মহাকুম্ভ ২০২৫-ত, লক্ষ লক্ষ ভক্তই প্ৰয়াগৰাজৰ ত্ৰিবেণী সংগমত পবিত্ৰ ডুব দিছে। ইয়াৰ মাজতে মেলাত বিভিন্ন প্ৰদৰ্শনী মণ্ডপত সাহিত্য, সংস্কৃতি আৰু জ্ঞানৰ এক অবিৰত ধাৰা দেখা গৈছে। ভক্তসকলৰ বৌদ্ধিক সমৃদ্ধিৰ বাবে কেন্দ্ৰীয় চৰকাৰৰ মন্ত্ৰণালয়সমূহে মহাকুম্ভত বিশেষ ব্যৱস্থা কৰিছে, যিয়ে সাধাৰণ জনতাক কেৱল চৰকাৰী যোজনা আৰু সাফল্যৰ বিষয়ে জনোৱাই নহয়, আধুনিক প্ৰযুক্তিৰ জৰিয়তে এই যোজনাসমূহক অধিক ভালদৰে বুজিবলৈও সুযোগ দিছে। এই প্ৰসংগত, শিক্ষা মন্ত্ৰণালয়ৰ অধীনত স্বায়ত্তশাসিত সংস্থা নেশ্বনেল বুক ট্ৰাষ্টে (NBT) এক অভিনৱ পদক্ষেপ গ্ৰহণ কৰি মেলাত এখন পঠন লাউঞ্জ স্থাপন কৰিছে, য’ত ভক্তসকলে বিনামূলীয়াকৈ কিতাপ পঢ়িব পাৰে আৰু জ্ঞানৰ এই মহান মেলাৰ সাহিত্যিক আনন্দ উপভোগ কৰিব পাৰে।

এনবিটিৰ পঠন লাউঞ্জখন প্ৰয়াগৰাজৰ পেৰেড গ্ৰাউণ্ড, ছেক্টৰ ১-ৰ নমামি গংগা পেভিলিয়নৰ ভিতৰত স্থাপন কৰা হৈছে, আৰু ই ভক্তসকলৰ মাজত অতি জনপ্ৰিয় হৈ পৰিছে। এই লাউঞ্জত ভাৰতীয় দৰ্শন, ভাৰতীয় সংস্কৃতি আৰু কুম্ভ মেলাৰ ওপৰত আধাৰিত সাহিত্যকে ধৰি মুঠ ৬১৯ কিতাপৰ শিৰোনাম উপলব্ধ কৰা হৈছে। ভক্তসকলৰ আগ্রহৰ কথা বিবেচনা কৰি, ‘কুম্ভ কে মেলা মে মংগলৱাসী’, ‘ভাৰত মে কুম্ভ’, আৰু ‘এ ভিজিট টু কুম্ভ’ৰ দৰে কিতাপসমূহ উপলব্ধ কৰা হৈছে। হিন্দী আৰু ইংৰাজীৰ উপৰিও অন্যান্য ভাষাত কিতাপ উপলব্ধ কৰা হৈছে, যাতে হিন্দী নজনা ভক্তসকলেও এই সুবিধাৰ পৰা উপকৃত হ’ব পাৰে। বিশেষকৈ প্ৰধানমন্ত্ৰী যুৱ যোজনাৰ অধীনত যুৱ লেখকসকলৰ দ্বাৰা লিখা কিতাপসমূহ প্ৰদৰ্শন কৰা হৈছে, যিয়ে নতুন লেখকসকলক উৎসাহিত কৰিছে।

এনবিটিৰ বিপণন বিষয়া, আশীষ ৰায়ে উল্লেখ কৰিছে যে মহাকুম্ভত ভাৰতৰ সংস্কৃতিৰ ওপৰত আধাৰিত কিতাপসমূহৰ চাহিদা বেছি। ফলত এই লাউঞ্জত সাংস্কৃতিক সাহিত্যক বিশেষ গুৰুত্ব দিয়া হৈছে। হিন্দী নজনা ভক্তসকলে গংগা নদীৰ বিষয়ে লিখা ‘দ্য গংগা’, ‘বেদ কল্পতৰু’, আৰু ‘এনচিয়েণ্ট তামিল লেজেণ্ড’ৰ দৰে কিতাপসমূহৰ প্ৰতি বিশেষ আগ্ৰহ দেখুৱাইছে। এই লাউঞ্জৰ আন এটা বৈশিষ্ট্য হ’ল যে যদি কোনো ভক্তই এখন কিতাপ ভাল পায়, তেন্তে তেওঁলোকে ২৫% ৰেহাইৰ সৈতে কিতাপখন কিনিব পাৰে।

এনবিটিয়ে মহাকুম্ভ ২০২৫-ত ‘এনবিটি পুস্তক পৰিক্ৰমা’ (ম’বাইল কিতাপ প্ৰদৰ্শনী)ৰ ব্যৱস্থা কৰিছে, য’ত ১,১৫০ কিতাপৰ শিৰোনাম উপলব্ধ কৰা হৈছে। এখন ম’বাইল কিতাপ প্ৰদৰ্শনী বাছ চলোৱা হৈছে, য’ত ভক্তসকলে কুম্ভ কেম্পাছত ঘূৰি ফুৰোতে নিজৰ পছন্দৰ কিতাপসমূহ চাব আৰু কিনিব পাৰে। ইয়াৰ উপৰিও, শিক্ষা মন্ত্ৰণালয়ৰ ৰাষ্ট্ৰীয় ই-লাইব্ৰেৰীৰ বিষয়ে তথ্য প্ৰদান কৰা হৈছে, য’ত ভক্তসকলক তেওঁলোকৰ ম’বাইল ফোনত ৰাষ্ট্ৰীয় ই-লাইব্ৰেৰী এপ ইনষ্টল কৰি কিউআৰ ক’ড স্কেন কৰি হাজাৰ হাজাৰ ই-কিতাপ লাভ কৰিব পৰাকৈ তথ্য দিয়া হৈছে।

মেলাত এনবিটিৰ পঠন লাউঞ্জে ভক্তসকলৰ বাবে এটা সমৃদ্ধ বৌদ্ধিক অভিজ্ঞতা প্ৰদান কৰাৰ লগতে সাহিত্য, সংস্কৃতি আৰু ডিজিটেল জ্ঞানৰ এক নতুন ধাৰা সৃষ্টি কৰিছে। এই উদ্যোগে ভক্তসকলক ধাৰ্মিক, আধ্যাত্মিক আৰু সমসাময়িক সাহিত্যৰ ওচৰ চপাই আনিছে, যিয়ে মহাকুম্ভক কেৱল বিশ্বাসৰ কেন্দ্ৰ হিচাপেই নহয়, জ্ঞান, সংস্কৃতি আৰু সাহিত্যৰ এক অসাধাৰণ মিলনস্থলী হিচাপেও গঢ়ি তুলিছে।

*****

AD/VM/AA