పంజాబ్, తెలంగాణలోని రెండు అంకుర సంస్థలకు స్వదేశీ కండక్టివ్ ఇంక్ తయారీ సాంకేతిక పరిజ్ఞానం బదిలీ

వరంగల్ ఎన్ ఐటీలో ఈ రోజు జరిగిన కార్యక్రమంలో సిల్వర్ నానోవైర్ ఆధారిత కండక్టివ్ ఇంక్ టెక్నాలజీని మెసర్స్ చెమాటికో టెక్నాలజీస్ (ఐఐటీ రోపర్ స్థాపన), మెసర్స్ వసంతబాల ఫంక్షనల్ మెటీరియల్స్ (వరంగల్ ఎన్ ఐటీ స్థాపన) అంకుర సంస్థలకు బదిలీ చేశారు.

ఎలక్ట్రానిక్స్, సెమీకండక్టర్, సోలార్ ఫోటోవోల్టాయిక్,  ఆర్ఎఫ్ఐడి మార్కెట్లో వేగవంతమైన వృద్ధి కారణంగా సిల్వర్ నానోవైర్ ఆధారిత కండక్టివ్ ఇంక్, జిగురు ప్రపంచ మార్కెట్ 2032 నాటికి 16.87 బిలియన్ డాలర్లు దాటుతుందని అంచనా వేశారు. చివరి వినియోగ పరిశ్రమల నుంచి పెరుగుతున్న డిమాండ్‌ తో సహా కీలక అంశాలు మార్కెట్ వృద్ధికి కారణమని చెప్పవచ్చు. భారత్ ఏటా 15,72,000 డాలర్ల విలువైన సిరాను దిగుమతి చేసుకుంటోంది. అమెరికా, చైనా, నెదర్లాండ్స్, యూకే, తైవాన్ ప్రధాన ఎగుమతి దేశాలుగా ఉన్నాయి.

బదిలీ చేసిన సాంకేతిక పరిజ్ఞానాన్ని భారత ప్రభుత్వ ఎలక్ట్రానిక్స్ అండ్ ఇన్ఫర్మేషన్ టెక్నాలజీ మంత్రిత్వ శాఖ (ఎంఇఐటివై) నిధులతో ఐఐటి రోపార్ ప్రొఫెసర్ సారంగ్ గుంఫేకర్, వరంగల్ ఎన్ఐటి ప్రొఫెసర్ శిరీష్ సోనావానే సంయుక్తంగా అభివృద్ధి చేశారు.

సిల్వర్ నానోవైర్ ఆధారిత కండక్టివ్ ఇంక్ ను సాధారణంగా ప్రింటెడ్ సర్క్యూట్ బోర్డులపై సర్క్యూట్లను రిపేర్ చేయడానికి లేదా మెరుగుపరచడానికి ఉపయోగిస్తారు. ఫ్లెక్సిబుల్ ఎలక్ట్రానిక్స్ (కంప్యూటర్ కీబోర్డులు, విండ్ షీల్డ్ డిఫ్రాస్టర్ వంటి ఫోల్డబుల్ పరికరాలు/స్క్రీన్లు), ఆర్ ఎఫ్ ఐ డి ట్యాగ్ లు, వేరబుల్ పరికరాలు, సెన్సార్లు, డిస్ ప్లే టెక్నాలజీలు, సోలార్ ప్యానెళ్లు మొదలైన వాటిలో ఈ ఇంకును ఉపయోగిస్తారు.

భారత ప్రభుత్వ ఎంఈఐటివై కి చెందిన యుఐడిఎఐ  అదనపు కార్యదర్శి, సిఇఒ శ్రీ భువనేష్ కుమార్, భారత ప్రభుత్వ ఎంఈఐటివై గ్రూప్ కోఆర్డినేటర్ శ్రీమతి సునీతా వర్మ, ఐఐటి రోపర్ డైరెక్టర్ ప్రొఫెసర్ రాజీవ్ అహుజా, వరంగల్ ఎన్ఐటి డైరెక్టర్ ప్రొఫెసర్ విద్యాధర్ సుబుధి, భారత ప్రభుత్వ ఎంఈఐటివై శాస్త్రవేత్త శ్రీ సురేంద్ర గోథర్వాల్ సమక్షంలో ఈ సాంకేతికత బదిలీ కార్యక్రమం జరిగింది.

ఈ కార్యక్రమంలో ముఖ్య అతిథి శ్రీ భువనేశ్ కుమార్ మాట్లాడుతూ, ఫ్లెక్సిబుల్ ఎలక్ట్రానిక్స్, ఎలక్ట్రానిక్ ప్యాకేజింగ్, డిస్ ప్లేలు, సోలార్ ఫోటోవోల్టాయిక్స్, ఆర్ఎఫ్ఐడి ట్యాగ్ లు మొదలైన వాటికి చెందిన సెమీకండక్టర్ రంగంలో స్వదేశీ నానోసిల్వర్ ఆధారిత కండక్టివ్ ఇంక్ టెక్నాలజీకి ఉన్న సామర్థ్యాన్ని వివరించారు.

అంకుర సంస్థలను అభినందిస్తూ  దేశంలో సిల్వర్ నానోవైర్లను పెద్ద ఎత్తున తయారు చేయాలని, కండక్టివ్ ఇంక్ ఉత్పత్తి చేయాలని ఆయన సూచించారు. అభివృద్ధి చెందిన సాంకేతిక పరిజ్ఞానం అధునాతన ఎలక్ట్రానిక్ మెటీరియల్ అప్లికేషన్ల కోసం భారతదేశ కండక్టివ్ ఇంక్ దిగుమతిని తగ్గించగలదని ఆయన అన్నారు.

***