ریلویز، اطلاعات و نشریات اور الیکٹرانکس اور اطلاعاتی ٹیکنالوجی کے مرکزی وزیر جناب اشونی ویشنو نے آج لوک سبھا میں ایک سوال کے تحریری جواب میں بتایا کہ تہوار/میلے کے دنوں کے دوران اسٹیشنوں پر مسافروں کی بھاری بھیڑ سے نمٹنے کے لیے، ریلوے کی طرف سے محدود رسائی کنٹرول سسٹم کا تجربہ کیا گیا ہے جہاں ایسے دنوں کے دوران، اسٹیشنوں کے باہر ہولڈنگ ایریا بنائے گئے تھے اور مسافروں کو صرف اس وقت اجازت دی گئی تھی جب ٹرین پلیٹ فارم پر آئے ۔

مزید برآں، اسٹیشنوں پر مسافروں کی بھاری بھیڑ سے نمٹنے کے لیے، ریلوے کی طرف سے درج ذیل فیصلے کیے گئے ہیں –

1.  60اسٹیشنوں پر مستقل ہولڈنگ ایریا:

1. سال2024 کے تہواروں کے موسم کے دوران، اسٹیشنوں کے باہر ہولڈنگ ایریا بنائے گئے تھے ۔ یہ ویٹنگ ایریا سورت، ادھنا، پٹنہ اور نئی دہلی میں بڑے ہجوم کو روکنے میں کامیاب رہے ۔ مسافروں کو صرف اس وقت اجازت دی گئی جب ٹرین پلیٹ فارم پر آئی۔
2. مہا کمبھ کے دوران پریاگ علاقے کے نو اسٹیشنوں پر بھی اسی طرح کے انتظامات کیے گئے تھے۔
3. ان اسٹیشنوں کے تجربے کی بنیاد پر، ملک بھر میں 60 اسٹیشنوں پر اسٹیشنوں کے باہر مستقل ویٹنگ ایریا بنانے کا فیصلہ کیا گیا ہے، جہاں وقتا فوقتا بھاری ہجوم کا سامنا کرنا پڑتا ہے۔
4. نئی دہلی، آنند وہار، وارانسی، ایودھیا اور غازی آباد اسٹیشنوں پر پائلٹ پروجیکٹ شروع کیے جاچکے ہیں۔
5. اس تصور کے ساتھ، اچانک ہونے والا ہجوم ویٹنگ ایریا میں محدود ہو جائے گا۔ ٹرینوں کے پلیٹ فارم پر پہنچنے پر ہی مسافروں کو پلیٹ فارم پر جانے کی اجازت ہوگی ۔ اس سے اسٹیشنوں پر بھیڑ کم ہو جائے گی ۔

 

2. ایکسِس کنٹرول:

1. 60 اسٹیشنوں پر مکمل رسائی کنٹرول شروع کیا جائے گا۔
2. کنفرمڈ ریزرو ٹکٹ والے مسافروں کو پلیٹ فارم تک براہ راست رسائی دی جائے گی۔
3. بغیر ٹکٹ یا ویٹنگ لسٹ ٹکٹ والے مسافر باہر ویٹنگ ایریا میں انتظار کریں گے۔
4. تمام غیر مجاز داخلے کے مقامات کو سیل کر دیا جائے گا۔

 

3. وسیع تر فٹ اوور برج (ایف او بی):

1. 12 میٹر چوڑے (40 فٹ) اور 6 میٹر چوڑے (20 فٹ) معیاری ایف او بی کے دو نئے ڈیزائن تیار کیے گئے ہیں ۔ ریمپ والے یہ وسیع ایف او بی مہاکمبھ کے دوران ہجوم کے بندوبست میں بہت موثر تھے۔ یہ نئے معیاری وسیع ایف او بی تمام اسٹیشنوں پر نصب کیے جائیں گے ۔

 

4.  کیمرے:

1. مہاکمبھ کے دوران کیمروں نے ہجوم کے انتظام میں بڑے پیمانے پر مدد کی ۔ قریبی نگرانی کے لیے تمام اسٹیشنوں اور ملحقہ علاقوں میں بڑی تعداد میں کیمرے لگائے جائیں گے ۔

 

5. وار رومز:

1. بڑے اسٹیشنوں پر وار روم تیار کیے جائیں گے۔ تمام محکموں کے افسران ہجوم کی صورتحال میں وار روم میں کام کریں گے۔

 

6. نئی نسل کے مواصلاتی آلات:

1. تمام بھاری ہجوم والے اسٹیشنوں پر واکی ٹاکیز، اعلان کرنے کے نظام، کالنگ سسٹم جیسے جدید ترین ڈیجیٹل مواصلاتی آلات نصب کیے جائیں گے۔

 

7. نیا ڈیزائن شناختی کارڈ:

1. تمام عملے اور خدمت گار افراد کو ایک نئے ڈیزائن کا شناختی کارڈ دیا جائے گا تاکہ صرف مجاز افراد ہی اسٹیشن میں داخل ہوسکیں۔

 

8. عملے کے لیے نیا ڈیزائن وردی:

1. تمام عملے کے ارکان کو نئے ڈیزائن کی وردیاں دی جائیں گی تاکہ بحران کی صورتحال میں ان کی آسانی سے شناخت کی جا سکے۔

 

9. اسٹیشن ڈائریکٹر کے عہدے کی اپ گریڈیشن:

1. تمام بڑے اسٹیشنوں میں ایک سینئر افسر اسٹیشن ڈائریکٹر ہوگا۔ دیگر تمام محکمے اسٹیشن ڈائریکٹر کو رپورٹ کریں گے۔
2. اسٹیشن ڈائریکٹر کو مالی اختیار حاصل ہوگا تاکہ وہ اسٹیشن کو بہتر بنانے کے لیے موقع پر فیصلے کر سکے۔

 

10.  صلاحیت کے مطابق ٹکٹوں کی فروخت:

1. اسٹیشن ڈائریکٹر کو اسٹیشن اور دستیاب ٹرینوں کی گنجائش کے مطابق ٹکٹوں کی فروخت کو کنٹرول کرنے کا اختیار دیا جائے گا۔

اس کے علاوہ، حفاظتی انتظامات اور مسافروں کے بہاؤ کو ہموار کرنے کے لیے، اسٹیشن کے لحاظ سے مخصوص منصوبے بنائے جاتے ہیں جن میں تمام اسٹیک ہولڈرز شامل ہوتے ہیں جن میں گورنمنٹ ریلوے پولیس (جی آر پی) مقامی پولیس اور مقامی شہری انتظامیہ شامل ہوتی ہے اور اس کے مطابق مسافروں کی آمد کو سنبھالنے کے لیے کارروائی کی جاتی ہے ۔ ابتدائی اسٹیشنوں پر اہم ٹرینوں میں سوار ہونے کے دوران لڑائی جھگڑا نہ ہو اس کے لیے قطار کا نظام قائم رکھاجاتا ہے۔
بھاری بھیڑ کے دوران بھگدڑ جیسی صورتحال سے بچنے اور مسافروں کو بروقت مدد فراہم کرنے کے لیے بھیڑ کو آسانی سے منظم کرنے کے لیے جی آر پی اور آر پی ایف کے عملے کو فٹ اوور برج پر تعینات کیا جاتا ہے۔ انٹیلی جنس یونٹس (سی آئی بی/ایس آئی بی) اور سادہ کپڑے کا عملہ بھیڑ کے بارے میں معلومات اکٹھا کرنے کے لیے تعینات کیا جاتا ہے اور اسی کے مطابق جی آر پی/پولیس کو منسلک کرنے کے انتظامات کیے گئے تھے۔
زیادہ بھیڑ والے دنوں میں، جب مسافروں کی  بڑے پیمانے پر آمد و رفت کی توقع ہوتی ہے، تو زونل ریلوے کو پلیٹ فارم ٹکٹ جاری کرنے کے عمل کو روک کر اسٹیشنوں میں داخلے کو محدود کرنے کا اختیار حاصل ہوتا ہے اور صرف ان افراد کو ٹکٹ جاری کیے جاتے ہیں جو اسٹیشن پر بوڑھے، ناخواندہ اور خواتین مسافروں کی مدد کے لیے آتے ہیں جو ریلوے اسٹیشنوں پر خود کی حفاظت کرنے کی صلاحیت نہیں رکھتے۔

-----------------------

ش ح۔ک ح ۔ ع ن

U No-9016

(Release ID: 2115633) Visitor Counter : 13