భారత 76వ గణతంత్ర దినోత్సవం సందర్భంగా  కౌశల్ భవన్‌లో నిర్వహించిన ఒక ప్రత్యేక కార్యక్రమంలో  కేంద్ర నైపుణ్యాభివృద్ధి, ఔత్సాహిక పారిశ్రామికత్వ శాఖ సహాయ మంత్రి (స్వతంత్ర), విద్యాశాఖ  సహాయ మంత్రి శ్రీ జయంత్ చౌధరి మన దేశంలో వివిధ ప్రాంతాల్లో నైపుణ్యాలకు సంబంధించిన విస్తారిత అనుబంధ వ్యవస్థ ( స్కిల్ ఇకో సిస్టమ్)లో ఘన విజయాలను సాధించిన 100 మంది ప్రముఖ ఔత్సాహిక పారిశ్రమికవేత్తలను సన్మానించారు. భారత ప్రభుత్వం ఆహ్వానించిన ఈ ఔత్సాహిక పారిశ్రామికవేత్తలను స్కిల్ ఇండియా మిషన్‌లో భాగంగా దేశ వృద్ధి, నవకల్పనలను వేగంగా ముందుకు తీసుకుపోవడంలో కీలక పాత్రను పోషించినందుకు గణతంత్ర దినోత్సవ పరేడ్‌లో ప్రత్యేక అతిథులుగా కూడా గౌరవించారు. 

దావోస్‌లో నిర్వహించిన వరల్డ్ ఎకనామిక్ ఫోరమ్ - డబ్ల్యూఈఎఫ్ 2025 వార్షిక సమావేశంలో పాల్గొని తిరిగి వచ్చిన శ్రీ చౌధరి వ్యాపార రంగంలో ప్రపంచ ప్రముఖులతో తాను నిర్వహించిన సంభాషణల సారాంశాన్ని ఈ కార్యక్రమంలో పంచుకొన్నారు. ‘‘భారత్‌కు చెందిన నైపుణ్యం గల కార్మికులకు ప్రపంచంలో గొప్ప గుర్తింపు లభిస్తోంది. మన ప్రతిభావంతులకు వేనోళ్ల ప్రశంసలు దక్కుతున్నాయి. మనం ప్రపంచంలో నైపుణ్య రాజధానిగా ఎదుగుతుండడం శ్రేష్ఠత్వానికి మనం ఎంతగా కట్టుబడి ఉన్నామో తెలిపే నిదర్శనంగా ఉంది’’ అని మంత్రి అన్నారు. దావోస్‌లో జరిపిన చర్చలలో దీర్ఘకాలికత్వం, క‌ృత్రిమ మేధ (ఏఐ) వంటి అత్యాధునిక టెక్నాలజీలు, మహిళల నాయకత్వంలో అభివృద్ధి సాధనపై అమిత శ్రద్ధ వంటి అంశాలు చోటుచేసుకున్నాయని ఆయన అన్నారు. 

భారతదేశంలో అంకుర సంస్థల విస్తారిత అనుబంధ వ్యవస్థ ప్రపంచంలోనే అతి పెద్దది. 118 యూనికార్న్‌లు మన దేశంలో ప్రస్తుతం పనిచేస్తున్నాయి. వీటి విలువ 354 బిలియన్ (35400 కోట్ల) డాలర్లు. దార్శనిక విధానాలు, వాటిని తు.చ. తప్పకుండా అమలు చేయడంతోపాటు ఔత్సాహిక పారిశ్రామికవేత్తల ధీరత్వాలతో ఈ విజయం సాధ్యపడింది. ఎంఎస్ఎంఈ రంగం పోషిస్తున్న కీలక పాత్రకు ప్రాధాన్యాన్ని ఇస్తున్న అంశం కూడా ప్రస్తావనకు వచ్చింది. ఈ రంగంలో 63 మిలియన్ (6 కోట్ల 30 లక్షల) వ్యాపార సంస్థలు పనిచేస్తున్నాయి. ఈ సంస్థలలో 11 కోట్ల మందికి పైగా ఉపాధిని పొందుతున్నారు. జీడీపీ (స్థూల దేశీయోత్పత్తి)లో 30 శాతం వాటాతోపాటు ఎగుమతుల్లో 45 శాతం వాటాను సమకూరుస్తోంది ఈ రంగమే. దీనికి అదనంగా, స్కిల్ ఇండియా మిషన్ గణనీయ మార్పులకు కారణమవుతూ తన ప్రభావాన్ని చూపుతోందన్న విషయాన్నీ, యువతకు సాధికారతను కల్పించడంలో, మన దేశాన్ని స్వయంసమృద్ధమైంది (ఆత్మనిర్భర్ భారత్)గా మలచడంలో స్కిల్ ఇండియా మిషన్ పోషిస్తున్న పాత్రనూ లెక్కలోకి తీసుకొన్నారు.

నైపుణ్యం సాధించిన ప్రతిభావంతుల నిలయంగా భారత్‌ పేరు తెచ్చుకోవడానికి తోడ్పడిన ఔత్సాహిక పారిశ్రామికవేత్తలను శ్రీ జయంత్ చౌధరి అభినందించారు. ‘‘ఈ జాతీయ సంబరంలో 100 మంది ఔత్సాహిక పారిశ్రామికవేత్తలు పాలుపంచుకోవడం మన నైపుణ్య సాధన ప్రధాన కార్యక్రమాలు ప్రభావాన్ని చాటుతోంది. ఈ కార్యక్రమాలు దేశమంతటా వ్యక్తులకు సాధికారతను కల్పించి, దీర్ఘకాలం పాటు మనుగడలో ఉండగల జీవనోపాధి మార్గాలను ఏర్పరిచాయి. అంతేకాక, ఔత్సాహిక పారిశ్రామికవేత్తలుగా ఎదగాలని ఇతరులకు సైతం ప్రేరణనిస్తున్నాయి’’ అని ఆయన అన్నారు.

రాజస్థాన్,ఉత్తరప్రదేశ్, ఉత్తరాఖండ్, ఛత్తీస్‌గఢ్‌లతోపాటు ఈశాన్య ప్రాంతాల వంటి విభిన్న ప్రాంతాలకు చెందిన ఈ ఔత్సాహిక పారిశ్రామికవేత్తలు ఎంతో శ్రమిస్తున్నారని మంత్రి ప్రధానంగా చెప్పారు. ఝార్ఖండ్ లో రాంగఢ్ నివాసి శ్రీ రితేంద్ర ప్రసాద్ అనే ఔత్సాహిక పారిశ్రామికవేత్తకు ప్రత్యేక గుర్తింపును ఇచ్చారు. ఆయన ఏబీఐటీ చెన్నైలో ఎలక్ట్రికల్స్ అండ్ ఎలక్ట్రానిక్స్‌లో పట్టభద్రుడయ్యారు. సౌర శక్తి రంగంలో పది సంవత్సరాల అనుభవాన్ని సంపాదించారు. ఎన్ఐఈఎస్‌బీయూడీ (ది నేషనల్ ఇనిస్టిట్యూట్ ఫర్ ఆంట్రప్రనర్‌షిప్ అండ్ స్మాల్ బిజినెస్ డెవలప్‌మెంట్)  లో ఈడీపీ (ఆంట్రప్రనర్‌షిప్ డెవలప్‌మెంట్ ప్రోగ్రామ్) కోర్సును చదువుకుని మరీ తన సొంత సౌర శక్తి ప్రధాన వ్యాపారాన్ని మొదలుపెట్టారు.

దేశ ఈశాన్య ప్రాంతానికి చెందిన 16 మంది మార్గదర్శక ఔత్సాహిక పారిశ్రామికవేత్తలను సమాదరించడం ఈ కార్యక్రమంలో ముఖ్య ఆకర్షణగా నిలిచింది. ఈ 16 మందిలోనూ ఆరుగురు మహిళా ఔత్సాహిక పారిశ్రామికవేత్తలు కూడా ఉన్నారు. మళ్లీ వారిలో అసోం లోని ధుబ్రి జిల్లాకు చెందిన శ్రీమతి నమిత ఎం. మారక్, ఉడల్‌గురీ జిల్లాకు చెందిన శ్రీమతి మందిర బగ్‌లారీల గురించి చెప్పుకోవాలి. వీరు పెద్ద సవాళ్లను దీటుగా ఎదురొడ్డి తమ ధీరత్వాన్ని చాటుకొని సఫలమయ్యారు. వారి గాథలు  గణనీయ మార్పులకు కారణమయ్యే  నైపుణ్యాభివ‌ద్ధికున్న శక్తినీ, ఔత్సాహిక పారిశ్రామికత్వ స్ఫూర్తినీ ప్రత్యేకించి గ్రామీణ ప్రాంతాలు, ప్రయోజనాలకు అంతగా నోచుకోని ప్రాంతాల్లోని మహిళల ఔత్సాహిక పారిశ్రామికత్వ స్ఫూర్తినీ చాటిచెబుతున్నాయి.
రాజ్యాంగాన్ని సన్మానించడం
భారత రాజ్యాంగ సుదీర్ఘ వారసత్వం మన దేశంలో ప్రజాస్వామిక సంప్రదాయాలకు వెన్నెముకగా ఉంటూ సమానత్వాన్ని, న్యాయాన్ని, అవకాశాలను పదిలంగా ఉంచుతోందని కూడా మంత్రి అన్నారు.
ఈ కార్యక్రమంలో  నైపుణ్యాభివృద్ధి, ఔత్సాహిక పారిశ్రామికత్వ మంత్రిత్వ శాఖ (ఎంఎస్‌డీఈ) సంయుక్త కార్యదర్శి హీనా ఉస్మాన్ సహా ఉన్నతాధికారులు, సిబ్బంది పాల్గొన్నారు. అంతక్రితం అంటే శనివారం, 100 మంది ఔత్సాహిక పారిశ్రామికవేత్తలు పీఎం మ్యూజియాన్ని కూడా సందర్శించారు.

ఈ ఉత్సవం మన దేశానికి ఒక గర్వకారణమైన సందర్భంగా చెప్పాలి. ప్రభుత్వం అమలు చేస్తున్న కార్యక్రమాలతోపాటు దేశంలోని నైపుణ్యం కల కార్మికుల ఘనతలను ఈ కార్యక్రమం కళ్లకు కట్టింది. అలాగే ఔత్సాహిక పారిశ్రామికత్వం అన్ని వర్గాలనూ వెంట తీసుకు ముందుకు సాగుతూ ఒక ఉజ్జ్వల భవితపై ఆశలను రేకెత్తించింది.

***