सामायिक लोकशाही मूल्ये, दोन्ही देशांच्या रहिवाश्यांमधील परस्पर संबंध व आर्थिक परस्परावलबित्व यांच्या मजबूत आधारावर भारत व न्यूझीलंड यांच्यातील दीर्घकालीन भागीदारी टिकून राहिली आहे. व्यापार व गुंतवणूक यांचा समावेश असलेल्या द्विपक्षीय संबंधांना पोषक वातावरण देण्यासाठी दोन्ही देशांनी सतत प्रयत्न केले आहेत.

न्यूझीलंडचे पंतप्रधान ख्रिस्तोफर लक्सन यांच्या 16 ते 20 मार्च 2025 दरम्यान होणाऱ्या भारत भेटीच्या निमित्ताने व दोन्ही देशातील बळकट आर्थिक सहकार्यभावनेत , एका सर्वसमावेशक व दोन्ही देशांना फायदेशीर ठरेल अशा भारत- न्यूझीलंड मुक्त व्यापार करार वाटाघाटींची सुरुवात झाली असल्याचे दोन्ही देश सहर्ष घोषित करत आहेत.

भारताचे वाणिज्य व उद्योग मंत्री  पीयूष गोयल व न्यूझीलंडचे व्यापार व गुंतवणूक मंत्री टॉड मॅक क्ले यांची 16 मार्च 2025 रोजी झालेली बैठक म्हणजे या दृष्टीने घेतलेले महत्वाचे पाऊल असून त्यामुळे दोन्ही देशांमधील आर्थिक व व्यापारी संबंधांची मजबूत पायाभरणी करणाऱ्या एका मोठ्या भागीदारीची सुरुवात होणार आहे.

भारत न्यूझीलंड यांच्यातील पुरवठा साखळ्यांची क्षमता वाढ व दोन्ही बाजारपेठांमधील खुलेपणा वाढवण्याच्या दृष्टीने समतोल परिणाम साधणे हे या मुक्त व्यापार करार वाटाघाटींचे  प्रमुख उद्दिष्ट आहे. या महत्वाच्या टप्प्यातून मजबूत आर्थिक भागीदारी व समृद्धीसाठी बलवर्धन करण्याचा सामायिक दृष्टीकोन प्रतिबिंबित होत आहे.

***

S.Kane/U.Raikar/P.Kor

सोशल मिडियावर आम्हाला फॉलो करा: @PIBMumbai    /PIBMumbai    /pibmumbai  pibmumbai[at]gmail[dot]com