"ஐந்து ஆண்டுகளுக்கு, அதாவது 2024-2029 க்கான ஒத்துழைப்பு திட்டத்தை (PoC) இறுதி செய்வதன் மூலம் ஸ்லோவேனியாவுடனான எங்கள் உறவுகளை ஆழப்படுத்துவதில் நாங்கள் மகிழ்ச்சியடைகிறோம். இந்த முயற்சி இரு நாடுகளின் விஞ்ஞானிகளிடையே ஆராய்ச்சி மற்றும் நெட்வொர்க்குகளை வளர்ப்பதற்கான வழிகளைத் திறக்கும்" என்று அறிவியல் மற்றும் தொழில்நுட்பம் (தனி பொறுப்பு) பிரதமர் அலுவலகம், அணுசக்தி, விண்வெளி, பணியாளர், பொதுமக்கள் குறைதீர்ப்பு மற்றும் ஓய்வூதியத் துறை இணையமைச்சர் டாக்டர் ஜிதேந்திர சிங்  கூறினார். ஸ்லோவேனிய உயர்கல்வி, அறிவியல் மற்றும் புதிய கண்டுபிடிப்புகள்  துறை அமைச்சர் டாக்டர் இகோர் பாபிக்கை இன்று  அவர் சந்தித்தார்.

இந்த உரையாடல் இரு நாடுகளும் தங்கள் அறிவியல் மற்றும் தொழில்நுட்ப ஒத்துழைப்பை வலுப்படுத்துவதற்கான உறுதிப்பாட்டைப் பிரதிபலித்தது.

2024-2029-ம் ஆண்டிற்கான ஒத்துழைப்புத் திட்டத்தை  இறுதி செய்வதற்காக மத்திய அமைச்சர் டாக்டர் ஜிதேந்திர சிங் மற்றும் ஸ்லோவேனிய அமைச்சர் டாக்டர் இகோர் பாபிக் ஆகியோர் இன்று நாடாளுமன்ற வளாகத்தில் சந்தித்த நிலையில், இந்தியாவும் ஸ்லோவேனியாவும் அறிவியல் ஒத்துழைப்பின் லட்சிய புதிய கட்டத்தைத் தொடங்கியுள்ளன. ஹைட்ரஜன் தொழில்நுட்பங்கள் மற்றும் நிலையான கண்டுபிடிப்பு உள்ளிட்ட உருமாறும் துறைகளில் கூட்டு ஆராய்ச்சியை விரிவுபடுத்துவதை கூட்டம் வலியுறுத்தியது.

தற்போதுள்ள ஒத்துழைப்புகளின் வெற்றியை எடுத்துரைத்த டாக்டர் ஜிதேந்திர சிங், சுகாதாரம், செயற்கை நுண்ணறிவு, புதுப்பிக்கத்தக்க எரிசக்தி, பொலிவுறு நகரங்கள் போன்ற துறைகளில் 20-க்கும் மேற்பட்ட கூட்டுத் திட்டங்கள் ஏற்கனவே செயல்படுத்தப்பட்டுள்ளன என்றார். "இந்த கூட்டாண்மை தொடர்ந்து பயனுள்ள முடிவுகளை வழங்கியுள்ளது, மேலும் புதிய வளர்ந்து வரும் ஆராய்ச்சி களங்களில் ஒத்துழைப்பை மேம்படுத்தும்," என்று அவர் கூறினார்.

டாக்டர் பாப்பிக், ஸ்லோவேனிய தூதர் மதேஜா வோடெப் கோஷ் மற்றும் பொருளாதார ஆலோசகர் டீ பிரிஹ் ஆகியோருடன் சேர்ந்து, ஹைட்ரஜன் தொழில்நுட்பங்களில் நெருக்கமாக பணியாற்றுவதற்கான வாய்ப்பை வரவேற்றார், இது உலகளாவிய எரிசக்தி நிலைத்தன்மையை அடைவதற்கு முக்கியமான கவனம் செலுத்தும் பகுதியாகும்.

1995 ஒப்பந்தத்தில் வேரூன்றிய இந்தியா-ஸ்லோவேனியா கூட்டாண்மை, அறிவியல் மற்றும் தொழில்நுட்ப ஒத்துழைப்புக்கான கூட்டு பணிக்குழு போன்ற திட்டங்கள் மூலம் வளர்ந்துள்ளது. இரு நாடுகளும் அடுத்த ஆண்டு தொடக்கத்தில் ஸ்லோவேனியாவில் ஒரு கூட்டுக் குழு கூட்டத்திற்குத் தயாராகி வரும் நிலையில், புதிய ஒத்துழைப்புத் திட்டம் மேலும் கூட்டு முன்னேற்றங்களுக்கு வழி வகுக்கும் என்று உறுதியளிக்கிறது.

இரு நாடுகளுக்கும் இடையே புத்தாக்கத்தை ஊக்குவிப்பதற்கும், கல்வி மற்றும் தொழில்துறை தொடர்புகளை ஆழப்படுத்துவதற்கும் பரஸ்பரம் ஒப்புக் கொள்ளப்பட்ட பகுதிகளில் கவனம் செலுத்தும் ஆராய்ச்சி திட்டங்களுக்கான புதிய கூட்டு அழைப்புக்கான திட்டங்கள் குறித்தும் அமைச்சர்கள் விவாதித்தனர்.

இந்த புதுப்பிக்கப்பட்ட உறுதிப்பாட்டின் மூலம், இந்தியாவும் ஸ்லோவேனியாவும் அறிவியல் மற்றும் தொழில்நுட்பத்தில் சர்வதேச ஒத்துழைப்புக்கான அளவுகோலை அமைக்கவும், முக்கியமான துறைகளில் உலகளாவிய முன்னேற்றத்திற்கு பங்களிக்கவும் தயாராக உள்ளன.

****

TS/PKV/DL

(Release ID: 2081353) Visitor Counter : 61