালে আৰু কয়, “ভাৰত আৰু ন’ৰৱেই দুয়োখন দেশেই নীলা অৰ্থনীতিত এক শক্তিশালী আৰু বৰ্ধিত অংশীদাৰিত্বৰ অংশীদাৰ, যিটো বহনক্ষম সাগৰ ব্যৱস্থাপনাৰ বাবে তেওঁলোকৰ দূৰদৰ্শী দৃষ্টিভংগী আৰু অৰ্থনৈতিক লাভালাভৰ বাবে সাগৰীয় সম্পদৰ জৰিয়তে লাভ অৰ্জনৰ বাবে পাৰস্পৰিক স্বাৰ্থৰ দ্বাৰা পৰিচালিত হয় - বিশেষকৈ নবীকৰণযোগ্য শক্তি, সামুদ্ৰিক প্ৰযুক্তি, আৰু বহনক্ষম উন্নয়নৰ ক্ষেত্ৰত।”

 কেন্দ্ৰীয় মন্ত্ৰী সৰ্বানন্দ সোণোৱালে মহিলা নাৱিকৰ উত্থান আৰু লিংগ সমতাপূৰ্ণ পৰিৱেশ তন্ত্ৰ গঢ়ি তোলাৰ বাবে ‘সাগৰ মে সন্মান’ পদক্ষেপৰ সূচনাৰ ওপৰত আলোকপাত কৰি সামুদ্ৰিক খণ্ডত লিংগ বৈচিত্ৰ্যৰ প্ৰতি ভাৰতৰ দায়বদ্ধতাক পুনৰ দৃঢ়তাৰে প্ৰতিফলিত কৰে।  সোণোৱালে নাৱিকসকলক বিশেষকৈ মেৰু জলসীমা, চাইবাৰ সুৰক্ষা, আৰু উন্নত সামুদ্ৰিক দক্ষতাৰ প্ৰশিক্ষণ প্ৰদান কৰি মানৱ পুঁজি গঢ়ি তোলাৰ ক্ষেত্ৰত নৰৱেৰ সমৰ্থনৰ আহ্বান জনায়।  নীলা অৰ্থনীতিৰ বিশাল সম্ভাৱনাৰ ওপৰত গুৰুত্ব আৰোপ কৰি ভাৰতৰ ক্ৰমবৰ্ধমান সামুদ্ৰিক উচ্চাকাংক্ষাৰ সৈতে সংগতি ৰাখি সোণোৱালে ন’ৰৱেৰ প্ৰতিষ্ঠানসমূহক সাগৰীয় নবীকৰণযোগ্য শক্তি—বিশেষকৈ বতাহ আৰু জোৱাৰ-ভাটাৰ শক্তি—বহনক্ষম জলজ কৃষি, আৰু গভীৰ সাগৰৰ অন্বেষণৰ ক্ষেত্ৰত যৌথ উদ্যোগ অন্বেষণ কৰিবলৈ আমন্ত্ৰণ জনায়৷

 ন’ৰৱে আৰু ভাৰতীয় সংস্থাসমূহৰ সৈতে উত্তৰ সাগৰীয় পথ (এন এছ আৰ) কাৰ্যকৰী কৰাৰ বাবে যৌথ সম্ভাৱনীয়তা অধ্যয়ন আৰম্ভ কৰিবলৈ ভাৰতৰ পক্ষৰপৰা এক প্ৰস্তাৱ ডাঙি ধৰা হয়। ভাৰতে আৰ্কটিক জাহাজ চলোৱাৰ ক্ষেত্ৰত অনুসন্ধান আৰু বিকাশ, বৰফ শ্ৰেণীৰ জাহাজৰ ডিজাইন আৰু নিৰ্মাণ, নেভিগেচন প্ৰযুক্তিৰ উন্নতিৰ ক্ষেত্ৰত আৰ্কটিক নেভিগেচনত ন’ৰৱেৰ সৈতে যৌথভাৱে কাম কৰিবলৈ আগ্ৰহ প্ৰকাশ কৰে।  এই অধ্যয়নত আৰ্কটিক জলসীমাত নিৰাপদ আৰু বহনক্ষম জাহাজ চলোৱাৰ পদ্ধতি নিশ্চিত কৰা, চৰম বতৰৰ পৰিস্থিতিয়ে সৃষ্টি কৰা অন্যান্য কাৰ্য্যকৰী প্ৰত্যাহ্বানসমূহ সমুখীন হোৱা, আৰু পৰিৱেশৰ ওপৰত প্ৰভাৱ কম কৰা আদিৰ ওপৰত গুৰুত্ব আৰোপ কৰা হ’ব।

 'ভাৰত আৰু ন’ৰৱেই একেলগে এক বহনক্ষম আৰু অন্তৰ্ভুক্ত বিশ্ব সামুদ্ৰিক ব্যৱস্থা গঢ়ি তোলাৰ দিশত কাম কৰি আছে।প্ৰধানমন্ত্ৰী শ্ৰী নৰেন্দ্ৰ মোডীৰ অনুপ্ৰেৰণাৰে বিকশিত ভাৰত আৰু নীলা অৰ্থনীতিৰ দ্বাৰা উদ্বুদ্ধ অৰ্থনৈতিক বৃদ্ধিৰ ক্ষেত্ৰত আমাৰ অংশীদাৰিত্বত উদ্ভাৱন, বহনক্ষমতা আৰু পাৰস্পৰিকভাৱে লাভান্বিত পদক্ষেপক আগুৱাই নিয়াৰ অপৰিসীম সম্ভাৱনা আছে৷ আমাৰ দ্বিপাক্ষিক সামুদ্ৰিক সহযোগিতাক আৰু আধিক গভীৰ কৰাৰ এক থল আছে। আজিৰ আলোচনাৰ বিষয়বস্তু সমূহক কাৰ্য্যকৰী কৰাৰ বাবে আমি ঘনিষ্ঠভাৱে কাম কৰি যাম।’