U Myntri Rangbah duh Narendra Modi u la ai jingkren, ha ka prokram SAMVAD ba la pynlong ha Thailand, lyngba ka video message mynta ka sngi. Ha ka jingai jingkren ha ka jingialang, u la pynpaw ka jingsngewnguh jong u ban iadonlang bad ka bynta jong ka SAMVAD ha Thailand, u la ai jingiaroh ia ki kynhun bad ki briew na India, Japan bad Thailand kiba la pynlong ia kane ka prokram. U la ai khublei ia baroh ki nongiashim bynta.

U Myntri Rangbah duh u la shim ka kabu ban kynmaw ia u paralok jong u, Shinzo Abe, ha kaba u la ong ba ka jingthmu ia ka SAMVAD ka la mih na ki jingiakren jong ki ha u snem 2015. Naduh katei ka por, ka SAMVAD ka la long ha kylleng ki ri, ka la kyntiew ia ka jingiatainia, jingiakren, bad ka jingsngewthuh kaba kham jylliew.

Haba pynpaw ka jingsngewkmen jong u ba kane ka bynta jong ka SAMVAD ka long ha Thailand, ka ri kaba riewspah ha ka deiriti, histori bad ka hiar pateng, u Modi u la ban jur ba ka Thailand ka long ka nuksa kaba bha jong ka jingiadei ki jingngeit bad ki jingmut jingpyrkhat tynrai jong ka Asia.

Haba kren shaphang ka jingiadei kaba khlain jong ka deiriti hapdeng ka India bad Thailand, kaba la don palat ar hajar snem, u Myntri Rangbah duh u la ong ba ka Ramayana bad ka Ramakien ka la pyniasoh ia artylli ki ri bad ka jingmane jong ki ia u Bhagwan Buddha ka pyniatylli ia ki. U la ong haba ka India ka phah ia ki tiar ba kyntang jong u Bhagwan Buddha sha Thailand ha u snem ba la leit, da ki million ki riewngeit ki la wan ban pyndonburom. U Modi u la ban jur ba ka jingiadei ha ki kam bapher bapher hapdeng ka India bad Thailand, da kaba ong ba ka ‘Act East’ policy jong ka India bad ka ‘Act West’ policy jong ka Thailand ka iahap kawei ia kawei, kyntiew ia ka jingkiew shaphrang bad jingseisoh jong baroh artylli ki ri. U la ong ba kane ka jingialang kalong sa kawei ka bynta ba kongsan ha ka jingiadei paralok hapdeng ki artylli ki ri.

Ha ka jingban jur ia ka phang pdeng jong ka SAMVAD, kaba kren shaphang ki shi spah snem jong ka Asia, u Modi u la ong katba ki briew bunsien ki kren shaphang ka jingkiew ka ioh ka kot jong ka Asia, kane ka jingialang ka pyni ba ki shispah snem jong ka Asia kam dei tang shaphang ka jingngeit ha ka ioh ka kot hynrei shaphang ki jingngeit ha ka imlang sahlang. U la ban jur ba ki jinghikai jong u Bhagwan Buddha ki lah ban ialam lynti ia ka pyrthei sha ka juk kaba shongsuk shongsain bad kaba kiew shaphrang, bad ka jingshemphang jong u ka don ka bor ban ialam lynti sha ka lawei kaba peit shuwa ia ka bha ka miat jong ki briew.

Haba kren shaphang kawei na ki phang pdeng ba kongsan jong ka SAMVAD – ka jingkiar na ki jingiathut, u Myntri Rangbah duh u la ong ba ki jingiathut bunsien ki mih na ka jingngeit ba tang kawei ka lynti kalong kaba dei katba kiwei kilong kiba bakla. U la kren shaphang ka thong jong u Bhagwan Buddha halor kane ka jingeh, da kaba ong ba don katto katne ki briew kiba bat beit ia la ki jong ki jingsngew bad iatainia, bad ki peit tang ia kawei ka liang kum kaba dei. U la ong ba bun kiwei kiwei ki jingsngew ki don halor kajuh ka jingeh. U la kren shaphang ka Rig Veda, da kaba ong haba ngi pdiang ba ia ka jingshisha lah ban iohi lyngba ki rukom peit bapher bapher, ngi lah ban kiar na ka jingiathut.

U Modi u la kren shaphang kawei pat ka bynta ba wanrah ia ka jingiathut – ka jingpeit ia kiwei kum ka jingiapher nalade. U la ong ba ki jingiapher ki ialam sha ka jingiajngai, bad ka jingiajngai ka lah ban kylla sha ka jingiathut. Ban iakhun ia kane, u la shim ia kawei ka dkhot na ka Dhammapada, kaba ong ba baroh ki sheptieng ia ka jingshitom bad ka jingiap. U la ban jur ba lyngba ka jingithuh ia kiwei kum kiba iasyriem ialade, ngi lah ban pynthikna ba kam don ka jingma lane ka jingiaumsnam. U la bynrap ba lada bud ia kine ki kyntien, ngi lah ban kiar na ki jingiathut.

“Bun ki jingeh ha ka pyrthei ki mih na ka jingpyneh ha ka jaka jong ka jingpeit kaba ryntih”, la ong u Modi. U la kren shaphang ki jingsngew kiba ialam sha ki jingiathut, ki jingeh ba iadei bad ka mariang, bad wat ki jingeh ha ka koit ka khiah namar ka jingban khia. U la ong ba ka lad ban lait na kine ki jingeh ka shong ha ki jinghikai jong u Bhagwan Buddha, uba la kyntu ia ngi ban bud ia ka lynti kaba pdeng bad kiar na ki jingpyneh. Ka jingngeit ha ka jinglah ban tehlakam, u la ong, kalong kaba kongsan haduh mynta bad ialam lynti ban weng ia ki jingeh kylleng ka pyrthei.

U Myntri Rangbah duh u la ong ba ki jingiathut mynta ki bteng palat ia ki briew bad ki ri, ha kaba ki briew ki kham iatyngkhuh shuh shuh bad ka mariang.  U la ong ba kane ka la ialam sha ki jingeh ba iadei bad ka mariang kaba buh jingma ia ka pyrthei. U la ban jur ba ka jubab na ka bynta kane ka jingeh ka shong ha ki dustur jong ngi bad ka Asia, kaba don nongrim ha ki jingngeit jong ka Dhamma. U la ong ba ka Hinduism, Buddhism, Shintoism, bad kiwei kiwei ki dustur jong ka Asia ki hikai ia ngi ban im suk bad ka mariang. U la ong ba ngim lah ban iohi ialade ba ngi jngai na ka mariang hynrei ngi long shi bynta jong ka. U Modi u la kren shaphang ka kam shimti, kumba la pynshlur da u Mahatma Gandhi, bad ban jur haba pyndonkam ia ki jingdon jingem ka mariang na ka bynta ka jingkiew shaphrang mynta, ngi dei ban sngewthuh ruh ia ka jingbahkhlieh jong ngi ia ki pateng ban wan. U la ong ba kane ka rukom treikam ka pynthikna ba ia ki jingdon jingem la pyndonkam na ka bynta ka jingkiew shaphrang, ym na ka jingkhwan myntoi.

U Modi u la ong ba udei na Vadnagar, ka sorbah kaba rit ha ka phang sepngi jong ka India kaba ju long teng ka jaka pdeng jong ka jingioh jinghikai Buddhist.  Ha iing dorbar thawain Parliament jong ka ri, u mihkhmat ia ka Varanasi, kaba kynthup ka Sarnath, ka jaka kyntang ha kaba u Bhagwan Buddha u ai ka jingkren ba nyngkong jong u. U la ong ba kalong ka jingjia ryngkhat kaba sngewtynnad ba kine ki jaka ba don jingiadei bad u Bhagwan Buddha ka la saindur ia ka jingiaid lynti jong u.

“Ka burom jong ngi ia u Bhagwan Buddha ka paw ha ki polisi jong ka sorkar India,” la ong u Myntri Rangbah duh. U la ong ba ki la kyntiew ia ki jingdon jingem ba iadei bad kam jngoh kai ban pyniasoh ia ki jaka ba kongsan jong ki Buddhist kum shi bynta ka Buddhist Circuit. U la ong ba la plie paidbah ia ka rep ba kyrpang ka ‘Buddha Purnima Express’ ban pynsuk ia la leit ka wan hapoh kane ka circuit. U la ban jur ba ka jingplie ia ka kad liengsuin Kushinagar kadei ka sienjam ba kongsan kaba ai jingmyntoi ia ki pilkrim Buddhist nabar ri. U la pynbna ruh ia ki sienjam bapher bapher ba iadei bad ka jingkyntiew ia ka Bodh Gaya da kaba kyntiew ia ki jingdon jingem jong ka bad khot ia ki pilkrim, ki riewshemphang, bad ki monk na kylleng ka pyrthei ban wan jngoh ia ka India, ka jaka jong u Bhagwan Buddha.

Da kaba ong ba ka Nalanda Mahavihara kadei kawei na ki skulbah ba kongsan ha ka histori, ba la pynjot ha ki spah snem ba mynshuwa da ki bor jong ka jingiathut, u Myntri Rangbah duh u la ban jur ba ka India ka la pyni ka jingkut jingmut ban khyllie im biang ia ka kum ka jaka iohi jinghikai bad pynpaw ka jingngeit skhem ba ka Nalanda University kan ioh biang ia ka burom barim lyngba ki jingkyrkhu jong u Bhagwan Buddha. U la kren shaphang ka sienjam ba kongsan ba la shim ban kyntiew ia ka Pali, ka ktien kaba u Bhagwan Buddha u ju ai ki jinghikai jong u, da kaba pynbna ia ka kum ka classical language ban pynthikna ka jingpynneh pynsah ia ki jingthoh jong ka. U la kren ruh shaphang ka jingplie ia ka Gyan Bharatam mission ban ithuh bad buh jingtip shaphang ki jingthoh ba kyntang, ka jingpynshlur ban buh jingtip bad pynkylla digital na ka bynta ka jingmyntoi jong ki briew kiba pule shaphang ka Buddhism.

U Modi u la kren shaphang ka jingiatreilang bad ki ri ba bun ha ki shiphew snem ba la leit ban kyntiew ia ki jinghikai jong u Bhagwan Buddha. U la ong ba la pynlong dang shen ia ka Asian Buddhist Summit ba nyngkong ha India hapoh ka phang pdeng ‘The Role of Buddha Dhamma in Strengthening Asia,’ bad hashuwa kane, ka India ka la pynlong ia ka Global Buddhist Summit kaba nyngkong. U la kren shaphang ka burom ban buh ia u maw nongrim na ka bynta ka India International Center for Buddhist Culture & Heritage ha Lumbini, Nepal, bad ka jingnohsynniang ka India ban shna ia ka Lumbini Museum. Shuh shuh, u la kren shaphang ka jingshon biang bad jingsam ia ka ‘Concise Orders’ jong u Blei Buddha, Mongolian Kanjur kaba 108 volumes sha ki monastery ha Mongolia. U la ong ba ki sienjam jong ka India ban pynneh pynsah ia ki jingtei ha bun ki briew ka pynkhlain ia ka jingkut jingmut ka pateng jong u Bhagwan Buddha.

U Myntri Rangbah u la ong ba kalong kaba ai mynsiem ba kane ka bynta jong ka SAMVAD ka pynlong ia ka jingiamir jingmut shaphang ka jingngeit, kaba wanrah lang ia ki nongialam niam bapher bapher. U la pynpaw ka jingngeit skhem ba ki jingsngewthuh ba mih na kane ka rynsan, ka saindur ia ka pyrthei kaba kham jai jai. U Modi u la ai jingsngewnguh ia ki briew bad ka sorkar Thailand kaba la pynlong ia kane ka jingialang. U la kitbok kitrwiang ia baroh ki nongiashim bynta kiba la iadonlang ban kyntiew ia kane ka jingthmu kaba bha. U la pynkut da kaba pynpaw ka jingkyrmen ba ka jingshai jong ka Dhamma kan bteng ban ialam lynti ia ngi sha ka juk jong ka shongsuk shongsain, ka jingkiew shaphrang bad ka jingseisoh.

***