وزارت کوئلہ 5 دسمبر 2024 کو نئی دہلی میں 11ویں راؤنڈ کے کمرشل کوئلہ مائن نیلامی کے آغاز کے لیے تیار ہے۔ مرکزی وزیر برائے کوئلہ اور معدنیات، جناب جی کشن ریڈی، 11ویں راؤنڈ کی نیلامی کا آغاز کریں گے۔ وزیر مملکت برائے کوئلہ اور معدنیات، جناب ستیش چندر دوبے، اور سکریٹری کوئلہ، جناب وکرم دیو دت، بھی اس موقع کی زینت بنیں گے۔ یہ اسٹریٹجک اقدام بھارت کے کوئلہ شعبے میں شفافیت، مسابقت اور پائیداری کو فروغ دینے کے لیے کیا جا رہا ہے۔

اس نیلامی میں 27 کوئلہ بلاکس پیش کیے جا رہے ہیں جو مختلف ریاستوں اور علاقوں میں تقسیم کیے گئے ہیں، تاکہ علاقائی اقتصادی ترقی کو فروغ دیا جا سکے اور روزگار کے مواقع پیدا کیے جا سکیں۔ پچھلے راؤنڈز کی کامیابی کو مدنظر رکھتے ہوئے، وزارت کوئلہ بھارت کے وسیع کوئلہ ذخائر کو بروئے کار لانے اور توانائی کے تحفظ کو بہتر بنانے کی کوششیں جاری رکھے ہوئے ہے۔

اس راؤنڈ میں 20 کوئلہ کانیں نیلامی کے لیے پیش کی جائیں گی، جن میں 10 مکمل طور پر دریافت شدہ اور 10 جزوی طور پر دریافت شدہ بلاکس شامل ہیں۔ اس کے علاوہ، راؤنڈ 10 کے دوسرے مرحلے سے 7 کوئلہ کانیں بھی شامل کی جائیں گی، جن میں 4 مکمل طور پر دریافت شدہ اور 3 جزوی طور پر دریافت شدہ بلاکس شامل ہیں۔ یہ تمام کانیں غیر کُوکنگ کوئلہ پر مشتمل ہیں، جو بھارت کی بڑھتی ہوئی توانائی کی ضروریات کو پورا کرنے کے لیے اہم ہیں۔

مزید برآں، اس موقع پر وزارت کوئلہ 9 کانوں کے لیے کوئلہ مائن ڈیولپمنٹ اینڈ پروڈکشن ایگریمنٹس (سی ایم ڈی پی ایز) اور کوئلہ بلاک ڈیولپمنٹ اینڈ پروڈکشن ایگریمنٹس (سی ایم ڈی پی ایز) پر دستخط کرے گی۔ ان کانوں سے اپنی مکمل صلاحیت کے تحت تقریباً 1,446 کروڑ روپے سالانہ آمدنی اور تقریباً 19,063 روزگار کے مواقع پیدا ہونے کی توقع ہے۔ اس کے علاوہ، راؤنڈ 10 کے کامیاب بولی دہندگان کو سی ایم ڈی پی ایز سونپے جائیں گے، جو کوئلہ پیداوار اور توانائی کے تحفظ کو بہتر بنانے کے حکومت کے عزم کی عکاسی کرتے ہیں۔

کمرشل کوئلہ مائن نیلامی میں کئی اہم اصلاحات متعارف کرائی گئی ہیں۔ کوئلہ کی فروخت یا استعمال پر کوئی پابندی نہیں ہے۔ قابلِ شرکت کی شرائط کو ختم کر دیا گیا ہے، جس سے شرکت کے لیے کسی قسم کی تکنیکی یا مالی رکاوٹیں نہیں رہیں۔ نوٹیفائیڈ قیمت کے بجائے نیشنل کوئلہ انڈیکس پر مبنی نظام اپنایا گیا ہے، جو شفافیت اور منصفانہ قیمتوں کو یقینی بناتا ہے۔ معدنی قوانین میں ترمیم نے کوئلہ شعبے کو کھولنے میں اہم کردار ادا کیا ہے، جس سے سرکاری اور نجی دونوں شعبوں کے لیے مساوی مواقع فراہم کیے گئے ہیں۔

یہ نیلامی بھارت کے کوئلہ شعبے میں خود کفالت (آتم نربھرتا) کی جانب ایک اہم سنگ میل کی حیثیت رکھتی ہے۔ نئے بلاکس کی پیشکش سے حکومت بھارت کے وسیع کوئلہ ذخائر کو بروئے کار لا کر اقتصادی ترقی کو فروغ دے رہی ہے اور توانائی کے تحفظ کو مضبوط کر رہی ہے۔ حکومت پائیداری کے عزم کے ساتھ، ایسے کان کنی کے طریقے اپنانے کو یقینی بنا رہی ہے جو نہ صرف اقتصادی ترقی بلکہ ماحولیاتی تحفظ کو بھی فروغ دیں۔

کانوں کو آپریشنل بنانے کے عمل کو آسان اور تیز کرنے کے لیے وزارت نے سنگل ونڈو کلیئرنس سسٹم  (ایس ڈبلیو سی ایس) پورٹل متعارف کرایا ہے۔ یہ پلیٹ فارم ضروری منظوریوں کے حصول کے لیے ایک ہموار عمل فراہم کرتا ہے، جس سے کاروبار کرنے میں آسانی ہوتی ہے اور کوئلہ پیداوار میں اضافہ ممکن ہوتا ہے۔

نیلامی کا عمل مکمل شفافیت کے ساتھ آن لائن کیا جائے گا، جس میں فیصد ریونیو شیئر ماڈل اپنایا گیا ہے۔ نیلامی کے متعلق تمام تفصیلات ایم ایس ٹی سی نیلامی پلیٹ فارم پر دستیاب ہیں۔

کمرشل کوئلہ مائن نیلامی کے 11ویں راؤنڈ کے آغاز کے ساتھ، حکومت بھارت کے توانائی شعبے کو مزید مضبوط اور پائیدار بنانے کے اپنے ویژن کو تقویت دے رہی ہے۔

**********

ش ح ۔  ش ا ر  ۔  م ت                                         

U - 3450

(Release ID: 2080829) Visitor Counter : 26