ٹیکنالوجی پر مبنی تعاون کو مضبوط بنانے کی سمت میں ایک اہم قدم اٹھاتے ہوئے مائیکروسافٹ کے شریک بانی اور انسان دوست بل گیٹس نے، جو اس وقت بھارت کے دورے پر ہیں، مرکزی وزیر ڈاکٹر جتیندر سنگھ سے ملاقات کی اور بھارت کی اختراعی کوششوں اور بائیو مینوفیکچرنگ میں اضافے میں نجی شعبے اور اسٹارٹ اپ کی شرکت کو بڑھانے کے لیے تفصیلی بات چیت کی۔

دونوں فریقوں کے وفود کی مدد سے ہونے والی اس میٹنگ میں جین تھراپی، ویکسین کی اختراع، بائیو ٹیکنالوجی مینوفیکچرنگ اور ہندوستان کے ابھرتے ہوئے اسٹارٹ اپ ماحولی نظام میں پیش رفت کا احاطہ کیا گیا۔

ڈاکٹر جتیندر سنگھ نے زور دے کر کہا کہ وزیر اعظم نریندر مودی کی قیادت میں ہندوستان نے بائیو ٹیکنالوجی اختراعات میں اضافہ دیکھا ہے، جسے معیشت، روزگار اور ماحولیات کے لیے بائیو ای 3-بائیوٹیکنالوجی جیسی پالیسیوں کی حمایت حاصل ہے۔ انہوں نے تعاون کو فروغ دینے والی بائیوٹیکنالوجی صنعتی تحقیقی امدادی کونسل (بی آئی آر اے سی) جیسے منظم میکانزم کے ساتھ ہندوستان کے حیاتیاتی انقلاب کو چلانے میں نجی کھلاڑیوں اور اسٹارٹ اپس کے بڑھتے ہوئے کردار پر روشنی ڈالی۔

بل گیٹس نے ویکسین کی تیاری میں ملک کی قیادت کو تسلیم کرتے ہوئے بھارت کی بائیوٹیک ترقی کی تعریف کی، جس میں شراکت داری بھی شامل ہے جس کی وجہ سے ایچ پی وی اور کووڈ-19 ویکسین تیار ہوئیں۔ انہوں نے تپ دق اور ملیریا جیسی بیماریوں سے نمٹنے کے لیے ہندوستان کی کوششوں کی حمایت کرنے میں دلچسپی کا اظہار کرتے ہوئے کہا کہ ہندوستان کا تحقیقی ماحولی نظام عالمی صحت کی پیشرفت کے لیے بے پناہ مواقع پیش کرتا ہے۔

بحث کا ایک اہم موضوع ہندوستان کا بائیوٹیکنالوجی اسٹارٹ اپ بوم تھا، جس میں اب اس شعبے میں 10,000 سے زیادہ اسٹارٹ اپ کام کر رہے ہیں۔ ڈاکٹر جتیندر سنگھ نے نشاندہی کی کہ ان میں سے 70 فیصد طبی اور صحت بائیوٹیک پر مرکوز ہیں، باقی زراعت، ماحولیات اور صنعتی بائیوٹیکنالوجی میں حصہ ڈال رہے ہیں۔ انہوں نے ان اختراعات کو بڑھانے کے لیے حکومت کے عزم کو اجاگر کیا، جس میں فنڈنگ اور پالیسی اقدامات میں اضافہ کیا گیا ہے جس کا مقصد تیزی سے تجارتی کاری کو قابل بنانا ہے ۔

بل گیٹس اور ڈاکٹر جتیندر سنگھ نے گفٹ سٹی کے ذریعے ہندوستانی بائیوٹیک اسٹارٹ اپس میں براہ راست سرمایہ کاری کے مواقع تلاش کیے، جو ایک مالیاتی مرکز ہے جسے عالمی سرمایہ کاری کو آسان بنانے کے لیے ڈیزائن کیا گیا ہے ۔ گیٹس نے نوٹ کیا کہ اگرچہ بل اینڈ میلنڈا گیٹس فاؤنڈیشن بنیادی طور پر انسان دوستی کے شعبے میں کام کرتی ہے، لیکن نئے مالیاتی ڈھانچے سے فائدہ اٹھانے سے ہندوستانی اسٹارٹ اپس میں براہ راست سرمایہ کاری ممکن ہو سکتی ہے۔

جیسا کہ ہندوستان اپنی بائیوٹیکنالوجی کی ترقی کو تیز کر رہا ہے، ڈاکٹر جتیندر سنگھ نے اس بات کو یقینی بنانے کے لیے سرکاری-نجی شراکت داری کو فروغ دینے پر حکومت کی توجہ کا اعادہ کیا کہ یہ شعبہ ترقی کرتا رہے۔ تحقیق و ترقی کی بڑھتی ہوئی فنڈنگ اور بین الاقوامی تعاون کے ساتھ ہندوستان بائیوٹیکنالوجی اختراع کا عالمی مرکز بننے کے لیے تیار ہے۔

**********

ش ح ۔   م ع۔   م ت                                            

U - 8602