ہندوستان میں مینگروو کے جنگلات 9 ریاستوں اور 4 مرکز کے زیر انتظام علاقوں کے ساحلی علاقے میں پائے جاتے ہیں ۔ ماحولیات جنگلات اور آب و ہواکی تبدیلی کی وزارت (ایم او ای ایف سی سی) کے ماتحت جنگلات کے سروے کے ساتھ ایک لازمی تنظیم فاریسٹ سروے آف انڈیا (ایف ایس آئی) دو سالہ طور پر "انڈیا اسٹیٹ آف فاریسٹ رپورٹ" (آئی ایس ایف آر) شائع کرتی ہے ۔

حالیہ آئی ایس ایف آر 2023 کے مطابق ، ہندوستان میں مینگروو جنگلات کل 4,991.68 مربع کلومیٹر پر محیط ہے ۔جو ملک کے کل جغرافیائی علاقوں کا 0.15 فیصد ہے۔ 2013 کے مقابلے میں 2023 میں ملک کے مینگروو جنگلات کےمحیط علاقے میں 363.68 مربع کلو میٹر (67.8 فیصد) کا خالص اضافہ ہوا ہے اور 2001 اور 2023 کے درمیان 509.68 مربع کلو میٹر(11.4 فیصد) کا خالص اضافہ ہوا ہے ۔

حکومت ہند نے ساحلی ریاستوں اور مرکز کے زیر انتظام علاقوں میں مینگروو کے جنگلات کے تحفظ اور ان میں اضافہ کرنے کے لیے کئی ضابطے اور ترقیاتی اقدامات نافذ کیے ہیں ۔

ماحولیات کے تحفظ سے متعلق ایکٹ 1986 کے تحت کوسٹل زون ریگولیشن نوٹیفکیشن آف 2019 (سی آر زیڈ)نے مینگروو کو ماحولیاتی لحاظ سے حساس علاقوں (ای ایس ایز) کے طور پر درجہ بند کیا ہے ۔ ان علاقوں میں بہت محدود سرگرمیوں کی اجازت ہے ۔ مزید برآں ، مینگروو کا احاطہ 1,000 مربع میٹر سے زیادہ ہونے کی صورت میں مینگروو کے ساتھ 50 میٹر بفر زون کی فراہمی کو بھی سی آر زیڈ-آئی اے کے طور پر متعین کیا جاتا ہے ۔ مینگروو بفر میں اجازت دی گئی سرگرمیاں محدود ہیں جن میں صرف  پائپ لائنز ، ٹرانسمیشن لائنیں ، نقل و حمل کے نظام یا میکانزم اور سٹلٹس پر سڑک کی تعمیر وغیرہ اجازت دی گئی سرگرمیوں میں شامل ہیں۔ جو عوامی سہولیات کے لیے ضروری ہیں ۔ ایسی صورتوں میں اگر ترقیاتی عمل کے دوران کوئی مینگروو متاثر ہوتے ہیں ، تو سی آر زیڈ ریگولیشن کی شق کے مطابق کھوئے ہوئے مینگروو کی تعداد سے تین گنا زیادہ دوبارہ لگانا ضروری ہے ۔

اس ترقیاتی اقدام میں 'مینگروو انیشی ایٹو فار شور لائن ہیبی ٹیٹس اینڈ ٹینجیبل انکمز (ایم آئی ایس ایچ ٹی آئی) پروگرام شامل ہے، جسے حکومت ہند نے شروع کیا ہے، جس کا مقصد ہندوستان کے ساحل پر پھیلے ہوئے تقریبا 540 مربع کلومیٹر پر محیط مینگروو کی ترقی کے لیے ممکنہ علاقے کو جامع طور پر تلاش کرنا ہے ۔ اس کا مقصد مینگرووز کا تحفظ اور بحالی کرنا اور ساحلی برادریوں کو مینگرووز کی اہمیت اور ماحولیات کے تحفظ میں ان کے کردار کے بارے میں تعلیم دینے کے لیے بیداری اورآگاہی سے متعلق مہم کا انعقاد کرنا ہے ۔ایم آئی ایس ایچ ٹی آئی کا نفاذ ساحلی ریاستوں اورمرکز کے زیر انتظام علاقوں کی حکومتوں کے ذریعے نیشنل کمپینسیٹری افوریسٹیشن فنڈ مینجمنٹ اینڈ پلاننگ اتھارٹی (سی اے ایم پی اے) سے کنورجنس اور گیپ فنڈنگ کے ذریعے مالی مدد کے ساتھ کیا جاتا ہے ۔ مالی سال 25-2024 کے لیے سی اے ایم پی اے کی جانب سے آندھرا پردیش ، گجرات ، کیرالہ ، اڈیشہ ، مغربی بنگال اور مرکز کے زیر انتظام علاقے پڈوچیری میں خراب شدہ مینگروو کے 3836 ہیکٹر کے علاج اور بحالی کی کوششوں کے لیے  17.96 کروڑ روپے مختص کیے گئے ہیں۔

ماحولیات ، جنگلات اور آب و ہواکی تبدیلی کی وزارت کی قومی ساحلی مشن اسکیم کے تحت 'مینگروو اور مرجان کی چٹانوں کا تحفظ اور بند وبست ' ساحلی ریاستوں اور مرکز کے زیر انتظام علاقوں (یو ٹی) کو 38 شناخت شدہ مینگروو سائٹس اور نو ساحلی ریاستوں اور چار مرکز کے زیر انتظام علاقوں میں چار مرجان کی چٹانوں کے تحفظ اور بند وبست کے لیے مالی مدد فراہم کرتا ہے ۔ اس اسکیم کے تحت، ریاستی حکومتیں مالی مدد حاصل کرنے کے لیے تجاویز پیش کرتی ہیں ، جو مرکزی حکومت اور ریاستی حکومتوں کے درمیان 60:40 کے لاگت کے اشتراک کے تناسب میں فراہم کی جاتی ہے ۔ مینگروو کے تحفظ اور بند وبست کی اسکیم کے تحت 23-2021 کی مدت کے دوران 7 ساحلی ریاستوں کو مرکزی امداد کے طور پر 8.58 کروڑ روپے کی رقم جاری کی گئی ہے ۔

اس کے علاوہ ، ایم او ای ایف سی سی تین ساحلی ریاستوں (آندھرا پردیش ، مہاراشٹر اور اڈیشہ) کے تعاون کے ساتھ گرین کلائمیٹ فنڈ کی مدد سے ہندوستانی ساحلی برادری کی ساحلی لچک بڑھاتے ہوئے (جی سی ایف-ای سی آر آئی سی سی) پروجیکٹ کو 2019 سے نافذ کر رہا ہے ۔ اس پروجیکٹ میں ریاست آندھرا پردیش ، مہاراشٹر اور اڈیشہ میں مینگروو کے 10,575 ہیکٹر کی بحالی اور تحفظ کے حصول کا ہدف ہے اور 2024-2019 کے دوران تقریبا 3114.29 ہیکٹر کی بحالی اور تحفظ کو حاصل کیا گیا ہے ۔

یہ جانکاری ماحولیات ، جنگلات اور آب و ہوا کی تبدیلی کی وزرات کے مرکزی وزیر مملکت جناب کیرتی وردھن سنگھ نے آج راجیہ سبھا میں ایک سوال کے تحریری جواب میں فراہم کیں ۔

**********

ش ح ۔م م ع۔م ق ا  ۔

(U: 9095)

(Release ID: 2116095) Visitor Counter : 15