مرکزی زراعت اور کسانوں کی بہبود اور دیہی ترقی کے وزیر جناب شیوراج سنگھ چوہان نے آج نئی دہلی کے کرشی بھون میں شراکت داروں کے ساتھ بجٹ سے قبل مشاورت کی۔ اس میٹنگ کے دوران کسانوں کے ساتھ ساتھ زرعی تاجروں، زراعت سے متعلق مختلف تنظیموں، زرعی پیداوا رکی ایسوسی ایشن اور دیگر شراکت داروں نے مختلف اہم تجاویز پیش کیں۔ میٹنگ میں مرکزی وزیر شیوراج سنگھ چوہان نے کہا کہ ہم موصولہ تمام تجاویز کا بغور جائزہ لیں گے اور وزیر خزانہ کو مطلع کریں گے اور جناب چوہان نے مزید کہا کہ ہم زراعت کے شعبے سے متعلق تمام شراکت داروں کے ساتھ بات چیت جاری رکھیں گے۔

میٹنگ میں مرکزی وزیر جناب شیوراج سنگھ چوہان نے یہ بھی کہا کہ زراعت اور کسانوں کی بہبود کی وزارت بھی اندرونی طور پر باریک بینی سے مطالعہ کر رہی ہے تاکہ بجٹ سے متعلق اپنی تجاویز جلد ہی وزارت خزانہ کو پیش کر سکیں۔ جناب چوہان نے مزید کہا کہ مختلف پرانی اسکیموں کا بھی جائزہ لیا جا رہا ہے۔ آج کسانوں اور دیگر تنظیموں کے ساتھ ساتھ مختلف شراکت داروں کی طرف سے  پیش کردہ تجاویز اہم ہیں کیونکہ یہ لوگ کھیت میں کام کرتے ہوئے تجربہ حاصل کرتے ہیں، جو کاشتکاری کے فائدے کے لیے مفید ہے۔ زرعی شعبے میں ویلیو ایڈیشن، زرعی پیداوار کے برآمد کنندگان کے لیے سہولیات میں اضافہ، زرعی تحقیق کو وسعت دینے، زرعی سامان کی قیمت اور معیار کو کنٹرول کرنے، کسانوں کو نقصان سے بچانے کو یقینی بنانے وغیرہ کے حوالے سے ان لوگوں سے بہت سی تجاویز موصول ہوئی ہیں۔

مرکزی وزیر زراعت جناب چوہان نے کہا کہ وزیر اعظم جناب نریندر مودی نے انڈین کونسل آف ایگریکلچرل ریسرچ (آئی سی اے آر) کے ذریعہ تیار کردہ فصلوں کی 109 نئی اقسام کو ملک کے نام وقف کیا۔ کسانوں کی مزید مدد کے لیےحکومت نئے آئیڈیاز، کسان پنچایت کا انعقاد جیسے متبادل کی تلاش کررہی ہے ،جسے مدھیہ پردیش میں جناب چوہان کے وزیر اعلیٰ کے دور میں کامیابی کے ساتھ کیا گیا تھا۔

اس میٹنگ میں زراعت اور کسانوں کی بہبود کے سکریٹری ڈاکٹر دیویش چترویدی، وزارت کے سینئر عہدیداروں کے ساتھ، آئی سی اے آر اور مختلف تنظیموں کے عہدیداروں سمیت نابارڈ، سی آئی آئی، پی ایچ ڈی چیمبر آف کامرس، ایسوچیم، اسٹیٹ بینک آف انڈیا اور سویا بین پروسیسرز ایسوسی ایشن آف انڈیا کے نمائندے موجود تھے۔

*********

 

UR-4125

(ش ح۔ ش م۔اش ق)

(Release ID: 2085089) Visitor Counter : 11