کوئلے کی وزارت نے آج کولکاتہ میں ’کوئلے کے شعبے میں امکانات اور کوئلے کی کمرشیل کانوں کی نیلامی‘کے موضوع پر ایک روڈ شو کا کامیابی سے انعقاد کیا ۔  کوئلے کی وزارت کے سکریٹری جناب وکرم دیو دت مہمان خصوصی تھے اور اس موقع پر کوئلے کی وزارت کی ایڈیشنل سکریٹری اور نامزد اتھارٹی محترمہ روپندر برار نے شرکت کی ، جس سے فریقین کی مدد کے لیے وزارت کے عزم کو تقویت حاصل ہوئی ۔  اس تقریب میں صنعت کاروں، سرمایہ کاروں اور  متعلقہ فریقوں کی پرجوش شرکت دیکھنے میں آئی ، جومسلسل اصلاحات اور شفاف پالیسیوں کے ذریعے کوئلے کے شعبے کو تبدیل کرنے کے لیے حکومت کے عزم کو ظاہر کرتی ہے ۔

وزارت کوئلہ کی  ایڈیشنل سکریٹری اور نامزد اتھارٹی محترمہ روپندر برار  نے اپنے استقبالیہ خطاب میں سرمایہ کاروں کو سرمایہ کاری کے پورے عمل میں ان کی مدد کرنے کے وزارت کے عزم کی یقین دہانی کرائی ۔  انہوں نے اس شعبے میں کاروبار کرنے میں آسانی کے لیے کلیئرنس کے ہموار عمل اور مسلسل اضافے پر زور دیا ۔  محترمہ برار نے کہا کہ وزارت تمام فریقوں کے لیے ایک ہموار سرمایہ کاری کویقینی بنانے کے لیے وقف ہے ، جسے ایک شفاف  انضباطی طریقہ کار اور تیز رفتار پروجیکٹ منظوریوں کی حمایت حاصل ہے ۔  انہوں نے کوئلے کے استعمال کے طریقوں کو متنوع بنانے ، ماحولیاتی اثرات کو کم کرنے اور کان کنی کی کارکردگی کو بڑھانے کے لیے کوئلے کی گیسی فیکیشن اور زیر زمین کان کنی کو فروغ دینے والی حکومت ہند کی ترقی پسند پالیسیوں کو بھی اُجاگر کیا۔ انہوں نے وزارت کی اچھی حکمرانی کے عزم کو بھی دہرایا، جو اعلیٰ معیار کی ایمانداری، جوابدہی اور شفافیت کے ساتھ کام کرتی ہے اور متعلقہ فریقوں کے ساتھ بات چیت،  ان کی رائے معلوم کرنے اور اشتراک کے لیے ہمیشہ تیار رہتی ہے۔

اپنے کلیدی خطاب میں کوئلے کی وزارت کے سکریٹری جناب وکرم دیو دت نے ہندوستان کے کوئلے کے وسائل کی غیر استعمال شدہ صلاحیت کو بروئے کار لانے کے لیے وزارت کے وژن پر زور دیا ۔  انہوں نے اس بات پر روشنی ڈالی کہ کس طرح جاری اصلاحات پائیدار ترقی کو فروغ دے رہی ہیں اور تمام فریقین کو باہمی فوائد فراہم کرنے کے ساتھ ساتھ ، اس بات کو یقینی بنایا جارہا ہے کہ ہندوستان کا کوئلہ شعبہ اقتصادی ترقی اور توانائی کی یقینی فراہمی کا ایک مضبوط محرک ثابت ہو ۔  جناب دت نے ریلوے کی وزارت کے ذریعے جلد منظوریوں میں تیزی لانے اور لاجسٹک سپورٹ بڑھانے کے لیے مختلف ریاستی حکومتوں اور ماحولیات اور جنگلات کی وزارت سمیت مختلف وزارتوں کے ساتھ وزارت کے فعال تال میل کا بھی ذکر کیا ۔  سکریٹری موصوف نے اس بات پر زور دیا کہ آنے والی نیلامیوں میں زیر زمین کان کنی کی اپنی جگہ ہوگی ، جو ماحولیاتی اثرات کو کم کرتے ہوئے کوئلہ نکالنے کے لیے ایک پائیدار اور موثر نقطہ نظر پیش کرے گی ۔

انہوں نے نجی کمپنیوں پر زور دیا کہ وہ نہ صرف کان کنی میں سرمایہ کاری کریں بلکہ ان کمیونٹیز کے لیے بھی بامعنی تعاون کریں جن کے بیچ وہ کام کرتے ہیں۔  انہوں نے اس بات پر زور دیا کہ صنعت پر معاشرے کے تئیں کئی ذمہ داریاں ہیں اور اسے شجرکاری ، بحالی اور فلاحی اقدامات میں نئے معیارات قائم کرنے کی کوشش کرنی چاہیے ۔  انہوں نے زور دے کر کہا کہ ہماری ترقی جامع ہونی چاہیے اور ہماری ترقی کا لوگوں اور کرہ ارض دونوں پر دیرپا ، مثبت اثر ہونا چاہئے۔

روڈ شو میں کوئلے کی کانوں کی آئندہ تجارتی نیلامیوں پر جامع پریزنٹیشنز پیش کی گئیں ، جس میں سرمایہ کاری کے امکانات اور پالیسی فریم ورک کے بارے میں نظریات پیش کیے گئے ۔  اس میں سرمایہ کاروں کو کلیدی فیصلہ سازوں کے ساتھ رابطہ قائم کرنے ، کاروبار کے نئے مواقع تلاش کرنے اور ہندوستان کے کوئلے کے شعبے کے منظر نامے کی گہری سمجھ بوجھ حاصل کرنے کے لیے ایک پلیٹ فارم بھی فراہم کیا  گیا۔

اس تقریب نے صنعت کاروں ، ممکنہ سرمایہ کاروں ، کان کنی کے ماہرین اور پالیسی سازوں سمیت متعلقہ فریقوں کے لیے نظریات کے تبادلے اور باہمی تعاون کے مواقع تلاش کرنے کے لیے ایک انٹرایکٹو پلیٹ فارم کے طور پر بھی کام کیا ۔  اسٹیک ہولڈرز نیلامی کے عمل پر وضاحت حاصل کرنے ، ریگولیٹری فریم ورک کو بہتر طور پر سمجھنے اور سرمایہ کاری کی ترغیبات کے بارے میں جاننے میں کامیاب رہے ۔  اس رابطے نے سرمایہ کاری کے لیے ساز گار ماحولیاتی نظام بنانے کے لیے وزارت کے عزم کی تصدیق کی ، اس بات کو یقینی بنایا کہ فریق کوئلے کے شعبے میں بڑھتے ہوئے مواقع سے فائدہ اٹھا سکیں اور ہندوستان کی توانائی کی یقینی فراہمی اور پائیدار ترقی میں تعاون کرسکیں۔

کولکاتہ میں روڈ شو کوئلے کی وزارت کی سرمایہ کاری کے نئے راستے کھولنے اور ہندوستان کے کوئلے کے شعبے میں ترقی کو فروغ دینے کی کوششوں میں ایک اہم سنگ میل کی نشاندہی کرتا ہے ، جس سے کوئلے کی پیداوار میں عالمی رہنما کے طور پر ملک کی پوزیشن کو مزید تقویت ملتی ہے ۔

***

U.No:7338

ش  ح۔ا  ع  خ ۔ ص  ج

(Release ID: 2104693) Visitor Counter : 33