ڈائریکٹوریٹ آف ریونیو انٹیلی جنس (ڈی آر آئی) نے انڈین کوسٹ گارڈ (آئی سی جی) کے ساتھ مشترکہ آپریشن میں 7 مارچ 2025 کو مالدیپ کی طرف جانے والے ٹگ بارج جہاز سے 33 کروڑ روپے  مالیت کی 29.954 کلو گرام چرس کا تیل ضبط کیا۔

مخصوص خفیہ معلومات  پر عمل کرتے ہوئے، ڈی آر آئی کے اہلکاروں نے ایک جہاز دیکھا جو توتیکورن کی پرانی بندرگاہ سے روانہ ہوا تھا اور پتھروں سے لدے ایک بجرے کو کھینچ رہا تھا۔ یہ انکشاف ہوا ہے کہ توتیکورن میں مقیم ایک گینگ نے مالدیپ کے سفر کے دوران جہاز کے عملے کے ایک رکن کی مدد سے جہاز کے وسط سمندر میں بھاری مقدار میں چرس کا تیل لوڈ کیا تھا۔

ڈی آر آئی کے حکم پر، ہندوستانی کوسٹ گارڈ نے 5 مارچ 2025 کو کنیا کماری کے ساحل سے سمندر میں جہاز کو روکا اور اسے 7 مارچ 2025 تک توتیکورن نیو پورٹ پر واپس لایا۔

اس دوران جہاز میں منشیات ذخیرہ کرنے کے ذمہ دار شخص اور اس کے ساتھی کو گرفتار کر لیا گیا۔ مزید برآں، جہاز کے مقام کے بارے میں معلومات گینگ کے ساتھ شیئر کرنے والے عملے کے رکن کو بھی جہاز کے بندرگاہ پر پہنچنے کے بعد مزید تفتیش کے لیے گرفتار کر لیا گیا۔

جہاز کی تلاشی لینے پر دو تھیلے برآمد ہوئے جن میں پلاسٹک کے 29 پیکٹ تھے جن پر کھانے پینے کی اشیاء کی تفصیلات درج تھیں۔ پیکٹوں کی جانچ کی گئی اور ان میں 'کالے رنگ کا مائع پیسٹ جیسا مادہ' پایا گیا جسے فیلڈ ٹیسٹ کٹ کے ذریعہ جانچنے پر 'چرس کا تیل' پایا گیا۔

29 پیکٹوں میں مجموعی طور پر 29.954 کلو گرام چرس کا تیل برآمد کیا گیا جس کی مالیت غیر قانونی بین الاقوامی مارکیٹ میں 32.94 کروڑ روپے ہے جسے این ڈی پی ایس ایکٹ 1985 کے تحت ضبط کیا گیا۔ تینوں ملزمان کو گرفتار کر کے08 مارچ 2025 کو عدالتی تحویل میں بھیج دیا گیا ہے۔

۔۔۔۔۔۔۔۔۔۔۔۔۔۔۔۔۔۔۔۔۔

(ش ح ۔ رض۔ ن م  (

8016