ఉత్పత్తితో ముడిపెట్టిన ప్రోత్సాహకాల పథకం (ప్రొడక్షన్ లింక్‌డ్ స్కీమ్) మూడో విడతలో మొత్తం 24 లబ్ధిదారు సంస్థలు రూ.3,516 కోట్ల పెట్టుబడి పెడతామని ముందుకు రావడంతో, ఈ పథకం దేశవ్యాప్తంగా ఎయిర్‌కండిషనర్లు, ఎల్ఈడీ (లైట్ ఎమిటింగ్ డయోడ్) లైట్లకు అవసరమైన విడిభాగాల ఉత్పాదన పెద్దఎత్తున పుంజుకోవడానికి తోడ్పడనుంది. పీఎల్ఐ పథకంలో ఆన్‌లైన్ మాధ్యమం ద్వారా దరఖాస్తుల స్వీకరణ మూడో దఫాలో మొత్తం 38 దరఖాస్తులు వచ్చాయి. ఈ దరఖాస్తులను సమీక్షించిన తరువాత ప్రభుత్వం 18 కొత్త కంపెనీలను తాత్కాలికంగా ఎంపిక చేసింది. ఈ కంపెనీల్లో 10 కంపెనీలు ఎయిర్ కండీషనర్ల విడిభాగాల తయారీలోనూ, 8 కంపెనీలు ఎల్ఈడీ లైట్ల తయారీలోనూ నిమగ్నం అవుతాయి. ఈ కంపెనీలన్నీ రూ.2,299 కోట్ల పెట్టుబడిని పెట్టడానికి వాగ్దానం చేశాయి.

దీనికి అదనంగా, ఇప్పటికే పీఎల్ఐ లబ్ధిదారులుగా ఉన్న కంపెనీలను అధిక పెట్టుబడి కేటగిరీల స్థాయికి పెంచే దృష్టితో తాత్కాలికంగా ఎంపిక చేశారు. ఈ కంపెనీలు మరో రూ.1,217 కోట్ల పెట్టుబడిని తీసుకురానున్నాయి.

ప్రస్తుత దరఖాస్తుదారు కంపెనీలు రెండిటితో సహా 13 దరఖాస్తుదారు కంపెనీలను సిఫారసుల కోసం నిపుణుల సంఘానికి (సీఓఈ) నివేదించారు. దరఖాస్తుదారుల వివరాలను ‘అనుబంధం’లో పొందుపరిచారు.

దరఖాస్తుదారు కంపెనీల్లో ఒక కంపెనీ ఈ పథకం నుంచి వైదొలగాలని నిర్ణయించుకొని, తన దరఖాస్తును వెనక్కి తీసుకుంది. మొత్తంమీద, వైట్ గూడ్స్‌ కోసం ఉద్దేశించిన పీఎల్ఐ పథకంలో భాగంగా 84 కంపెనీలు రూ.10,478 కోట్ల పెట్టుబడిని తీసుకురానున్నాయి. తత్ఫలితంగా రూ.1,72,663 కోట్ల విలువైన ఉత్పత్తులు అందుబాటులోకి వస్తాయి.

ఈ చర్య... ఈ రంగంలో తయారీ సామర్థ్యాలతోపాటు ఆర్థిక వృద్ధికి ఊతాన్నిస్తుందన్న ఆశ ఉంది. ఏసీల కోసం కంపెనీలు కంప్రెషర్లను, రాగి గొట్టాలను (ఐడీయూ లేదా ఓడీయూ కోసం అవసరమయ్యే) ప్లెయిన్, లేదా గ్రూవ్‌డ్ కంట్రోల్ అసెంబ్లీలను, హీట్ ఎక్స్‌చేంజర్లను, బీఎల్‌డీసీ మోటర్లు సహా ఇతర భాగాలను తయారు చేయబోతున్నాయి. ఇదే విధంగా, ఎల్ఈడీ లైట్ల కోసం ఎల్ఈడీ చిప్ ప్యాకేజింగ్, ఎల్ఈడీ డ్రైవర్స్, ఎల్ఈడీ ఇంజిన్లు, ఎల్ఈడీ లైట్ మేనేజ్‌మెంట్ సిస్లమ్స్, ఇంకా కెపాసిటర్ల కోసం వినియోగించే మెటలైజ్డ్ ఫిల్ముల వంటి వాటిని మన దేశంలోనే తయారు చేయనున్నారు.

వైట్ గూడ్స్ (ఏసీలు, ఎల్ఈడీ లైట్లు) తయారీ కోసం రూ.6,238 కోట్ల ఖర్చుతో ఆర్థిక సంవత్సరం (ఎఫ్‌వై) 2021-22 నుంచి 2028-29 వరకు అమలు చేసేలా పీఎల్ఐ స్కీముకు కేంద్ర మంత్రిమండలి 2021 ఏప్రిల్ 7న ఆమోదం తెలిపింది. ఈ పథకాన్ని డీపీఐఐటీ (డిపార్ట్‌మెంట్ ఫర్ ప్రమోషన్ ఆఫ్ ఇండస్ట్రీ అండ్ ఇంటర్నల్ ట్రేడ్) 2021 ఏప్రిల్ 16న నోటిఫై చేసింది.

వైట్ గూడ్స్ ఉత్పత్తిని లక్షించిన పీఎల్ఐ పథకాన్ని, దేశంలో ఎయిర్ కండీషనర్లు, ఎల్ఈడీ లైట్ల తయారీ పరిశ్రమను దృష్టిలో పెట్టుకొని ఒక పక్కా విడిభాగాల ఉత్పాదన ప్రధాన విస్తారిత అనుబంధ వ్యవస్థ (ఎకోసిస్టమ్)ను ఏర్పరచాలనే ఉద్దేశంతోనూ, ప్రపంచంలో సరఫరా శ్రేణుల (గ్లోబల్ సప్లయ్ చైన్స్)లో భారతదేశాన్ని ఒక అంతర్భాగంగా తీర్చిదిద్దాలనే ఉద్దేశంతోనూ రూపొందించారు. ఈ పథకం ఆధార సంవత్సరం (బేస్ ఇయర్) తరువాత నుంచి అయిదు సంవత్సరాల కాలంపాటు, అలాగే మొదలుపెట్టినప్పటి నుంచి ఒక సంవత్సరం పాటు అమ్మకాలలో పెరుగుదల ప్రాతిపదికన తగ్గిస్తూ పోయే తరహాలో 6 శాతం మొదలు 4 శాతం వరకూ ప్రోత్సాహకాన్ని అందిస్తుంది. దేశీయ విలువ జోడింపు ఇప్పుడున్న 15-20 శాతం నుంచి పెరిగి, 75-80 శాతానికి చేరుకోగలదన్న అంచనా ఉంది.

***