महसूल गुप्तचर संचालनालयाने (डीआरआय) भारतीय तटरक्षक दलाच्या सहकार्याने केलेल्या संयुक्त कारवाईत 7 मार्च 2025 रोजी मालदीवकडे जाणाऱ्या एका टग-बार्ज जहाजातून 33 कोटी रुपये किमतीचे 29.954 किलो चरस तेल जप्त केले.

डीआरआय अधिकाऱ्यांना  तुतीकोरिनच्या जुन्या बंदरातून निघालेल्या दगडांनी भरलेल्या बार्जला ओढणाऱ्या एका टग जहाजाबद्दल विशिष्ट गोपनीय माहिती मिळाली होती. तुतीकोरिनमधील तस्करांच्या टोळीने जहाजावरच्या कर्मचाऱ्याच्या मदतीने मालदीवला जाणाऱ्या एका जहाजात प्रवासादरम्यान भर समुद्रात मोठ्या प्रमाणात हशिश ऑईल चढवल्याची माहिती अधिकाऱ्यांना मिळाली होती.

महसूल गुप्तचर संचालनालयाच्या सूचनेनुसार, भारतीय तटरक्षक दलाने 5 मार्च 2025 रोजी कन्याकुमारी किनाऱ्याजवळ  समुद्रात हे जहाज अडवले आणि 7 मार्च 2025 रोजी ते नव्या तुतीकोरिन बंदरात परत आणले.

दरम्यान, जहाजावर अंमली पदार्थ ठेवणाऱ्या व्यक्तीला आणि त्याच्या साथीदाराला अटक करण्यात आली. याव्यतिरिक्त, जहाज बंदरात आल्यानंतर जहाजाचे स्थान टोळीला सांगणाऱ्या जहाज कर्मचाऱ्यांला देखील पुढील चौकशीसाठी अटक करण्यात आली.

बार्जची तपासणी करताना अन्नपदार्थांचे वर्णन लिहिलेल्या 29 प्लास्टिक पॅकेट्स असलेल्या दोन पिशव्या जप्त करण्यात आल्या. या पॅकेट्सची तपासणी करण्यात आली आणि त्यात 'काळ्या रंगाचा पेस्टसारखा पदार्थ' आढळला. फील्ड टेस्ट किट वापरून या पदार्थाची चाचणी केली असता ते 'हशीश ऑइल' असल्याचे आढळले.

या कारवाईत एनडीपीएस कायदा  1985 च्या तरतुदींनुसार एकूण 29.954 किलो वजनाची 29 पाकिटे जप्त करण्यात आली. आंतरराष्ट्रीय काळ्या बाजारात यांची अंदाजे किंमत 32.94 कोटी रुपये इतकी आहे. तिन्ही आरोपींना अटक करण्यात आली असून त्यांना 8.03.2025 रोजी न्यायालयीन कोठडी सुनावण्यात आली आहे.

***

S.Kane/S.Mukhedkar/P.Kor

सोशल मिडियावर आम्हाला फॉलो करा: @PIBMumbai    /PIBMumbai    /pibmumbai  pibmumbai[at]gmail[dot]com