“నిరంతర పరిణామశీలంగా ఉన్న నేటి కాలంలో సరిహద్దు సాంకేతిక పరిజ్ఞానంపై పట్టు సాధించడం తక్షణావశ్యకత అనీ, ఈ దిశగా భవిష్యత్తులో ఎదురయ్యే సవాళ్లను ఎదుర్కొనేలా మన సైనికులను సన్నద్ధం చేయడంలో సైనిక శిక్షణ కేంద్రాలు కీలక పాత్ర పోషిస్తున్నాయి” అని రక్షణ శాఖ మంత్రి శ్రీ రాజ్ నాథ్ సింగ్ అన్నారు. మధ్యప్రదేశ్ లోని మౌ లో ఉన్న ఆర్మీ వార్ కాలేజీ (ఏడబ్ల్యూసీ)లో అధికారులను ఉద్దేశించి సోమవారం ఆయన ప్రసంగించారు. యుద్ధవిధానాల్లో వస్తున్న సమూల మార్పులను ప్రస్తావిస్తూ.. సమాచార యుద్ధం, కృత్రిమ మేధ (ఏఐ) ఆధారిత యుద్ధం, పరోక్ష యుద్ధం, విద్యుదయస్కాంత యుద్ధం, అంతరిక్ష యుద్ధం, సైబర్ దాడుల వంటి సంప్రదాయేతర యుద్ధ పద్ధతులు నేటి పరిస్థితుల్లో సవాళ్లుగా నిలుస్తున్నాయని ఆయన అన్నారు.

ఇలాంటి సవాళ్లను ఎదుర్కొనేందుకు సైన్యం సుశిక్షితంగా, సన్నద్ధంగా ఉండాల్సిన ఆవశ్యకత ఉందని రక్షణ శాఖ మంత్రి స్పష్టం చేశారు. ఈ కృషిలో విలువైన సహకారాన్ని అందిస్తున్నాయంటూ మౌ లోని శిక్షణ కేంద్రాన్ని అభినందించారు. మారుతున్న కాలానికి అనుగుణంగా శిక్షణ పాఠ్యాంశాలను ఈ కేంద్రాలు నిరంతరం మెరుగుపరుస్తున్నాయనీ, పోరాట సిబ్బందిని అన్ని రకాల సవాళ్లనూ ఎదుర్కొనేలా తీర్చిదిద్దుతున్నాయనీ ఆయన అభినందించారు.

2047 నాటికి దేశాన్ని వికసిత భారత్‌గా తీర్చిదిద్దాలన్న ప్రధానమంత్రి శ్రీ నరేంద్ర మోదీ నేతృత్వంలోని ప్రభుత్వ దార్శనికతను శ్రీ రాజ్‌నాథ్ సింగ్ ప్రముఖంగా ప్రస్తావిస్తూ.. ప్రస్తుత సమయాన్ని పరివర్తన కాలంగా అభివర్ణించారు. “భారత్ నిరంతరం అభివృద్ధి పథంలో పయనిస్తూ, శరవేగంగా తయారీ కేంద్రంగా ఎదుగుతోంది. సైనిక పరంగా చూస్తే అత్యాధునిక ఆయుధాలను సమకూర్చుకుంటున్నాం. ఇతర దేశాలకు కూడా భారత్ లో తయారైన పరికరాలను ఎగుమతి చేస్తున్నాం. దశాబ్దం క్రితం రూ.2,000 కోట్లుగా ఉన్న మన రక్షణ ఎగుమతులు నేడు రికార్డు స్థాయిలో రూ.21,000 కోట్లను దాటాయి. 2029 నాటికి రూ.50,000 కోట్ల ఎగుమతుల లక్ష్యాన్ని నిర్దేశించుకున్నాం” అని ఆయన తెలిపారు.

త్రివిధ దళాల మధ్య సమీకరణ, ఏకీకరణను బలోపేతం చేయాలన్న ప్రభుత్వ సంకల్పాన్ని రక్షణ మంత్రి పునరుద్ఘాటించారు. తద్వారా సాయుధ దళాలు మున్ముందు మరింత మెరుగ్గా, సమర్థవంతంగా సవాళ్లను ఎదుర్కోగలవని ధీమా వ్యక్తం చేశారు. మౌ కంటోన్మెంటులో అన్ని విభాగాల అధికారులకు ఉన్నత స్థాయి శిక్షణ ఇవ్వడం అభినందనీయమన్నారు. పదాతిదళ పాఠశాలలో ఆయుధ శిక్షణ.. మిలిటరీ టెలి కమ్యూనికేషన్ ఇంజినీరింగ్ కళాశాల (ఎంసీటీఈ)లో కృత్రిమమేధ, ప్రసార సాంకేతికత.. ఏడబ్ల్యూసీలో నాయకత్వం - జూనియర్, సీనియర్ కమాండ్ వంటి అంశాల్లో శిక్షణ ద్వారా సమీకరణను పెంపొందించే అవకాశాలను పరిశీలించాలని అధికారులను ఆయన కోరారు.

భవిష్యత్తులో కొందరు అధికారులు సైనిక దౌత్యవేత్తలుగా పనిచేస్తారనీ, వారు అంతర్జాతీయ స్థాయిలో దేశ ప్రయోజనాలను కాపాడేందుకు కృషిచేయాలని రాజ్ నాథ్ సింగ్ అన్నారు. “సైనిక దౌత్యవేత్తలుగా బాధ్యతల్లో ఉండే సమయంలో ఆత్మనిర్భర భారత్ అనే ప్రభుత్వ దార్శనికతను పుణికిపుచ్చుకోవాలి. స్వావలంబన ద్వారానే భారత్ తన రక్షణ సామర్థ్యాలను బలోపేతం చేసుకుని, అంతర్జాతీయ వేదికపై మరింత గౌరవాన్ని పొందగలదు” అని ఆయన అన్నారు.

భారత్ ను ప్రపంచంలో బలమైన ఆర్థిక, సైనిక శక్తుల్లో ఒకటిగా తీర్చిదిద్దేందుకు ప్రభుత్వం అచంచలమైన నిబద్ధతతో ఉన్నదని రక్షణ మంత్రి పేర్కొన్నారు. “భద్రతపై పూర్తి శ్రద్ధ చూపినప్పుడే ఆర్థిక పురోభివృద్ధి సాధ్యమవుతుంది. అదేవిధంగా ఆర్థిక వ్యవస్థ బలంగా ఉన్నప్పుడే భద్రత వ్యవస్థ పటిష్ఠంగా ఉంటుంది. రెండూ ఒకదానికొకటి అనుబంధంగా ఉంటాయి. 2047 నాటికి మనం అభివృద్ధి చెందిన దేశంగా మారడమే కాకుండా.. మన సాయుధ దళాలు ప్రపంచంలోనే అత్యంత ఆధునిక, బలమైన సైన్యాలలో ఒకటిగా నిలుస్తాయి” అని ఆయన వ్యాఖ్యానించారు.

డాక్టర్ బీఆర్ అంబేడ్కర్ ప్రవచించిన విలువలైన అంకిత భావం, స్ఫూర్తిని పెంపొందించుకోవాలని రాజ్ నాథ్ సింగ్ అధికారులను కోరారు. బాబా సాహెబ్ భారత రాజ్యాంగ నిర్మాత మాత్రమే కాదు, దార్శనికుడు కూడా అని ఆయన అభివర్ణించారు. ఆయన విలువలు, ఆదర్శాలను ప్రజలకు.. ముఖ్యంగా యువతకు పరిచయం చేయడానికి ప్రభుత్వం కట్టుబడి ఉందని పునరుద్ఘాటించారు.

సరిహద్దుల రక్షణలోనూ, ప్రకృతి వైపరీత్యాల సమయంలో సహాయక చర్యల్లోనూ సాయుధ బలగాలు ముందుంటాయని రక్షణ మంత్రి ప్రశంసించారు. “దేశ రక్షణలో ఈ అంకితభావం, నిరంతరం మారుతున్న ప్రపంచంలో మన స్వీయ నవీకరణ స్ఫూర్తి మనల్ని ఇతరుల కన్నా ముందంజలో నిలపగలవు’’ అని ఆయన అన్నారు.

శిక్షణలోనూ, మొత్తం యుద్ధ రంగంలో పోరాటం దిశగా సేనా నాయకులను సాధికారులను చేయడంలోనూ ఏడబ్ల్యూసీ పాత్ర, ప్రాధాన్యాలను ఆ సంస్థ వద్ద కమాండెంట్ లెఫ్టినెంట్ జనరల్ హెచ్ఎస్ సాహి మంత్రికి వివరించారు. వివిధ రంగాలకు సంబంధించిన కార్యకలాపాల ఏకీకరణ, శిక్షణ పాఠ్య ప్రణాళికలో సాంకేతిక పరిజ్ఞానాన్ని వినియోగించడం, అలాగే సీఏపీఎఫ్ అధికారుల శిక్షణతోపాటు విద్యాసంస్థలు- విశ్వవిద్యాలయాలు- పరిశ్రమలతో నిర్వహించే పరస్పర వినిమయ కార్యక్రమాల ద్వారా శిక్షణ విధానంలో ఉండే ముఖ్యమైన దశల గురించి ఆయనకు వివరించారు. మిత్ర దేశాల అధికారులకు శిక్షణ ఇవ్వడం ద్వారా, సైనిక దౌత్యానికి ఎనలేని తోడ్పాటు అందించడం ద్వారా సంస్థ అంతర్జాతీయంగా పోషించిన పాత్రను కూడా ఆయనకు వివరించారు. సైనిక దళ ప్రధానాధికారి జనరల్ ఉపేంద్ర ద్వివేది, భారత సైన్యంలోని ఇతర సీనియర్ అధికారులు ఈ కార్యక్రమంలో పాల్గొన్నారు.

అంతకుముందు, సైనిక స్మారకం వద్ద రక్షణ మంత్రి వీర యోధులకు నివాళి అర్పించారు.

మౌ లోని ఏడబ్ల్యూసీ, ఎంసీటీఈ, సైనిక పాఠశాల, సైనిక శిక్షణ కేంద్ర యూనిట్లను రక్షణ మంత్రి ఆదివారం సందర్శించారు. ఈ సంస్థలన్నీ కలిసి భారత్ ను భద్రత పరంగా అత్యున్నతమైన స్థితిలో నిలిపాయనీ.. అలాగే బలమైన, సుసంపన్నమైన, ఉజ్వల భవిష్యత్తుకు భరోసా ఇచ్చాయనీ ఆయన వ్యాఖ్యానించారు. ఎంసీటీఈలో నిర్వహిస్తున్న క్వాంటం టెక్నాలజీ, కృత్రిమ మేధ ప్రయోగశాలలను అనుకూల యుద్ధ తంత్రాన్ని సాధించే దిశగా కీలకమైన ముందడుగుగా అభివర్ణించారు.  

 

***

(Release ID: 2088935) Visitor Counter : 34