नवी दिल्ली, 20 मार्च 2025

संरक्षण मंत्री राजनाथ सिंह यांच्या अध्यक्षतेखाली, संरक्षण अधिग्रहण परिषदेने (डीएसी) 20 मार्च 2025 रोजी 54,000 कोटी रुपयांपेक्षा अधिक किमतीच्या आठ भांडवल अधिग्रहण प्रस्तावांना आवश्यकतेची स्वीकृती (एओएनएस) प्रदान केली. भारतीय सैन्यासाठी, T-90  रणगाड्यांसाठी सध्याच्या 1000 अश्वशक्ती इंजिनला अपग्रेड करण्यासाठी 1350 अश्वशक्ती इंजिन खरेदी करण्यासाठी एओएनएस प्रदान करण्यात आली. यामुळे शक्ती आणि वजन गुणोत्तर वाढवून विशेषतः उंचावरील प्रदेशात या रणगाड्यांची युद्धभूमी गतिशीलता वाढेल.

डीएसीने भारतीय नौदलासाठी,वरुणास्त्र टॉर्पेडो (लढाऊ) खरेदीसाठी एओएनएस प्रदान  केले. वरुणास्त्र टॉरपेडो हा नौदल विज्ञान आणि तंत्रज्ञान प्रयोगशाळेने विकसित केलेला स्वदेशी बनावटीचा जहाजावरून सोडला जाणारा पाणबुडीविरोधी टॉर्पेडो आहे. या टॉर्पेडोचा अतिरिक्त प्रमाणात समावेश केल्यामुळे शत्रूंच्या पाणबुडी धोक्यांविरोधात नौदलाची क्षमता वाढेल.

डीएसी ने भारतीय हवाई दलासाठी, एअरबोर्न अर्ली वॉर्निंग अँड कंट्रोल (AEW&C) विमान प्रणाली खरेदी करण्यासाठी एओएनला मान्यता  दिली. एअरबोर्न अर्ली वॉर्निंग अँड कंट्रोल सिस्टीम या क्षमता वाढवणाऱ्या प्रणाली आहेत ज्या युद्धाचे संपूर्ण परिदृश्य बदलू शकतात आणि प्रत्येक शस्त्र प्रणालीची लढाऊ क्षमता वेगाने वाढवू शकतात.

संरक्षण मंत्रालयात 2025 हे 'सुधारणांचे वर्ष' म्हणून साजरे करण्याचा भाग म्हणून, डीएसीने भांडवल अधिग्रहण प्रक्रियेच्या विविध टप्प्यांवरील कालमर्यादा कमी करण्यासाठी मार्गदर्शक तत्त्वांना मंजुरी  दिली, जेणेकरून ती जलद, अधिक प्रभावी आणि कार्यक्षम होईल.

N.Chitale/S.Kane/P.Malandkar

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai