U Myntri Sorkar Pdeng ba dei khmih ia ki tnad Communications bad Development of North Eastern Region, Jyotiraditya Scindia u la pyniaid ia ka jingialang bad ki lad pathai khubor na ka bynta ka Rising North East Investor Summit mynta ka sngi.

U Myntri Khynnah ka tnad DoNER –Sukanta Majumdar, Secretary, ka tnad DoNER –Chanchal Kumar, ADG, PIB –Manisha Verma, Statistical Advisor, ka tnad DoNER –Dharmvir Jha bad kiwei kiwei ki ophisar jong kane ka tnad ki la iadon lane ha kane ka sngi.

Ha ka jingkren jong u bad ki lad pathai khubor, u myntri ka sorkar pdeng u Jyotiraditya Scindia u la pdiang sngewbha ia baroh sha kane ka prokram ba la pynlong shuwa ka North Eastern Investors Summit bad u la ong ba ka lad kaba khraw tam na ka bynta ka ri India ha ka lawei ka dei ki thain shatei lam mihngi jong ngi kiba phylla. U Jyotiraditya Scindia u la ong, “Kane ka prokram kan pyni ïa ka Ashta Lakshmi ba phylla jong ngi – ki 8 tylli ki jylla jong ngi, kiba don ka bynta kaba kongsan ha ka roi ka par kaba wanrah jingkylla kaba long ka nuksa ka ri jong ngi.”

“Ka jingkut jingmut jong u Myntri Rangbahduh, ka jingshimkhia jong u, ka jingthmu jong u, ban pynthikna ba ka thain shatei lammihngi kan long ka jaka pdeng na ka bynta ka roi ka par ha ki por ban wan bad ka lynti jong ka India ha ki por ban wan katba ka nang iaid shaphrang sha ka thong jong ka Vikisit Bharat ha u snem 2047”, la ong u Myntri ka sorkar pdeng.

U Myntri u la ong ba la ka dei ka 10% jong ka jingkyrshan mang tyngka kaba kot jan shi lak klur ha ka shisnem kaba la ai sha ka thain shatei lammihngi, la ka long ka jingpynkylla ia ka khajna, lane ki tnad bapher bapher bad ki riew shimet bad kiwei kiwei kiba shim ia kane ka jingjam shakhmat, mynta ka thain shatei lam mihngi, kaba la ju khein kum ka jaka ba jngai jong ka India ha ki por shuwa kine ki shiphew snem ba la dep, ka la kylla sha ka jaka kaba pdeng jong ka roi ka par jong ka India.

“Ka deiriti jong ka thain shatei lammihngi ha ryngkat ki jingdon jingem kiba bun bad ka jaka ba kongsan ba ka thain ka don, ka la pynkylla ïa kane ka thaiñ sha ka lad kaba khlaiñ tam ha ka pyrthei sha ka thaiñ South East Asia,” u la bynrap.

U Myntri u la ong, “Ki 10 snem ba la dep kiba long jong ka jingbei tyngka ba kyrpang, ki 10 snem ba la dep jong ka jingkut jingmut jong u Myntri Rangbahduh halor ki jingdon jingem, halor ka koit ka khiah, halor ka pule puthi, halor ki kor um, mynta ka la buh ia ka rynsan na ka bynta kata ka jingkiew jong ka thain shatei lammihngi sha ka bor ha ka ioh ka kot kaba ka lah ban long, ym tang na ka bynta ka ri India, hynrei na ka bynta ka pyrthei baroh kawei.” U la bynrap ruh ba ka thain shatei lammihngi kam ap ïa ka lawei hynrei ka dang tei ïa ka.

“Nga khot sngewbha ia phi baroh ban iadon bynta lang ban sakhi ia ka kane ka juk thymmai na ka bynta kane ka thain kaba itynnad, ka juk kaba kular ban don ka roi ka par, ym tang ia ka thain shatei lammihngi, hynrei ia baroh kawei ka ri India, bad ia baroh kawei ka thain South East Asia”, la ong u Myntri sorkar pdeng.

U Jyotiraditya Scindia u la pyntip ba u Myntri Rangbahduh ka ri u Narendra Modi u la mynjur ban iashim bynta ha kane ka prokram. Ka Rising North East investment summit kan sakhi ïa ka jingïashim bynta na ki tnad Sorkar pdeng bapher bapher, ki MP, ki nongmihkhmat na kiwei kiwei ki ri, bad ki Myntri Rangbah ba donburom jong ki Jylla ka thaiñ Shatei Lammihngi, ha ryngkat kiwei kiwei.

U Chanchal Kumar, Secretary ka MDoNER, u la pyni ia ki lad bei tyngka ba kongsan kiba kynthup ia baroh phra tylli ki jylla ka thain shatei lammihngi ha kane ka jingialang. Ka jingpynshai jong u Chanchal Kumar ka pyni ia ki roadshow ba iadei bad ki nongbei tyngka ba la pynlong da ka MDoNER ha ki nongbah bapher bapher jong ka ri, kynthup ha Mumbai, Bengaluru, Ahmedabad, Chennai, Hyderabad, Kolkata, Guwahati, bad New Delhi, ban kyntiew ia ka jingbei tyngka ha ka thain shatei lammihngi.

U Secretary ka MDoNER u la pyntip ba ki kam shwa ka jingialang bah ba la pynlong da ka MDoNER ki la khring ia ki jingtyrwa bei tyngka ba shongdor palat T. 1 lak klur ha kylleng ki jylla ka thain shatei lammihngi. Ha ka jingpynkhreh ia kane ka jingialang bah, la pynlong ia ka Ambassadors’ Meet ha ka jingiatreilang bad ka Tnad kam bar ri ha ka 15 tarik Iaiong 2025 ha Sushma Swaraj Bhawan, ban ai jingshai ia ki nongbei tyngka nabar ri na ka bynta kane ka thain. Ha kane ka jingïalang la sakhi ïa ka jingïashim bynta ha ka kyrdan jong ki Ambassador bad ki High Commissioner jong palat 75 tylli ki ri, kaba pyni ïa ka jingsngewtynnad kaba khraw ia ki thong ban peit bniah ïa kane ka thaiñ. Ka jingthmu ka long ban kyntiew ia ka rukom bei tyngka jong ka thain shatei lam mihngi. Bun ki karkhana, ki nongbei tyngka ki la dep ban bei tyngka kaba heh. Palat shi lak klur ki MOU bad Letter on Intent la dep ban iasoi.

Ka Rising North East Investor Summit ka dei ka jingkut jong ki kam bapher bapher shwa ka jingialang, kum ki roadshow na ka bynta ka jingbei tyngka, ki ambassador meet, ki jingialang jong ki arliang mamla, bad kiwei kiwei, ban kyntiew ia ka jingbei tyngka ha ka thain shatei lammihngi. Ki bynta ba la buh jingmut ha kane ka jingialang ki kynthup ia ka kam jngohkai pyrthei & ka kam ai jaka sah ia ki briew, ka kam pynkhreh marbam bad ki bynta ba iadei bad kane; Ki jain, ki jingshna kti, ka koit ka khiah; ka Pule puthi bad ka jingkyntiew ia ki sap treikam; ki IT/ITE; ki jingdon jingem bad ki kam logistic; Bording; bad ka Jingpynbyrngia & Kam ialehkai.

Ka MDoNER ka la shim katto katne ki sienjam ban pyni ia ka thain shatei lammihngi kum ka thain kaba don ki lad ki lynti, kaba khring ia ki nongbei tyngka nabar ri bad napoh ri, kaba wanrah lang ia ki nongshim bynta ba kongsan, ki nongbei tyngka, bad ki nongthaw polisi ha kawei ka rynsan. Ka jinglong jingman kaba ïadei bad ka kam khaii, kaba la pynkhlain da ki jingkyntiew ia ki jingdon jingem ba la pynïaid da ka sorkar bad ki sienjam ban kyntiew ïa ki sap ba la thmu, ka la wanrah ïa ka jingïakhun kaba jur hapdeng ki riewpawkhmat ha ka kam karkhana ban pyndonkam ïa ka lad kaba khraw jong ka thaiñ.

Haba phai sha ka Vision 2047, ka Sorkar ka thmu ban buh ïa ka thaiñ Shatei Lammihngi kum ka thaiñ kaba seisoh tam jong ka ri India — ka jaka pdeng kylleng ka pyrthei na ka bynta ki startup, ka jaka shalan ïa ki mar rep ba phylla, bad ka spah jong ka kam jngohkai pyrthei jong ka ri India.

Na ka bynta ki jingtip ba kham bniah kiba iadei bad ka Rising North East Investor Summit lah ban ioh ha kine ki link harum:

Website: https://risingnortheast.in/

Facebook: https://www.facebook.com/MdonerIndia

Instagram: https://www.instagram.com/donerindia/?next=%2F

***

(Release ID: 2128774)