زراعت اور کسانوں کی بہبود اور دیہی ترقی کے مرکزی وزیر جناب شیوراج سنگھ چوہان نے آج بہار کے سمستی پور میں بھارت رتن جناب کرپوری ٹھاکر کی 101ویں یوم پیدائش کی تقریبات میں شرکت کی ۔  بھارت رتن جناب کرپوری ٹھاکر جی کو خراج عقیدت پیش کرتے ہوئے وزیر نے کہا کہ کیڑے مکوڑے، پرندے اور جانور بھی اپنے لیے جیتے ہیں، اگر کوئی اپنے لیے جیتا ہے تو جینے کا کیا فائدہ،  در حقیقت صرف وہی جیتا ہے جو ملک، عوام اور دوسروں کے لیے جیتا ہے ۔  کرپوری ٹھاکر جی کی زندگی بھی اپنے لیے نہیں بلکہ عوام، غریبوں، پسماندہ اور کسانوں کے لیے تھی ۔  انہوں نے کہا کہ وقت دریا کے بہاؤ کی طرح ہے جس میں سب بہہ جاتے ہیں لیکن کچھ ایسے ہوتے ہیں جو تاریخ  رقم کرتے ہیں ۔  کرپوری جی نے غریبوں اور پسماندہ لوگوں کی خدمت میں ایک نئی تاریخ رقم کی ہے ۔

جناب چوہان نے کہا کہ میں کرپوری گرام کی سرزمین کو نمن کرتا ہوں جس نے کرپوری جی کو جنم دیا ۔  ان کا نعرہ تھا، ‘‘100 میں سے 90 استحصال زدہ ہیں، استحصالیوں نے چیلنج کیا ہے، 90 فیصد دولت، زمین اور حکمرانی ہماری ہے’’ ۔  اگر آپ حقوق چاہتے ہیں تو لڑنا سیکھیں، ہر قدم پر ثابت قدم رہنا سیکھیں، جینا ہے تو مرنا سیکھیں ۔  انہوں نے کہا کہ پسماندہ طبقات کو ریزرویشن کرپوری جی نے دیا تھا، میں ان کے لیے اپنا سر جھکاتا ہوں ۔  

مرکزی وزیر شیوراج سنگھ چوہان نے کہا کہ جناب کرپوری ٹھاکر جی نے غریبوں کو مساوی حقوق دینے کے لیے میٹرک تک مفت تعلیم دینے کا فیصلہ کیا تھا ۔  وہ اپنی زبان میں تعلیم دینے کے حق میں تھے ۔  انہوں نے کہا تھا کہ وہ انگریزی کے خلاف نہیں ہیں لیکن گاؤں کے بچے اپنی مادری زبان میں اچھی تعلیم حاصل کرتے ہیں ۔  کرپوری جی نے میٹرک میں انگریزی کی لازمیت ختم کی ۔  جناب چوہان نے کہا کہ ان کی زندگی میں بہت سے متاثر کن واقعات ہیں ۔  جب کرپوری جی وزیر اعلیٰ تھے، جئے پرکاش نارائن کے یوم پیدائش پر پروگرام میں ان کا کُرتا پھٹ گیا، تب چندر شیکھر جی نے سب سے اُن کے  کُرتے کے لیے چندہ دینے کی درخواست کی تھی ۔  انہوں نے یہ رقم چیف منسٹر ریلیف فنڈ میں بھی عطیہ کی تھی ۔  انہوں نے کہا کہ میں انہیں خراج عقیدت پیش کرتا ہوں ۔  جناب چوہان نے کہا کہ آئیے ہم سب ان کے دکھائے ہوئے راستے پر چلیں ۔

نائب صدر جناب جگدیپ دھنکھڑ، بہار کے گورنر جناب عارف محمد خان، راجیہ سبھا کے ڈپٹی چیئرمین ڈاکٹر ہری ونش نارائن سنگھ، جناب رام ناتھ ٹھاکر، زراعت اور کسانوں کی بہبود کی وزارت کے مرکزی وزیر مملکت جناب بھاگیرتھ چودھری، زراعت اور کسانوں کی بہبود کی وزارت کے مرکزی وزیر مملکت، جناب نتیا نند رائے، وزارت داخلہ کے مرکزی وزیر مملکت اور دیگر معززین بھی اس موقع پر موجود تھے ۔

بعد ازاں، مرکزی وزیر زراعت جناب شیوراج سنگھ چوہان نے مرکزی حکومت کی امنگوں سے پُر  اسکیم - پردھان منتری کسان سمان ندھی کے آئندہ پروگرام کے سلسلے میں پٹنہ کے سیکریٹریٹ میں متعلقہ عہدیداروں کے ساتھ میٹنگ کی اور پروگرام کی تیاریوں کا جائزہ لیا ۔  جناب چوہان نے پروگرام کے انتظامات کے سلسلے میں عہدیداروں کو ضروری ہدایات دیں ۔  بہار کے نائب وزیر اعلیٰ سمراٹ چودھری، وزیر جناب منگل پانڈے، دیگر عوامی نمائندے اور ریاست اور مرکزی حکومت کی زراعت اور کسانوں کی بہبود کی وزارت کے افسران میٹنگ میں موجود تھے ۔

*******

ش ح  ۔   ا ک   ۔  ت ح

U. No - 5594

(Release ID: 2095888) Visitor Counter : 17