राष्ट्रीय मानवाधिकार आयोग (NHRC) केंद्रीय परराष्ट्र व्यवहार मंत्रालयाच्या (MEA)  सहकार्याने, येत्या 3 ते 8 मार्च 2025 दरम्यान दिल्ली इथे विकसनशील राष्ट्रांच्या (ग्लोबल साऊथ) राष्ट्रीय मानवाधिकार संस्थांच्या (NHRCs) वरिष्ठ स्तरावरील अधिकाऱ्यांसाठी सहा दिवसीय भारतीय तांत्रिक आणि आर्थिक सहकार्य (आयटीईसी) कार्यकारी क्षमता बांधणी कार्यक्रम आयोजित करणार आहे.

विकसनशील देशांतील (ग्लोबल साऊथ) 14 देशांतील राष्ट्रीय मानवाधिकार संस्थांमधील 47 अधिकारी यात सहभागी होण्याची शक्यता आहे. त्यामध्ये मादागास्कर, युगांडा, समोआ, टिमोर लेस्टे, डीआर काँगो, टोगो, माली, नायजेरिया, इजिप्त, टान्झानिया, मॉरिशस, बुरुंडी, तुर्कमेनिस्तान, कतार या राष्ट्रांचा समावेश आहे. सहभागी देशांमधील राष्ट्रीय मानवाधिकार संस्थांच्या गरजा आणि पुर्वीच्या अभिप्रायानुसार हा सानुकूलित कार्यक्रम विकसित करण्यात आला आहे. क्षमता बांधणी आणि प्रशिक्षण क्षेत्रातील नामवंत तज्ज्ञ व्यक्ती यामध्ये प्रशिक्षण देतील. भारताच्या राष्ट्रीय मानवाधिकार आयोगाचे अध्यक्ष न्यायमूर्ती व्ही. रामासुब्रमणियम यांच्या हस्ते सोमवारी 3 मार्च 2025ला या कार्यक्रमाचे उद्घाटन होणार आहे.

मानवाधिकारांच्या विविध आयामांविषयी अंतर्दृष्टी प्रदान करणे, आंतरराष्ट्रीय दृष्टीकोन प्रदान करणे, आणि विविध राष्ट्रीय मानवाधिकार संस्थांच्या सहभागींमध्ये जागरुकता वाढवण्यात गेल्या तीन दशकांतला भारताचा अनुभव सामाईक करणे हा या कार्यक्रमाचा उद्देश आहे. विकसनशील(ग्लोबल साऊथ देशांतील) देशांमधील सहकार्य मजबूत करणे, सहभागिता आणि संपर्क जाळे वृद्धिंगत करणे आणि व्यापक क्षमता बांधणी आणि अनुभवांच्या सामायिकीकरणातून मानवाधिकारांच्या संरक्षण यंत्रणेत सुधारणा होईल असे याचे अपेक्षित परिणाम आहेत. त्यात मानवाधिकारांच्या आंतरराष्ट्रीय आयामाची चांगली समज विकसित करणे, मानवाधिकारांच्या संरक्षणासंदर्भात भारताच्या मानवाधिकार संरक्षण आयोगाचे काम आणि त्याच्या सर्वोत्तम पद्धतीं ज्या इतर मानवाधिकार संरक्षण आयोगांना स्वीकारता येऊ शकतील त्या सखोल समजून घणे, राष्ट्रीय मानवाधिकार संरक्षण आयोगांमधील संपर्कजाळ्यात झालेली सुधारणा, प्रादेशिक आणि आंतरराष्ट्रीय पातळीवर सहयोग आणि सहकार्य वृद्धिंगत करणे आणि मानवाधिकारांच्या संरक्षण आणि संवर्धनात योगदान देण्याची क्षमता वृद्धिंगत कऱणे यांचा समावेश आहे.

सहभागी व्यक्ती, या क्षेत्रातील अधिकारी, प्रसिद्ध व्यक्ती आणि प्रत्यक्ष कार्यकर्ते यांची व्याख्याने आणि संवादात्मक सत्रे, सांस्कृतिक कार्यक्रम आणि क्षेत्रभेटी यांमध्ये सहभाग घेतील. हा पुढाकार, राष्ट्रीय मानवाधिकार आयोगाच्या सुरू असलेल्या प्रयत्नांचा भाग आहे ज्यामध्ये मानवाधिकारांबद्दलची समज आणि विविध पैलूंविषयी जाण वाढवणे आणि राष्ट्रीय मानवाधिकार आयोगाच्या वरिष्ठ अधिकाऱ्यांमध्ये क्षमता बांधणी करण्यास मदत करणे यांचा समावेश आहे.

***

S.Patil/VSS/P.Kor

सोशल मिडियावर आम्हाला फॉलो करा: @PIBMumbai    /PIBMumbai    /pibmumbai  pibmumbai[at]gmail[dot]com