आर्थिक वर्ष 2024-25  संपण्याच्या जवज जवळ 18 दिवस आधी, गव्हर्नमेंट ई मार्केटप्लेस (जीईएम ) ने त्यांच्या पोर्टलवर 5 लाख कोटी रुपयांचे सकल व्यापारी मूल्य (जीएमव्ही ) ओलांडून एक महत्त्वाचा टप्पा गाठला आहे. ही कामगिरी सार्वजनिक खरेदीसाठी एक प्राथमिक साधन  म्हणून सरकारी ई-मार्केटप्लेसचा वेगवान विस्तार अधोरेखित करते.  जीईएम 1.6 लाखांहून अधिक सरकारी संस्थांच्या खरेदीदार वर्गाला सेवा पुरवते. उल्लेखनीय बाब म्हणजे, 23  जानेवारी 2025 रोजी मागील टप्पा ओलांडल्यापासून 50 दिवसांपेक्षा कमी कालावधीत 4  लाख कोटी रुपयांवरून 5  लाख कोटी रुपयांपर्यंतची झेप घेण्यात सरकारी ई-मार्केटप्लेसला यश मिळाले आहे. विक्रेत्यांसाठी बाजारपेठ पोहोच सुलभ करण्यासाठी सरकारी ई-मार्केटप्लेसने गेल्या काही महिन्यांत मोठ्या धोरणात्मक सुधारणा केल्या आहेत. व्यवहार शुल्कात कपात, विक्रेता मूल्यांकन शुल्क आणि कॉशन मनी यासारख्या प्रमुख उपक्रमांमुळे हा प्लॅटफॉर्म अधिक सुलभ झाला आहे, विशेषतः सूक्ष्म आणि लघु उद्योग (एमएसई), स्टार्टअप्स आणि महिलांच्या नेतृत्वाखालील उद्योगांना याचा फायदा झाला आहे.  13  फेब्रुवारी 2025  पर्यंत, 22 लाखांहून अधिक नोंदणीकृत विक्रेते आणि सेवा प्रदाते, वैविध्यपूर्ण आणि स्पर्धात्मक अशी खरेदी परिसंस्था असलेल्या जीईएमवर योगदान देत आहेत.

या वर्षी स्वायत्त - SWAYATT (स्टार्टअप्स, महिला आणि युवकांना ई व्यवहारांमधून लाभ )चा सहावा वर्धापन दिन देखील आहे.  हा उपक्रम सरकारी खरेदी चौकटीत प्राधान्य विक्रेता गटांना एकत्रित करण्याप्रति जीईएमची वचनबद्धता अधोरेखित करतो. 13  फेब्रुवारी 2025 पर्यंत, जीईएमने 29000 हून अधिक स्टार्टअप्स आणि 1.8 लाख उद्यम-सत्यापित महिला-नेतृत्वप्रणित व्यवसायांना यशस्वीरित्या सामील केले आहे. यामुळे अधिक समावेशकता आणि आर्थिक सक्षमीकरणाला चालना मिळाली आहे.

धोरणात्मक सुधारणांव्यतिरिक्त, खरेदी कार्यक्षमता वाढविण्यात तांत्रिक प्रगतीने महत्त्वपूर्ण भूमिका बजावली आहे. आर्थिक वर्ष 2024-25 मध्ये, जीईएमने भारतातील सरकारी संस्थेद्वारे सर्वात मोठ्या क्लाउड मायग्रेशनपैकी एक (क्लाऊड आधारित तंत्रज्ञानापैकी एक) पूर्ण केले आहे. या  मायग्रेशनमुळे प्लॅटफॉर्मची व्यापकता वाढेल, खरेदीदार आणि विक्रेते दोघांनाही सुरक्षित, विश्वासार्ह आणि निर्बाध  अनुभव मिळेल अशी अपेक्षा आहे.

***

S.Kane/H.Kulkarni/P.Kor

 

सोशल मिडियावर आम्हाला फॉलो करा: @PIBMumbai    /PIBMumbai    /pibmumbai  pibmumbai[at]gmail[dot]com

(Release ID: 2111971) Visitor Counter : 24