لوک سبھا کے اسپیکر جناب اوم برلا نے آج قانون سازوں پر زور دیا کہ وہ سیشن کے دوران ایوان کی کارروائی کے ساتھ فعال طور پر مشغول رہیں اور ابھرتے ہوئے تمام نقطہ نظر کو سنیں، جس سے انہیں عوامی مسائل کو سمجھنے اور ان سے نمٹنے کے لیے ایک وسیع تناظر تیار کرنے میں مدد ملے گی۔

پارلیمنٹ ہاؤس کے احاطے میں مہاراشٹرا قانون ساز اسمبلی اور مہاراشٹر قانون ساز کونسل کے نومنتخب اراکین کے لیے ایک اورینٹیشن پروگرام کے افتتاحی اجلاس سے خطاب کرتے ہوئے، لوک سبھا کے اسپیکر جناب اوم برلا نے قانون سازی سے متعلق کارروائیوں میں اراکین کی کم ہوتی ہوئی شرکت اور اس کے نتیجے میں سیاسی تعطل پر تشویش کا اظہار کیا۔ انہوں نے قانون ساز اداروں کے اجلاسوں کی تعداد میں کمی اور مقننہ میں کم اثرانگیزی کی صلاحیت پر بھی تشویش کا اظہار کیا۔

اس امر پر زور دیتے ہوئے کہ مقننہ میں منصوبہ بند رکاوٹیں آئین کی جمہوری روح کے خلاف ہیں، جناب برلا نے قانون سازوں پر زور دیا کہ وہ ایوان کی کارروائی میں رکاوٹ پیدا کیے بغیر، سوال کے وقفے جیسے موثر قانون سازی کے وسیلے کا استعمال کرتے ہوئے عوامی مسائل اٹھائیں۔ انہوں نے قانون سازوں کو یہ بھی مشورہ دیا کہ وہ ایوان میں بحث کے لیے حقائق کے ساتھ تیار رہیں۔ جناب برلا نے کہا کہ قانون ساز جتنے زیادہ تیار ہوں گے، ان کی شرکت اتنی ہی زیادہ موثر ہوگی، اور ایوان کی کارروائی اتنی ہی زیادہ نتیجہ خیز ہوگی۔ انہوں نے کہا کہ بہترین قانون ساز وہ ہے جو ایوان کی کارروائی میں پوری طرح حصہ لے اور پارلیمانی طریقہ کار کو سمجھ کر اچھی طرح تحقیقی، منطقی گفتگو میں حصہ لے۔

آئین اور جمہوریہ کے 75 سال مکمل ہونے پر، جناب برلا نے کہا کہ یہ فخر کی بات ہے کہ ہندوستان دنیا کی سب سے بڑی جمہوریت ہے، اور یہ کہ ہندوستانی آئین سب کو یکساں حقوق اور اظہار رائے کی آزادی فراہم کرتا ہے۔

مہاراشٹر قانون ساز اسمبلی کی پیداواری صلاحیت کی ستائش کرتے ہوئے، جناب برلا نے کہا کہ جہاں یہ بات تشویشناک ہے کہ قانون ساز اداروں کے اجلاسوں کی تعداد عام طور پر کم ہو رہی ہے، وہیں دیگر ریاستی اسمبلیوں کے مقابلے مہاراشٹر کی قانون ساز اسمبلی کی اثر انگیزی کی صلاحیت قابل ستائش ہے۔ مہاراشٹر قانون ساز اسمبلی کی شاندار تاریخ کا ذکر کرتے ہوئے، جناب برلا نے ذکر کیا کہ 1937 میں اس کے قیام سے ہی اس نے سماجی و اقتصادی تبدیلیوں کی بنیاد رکھی ہے۔ انہوں نے منتخب نمائندوں سے کہا کہ ایسے جمہوری نظام کا حصہ ہونا فخر کی بات ہے۔ جناب برلا نے مزید کہا کہ مہاراشٹر نے تحریک آزادی، سماجی اصلاح اور روحانیت میں اہم کردار ادا کیا ہے، جس سے ریاست کو قوم کے لیے ایک تحریک بنایا گیا ہے۔

موثر قانون سازی کے مسودے کی اہمیت اور پارلیمانی کمیٹیوں کی اثرانگیزی پر زور دیتے ہوئے، جناب برلا نے رائے دی کہ کسی بھی قانون ساز کے لیے قانون سازی کے عمل کے دوران مناسب قانون سازی کے مسودے کو یقینی بنانا ایک اہم ذمہ داری ہے، کیونکہ قانون سازی کے مسودے میں ایک چھوٹی سی غلطی بھی ہمارے لوگوں کے لیے طویل مدتی اثرات مرتب کر سکتی ہے۔ انہوں نے کہا کہ قانون سازی کے دوران ایوان میں وسیع بحث ہونی چاہیے، تاکہ عوامی فلاح و بہبود کے معاملات مثبت انداز میں قانون کا حصہ بنیں۔

پارلیمانی کمیٹیوں کو "چھوٹی پارلیمنٹ" بتاتے ہوئے جناب برلا نے تمام منتخب نمائندوں پر زور دیا کہ وہ کمیٹی کی کارروائیوں میں سرگرمی سے حصہ لیں۔ انہوں نے اس بات پر زور دیا کہ قانون سازوں کو اس امر کو یقینی بنانا چاہیے کہ حکومتی اخراجات سماجی و اقتصادی تبدیلی کی طرف ہوں، خاص طور پر پبلک اکاؤنٹس اور تخمینہ کمیٹیوں میں، تاکہ منتخب نمائندے عوامی بہبود کے لیے مثبت نتائج پیش کر سکیں۔

پارلیمانی تحقیق و ترقی کا ادارہ برائے جمہوریت(پرائڈ) کے زیر اہتمام اورینٹیشن پروگرام کی اہمیت کا ذکر کرتے ہوئے، جناب برلا نے نوٹ کیا کہ پروگرام میں شرکت کرنے والے قانون ساز پارلیمانی طریقہ کار، روایات اور مختلف ریاستوں میں قانون ساز اداروں کے کام کاج کے بارے میں گہرائی سے جانکاری حاصل کریں گے، جس سے انہیں اپنے پارلیمانی فرائض کو مؤثر طریقے سے ادا کرنے میں مدد ملے گی۔ انہوں نے مزید کہا کہ پارلیمانی کام کو سمجھنے اور مؤثر طریقے سے انجام دینے کے لیے مسلسل تعلیم و تربیت ضروری ہے۔

جناب برلا نے منتخب نمائندوں کو نصیحت کی کہ وہ اپنے کام کو صرف حلقہ بندیوں کے مسائل تک محدود نہ رکھیں بلکہ ریاستی سطح کے مسائل اور چنوتیوں سے بھی نمٹیں، جس سے ایک مثبت نقطہ نظر کے ساتھ سماجی و اقتصادی تبدیلی لائی جائے۔

اس موقع پر مہاراشٹر قانون ساز اسمبلی کے اسپیکر ایڈوکیٹ راہل نارویکر نے اجتماع سے خطاب کیا اور لوک سبھا اسپیکر جناب اوم برلا کا شکریہ ادا کیا۔ جناب نارویکر نے کہا کہ تمام قانون سازوں کو آئین کی دفعات پر عمل کرنا چاہیے اور اپنے اعمال کو معاشرے کے سامنے ایک رول ماڈل کے طور پر پیش کرنا چاہیے، تاکہ پارلیمانی جمہوریت میں لوگوں کا اعتماد مضبوط ہو۔ انہوں نے پارلیمانی کام میں منصوبہ بند رکاوٹوں کے منفی اثرات کو بھی اجاگر کیا اور بہتر طریقے اپنانے کی ضرورت پر زور دیا۔ مہاراشٹر قانون ساز کونسل کے چیئرمین شری رام شندے نے بھی اس موقع پر شریک قانون سازوں سے خطاب کیا۔

لوک سبھا کے سکریٹری جنرل جناب اُتپل کمار سنگھ نے افتتاحی خطاب کیا۔ اس موقع پر، جناب برلا نے آئین ہند کی تمہید کو برقرار رکھنے کا حلف لینے میں  قانون سازوں کی قیادت کی۔

**********

 (ش ح –ا ب ن)

U.No:6377