Ka India ka la pyndon burom ia u mawmer ba kongsan mynta ka sngi, ka 26 tarik Naiwieng, 2024 kaba long ka lyngkhuh jingdap 75 snem ka jingpdiang ia ka Riti Synshar jong ka ri. Ha ka 26 tarik Naiwieng, 1949, ka Indian Constituent Assembly ka la pdiang ia ka Riti Synshar, kaba la treikam ha ka 26 tarik Kyllalyngkot, 1950, kaba la pynskhem ia ka India kum ka ri kaba laitluid, kaba iaid haka synshar paidbah. Ha u 2015, ka Sorkar India ka la pynbna ia ka 26 tarik Naiwieng kum ka Constitution Day (Samvidhan Divas) ban pyndon burom ia ka jingpdiang ia ka Riti Synshar jong ka ri ha u snem 1949. Naduh katei ka por, man ka snem ha kane ka sngi, ka ri ka rakhe ia ka jingpdiang ia ka Riti Synshar.

Ki jingrakhe kynmaw burom ia ka jingdap 75 snem kin long baroh shi snem bad ki prokram kin long hapoh ki saw tylli ki rishot ba kynthup ka Preamble jong ka Riti Synshar, ka Jingsngewthuh ia ka Riti Synshar jong ngi, ka Jingthaw ia ka Riti Synshar bad ka Jingrakhe ia ka Jingkhraw jong ka Riti Synshar. Ia ka bynta ba kongsan jong kane ka jingialang kynmaw burom la pynlong mynta ka sngi ka 26 tarik Naiwieng, 2024 ha Central Hall jong ka Samvidhan Sadan.

Ka President jong ka ri ryngkat bad u Vice-President, u Myntri Rangbah duh, u Shongknor, ki Myntri, ki MP bad kiwei kiwei ki kynrem ki lyndan ki la iadonlang ha kane ka jingrakhe ia ka Constitution Day, 2024 ha Central Hall jong ka SamvidhanSadan.

 

La sdang ia ka jingialang da ka jingrwai ia ka National Anthem bud pat sa ka jingkren pdiang sngewbha na u Shongknor, Lok Sabha. U Shongknor u la kren shaphang ka jingiohi jngai jong ki nongthaw ia ka Riti Synshar, khamtam u Dr. B.R. Ambedkar, bad ka jingaiti jong ki ban saindur ia ka jingthoh kaba pynthikna ka jingiada ia ki hok jong baroh ki briew jong ka ri, khlem da peit shiliang iano iano.

La pyni ia ka phlim lyngkot, kaba la aiti sha ka jingkhraw jong ka Riti Synshar jong ka ri. Kane ka phlim ka pyni ia ka jingthaw ia ka Riti Synshar, ki jingnohsynniang jong ki briew ba kongsan kum u Dr. B.R. Ambedkar, bad ka jingiaid lynti jong ka ban peit ia ki jingthrang jong ka ri kaba iar bad ka jingbteng ka jingiahap jong ka ha kine ki 75 snem ba la leit, da kaba peit ia ki jingpynkylla ba kongsan bad ki mawmer ha ki kam ka ain.

U Vice- President jong ka ri, ha ka jingai jingkren jong u, u la ban jur halor ka jingkongsan ka Riti Synshar bad ka jingbteng ka jingiahap jong ka ban tei ia ka jinglong synshar paidbah jong ka India. U la iaroh ia ka jingiohi jngai jong ka Constituent Assembly ban saindur ia ka lawei jong ka India, kaba phaikhmat ha ka jingiamynjur lang. U la kyntu ia ka jingbud ia ki Fundamental Rights bad ki Duties, da kaba niewkor shuwa ia ka bha ka miat jong ka ri ban ia ki jingiapher ha ki kam sain pyrthei, bad u la ong ba ym dei ban niewkor ia ki jingngeit ban ia ka ri.

Ha kane ka jingialang la pyllait paidbah ia kine harum da ki kynrem ki lyndan kiba don ha ka rynsan.

• Ka pisa nar bad ka Stamp kaba la aiti sha ka lyngkhuh dap 75 snem jong ka jingpdiang ia ka Riti Synshar jong ka ri.

 

 

 

• Ki Kot ba la ai kyrteng “Making of the Constitution of India: A Glimpse” bad ka “Making of the Constitution of India & its Glorious Journey”.

 

 

• Ka Kot ba la aiti sha ka Riti Synshar jong ka India.

 

 

• Ka Riti Synshar jong ka ri ha ka Sanskrit.
• Ka Riti Synshar jong ka ri ha ka Maithili.

Ka President jong ka ri ka la ong ba ka Riti Synshar jong ngi kadei ka jingthoh kaba la plié lad ia ka India ba kan pynurlong ia ki thong na ka bynta ka hok ha ka imlang sahlang bad ka roi ka par ia baroh. Ka la ong shuh shuh, “Ngi la kot bun ki thong ba iadei bad ki thong kiba heh kiba iadei bad ka hok ha ka imlang sahlang bad ka roi ka par ia baroh lyngba ka Riti synshar. Lyngba ka rukom treikam ba thymmai, ngi dang wanrah ia ka jinglong kaba thymmai jong ka India hapdeng kiwei kiwei ki ri. Ki nongthaw ia ka Riti Synshar jong ngi ki la ai ka lad ia ka India ba kan don ka bynta kaba heh ha ka jingkyntiew ia ka shongsuk shongsain bad ka jingshngain hapdeng ki ri. Mynta, ha ryngkat ka jingdon ka ioh ka kot kaba khlain, ka ri jong ngi ka don ka bynta ha kane ka kam kum ka ‘Vishwa – Bandhu’.”

Baroh ki briew jong ka ri ha kylleng ka pyrthei ki la iasnohkti lang ban pule ia ka Preamble jong ka Riti Synshar, ryngkat bad ka President. Kalong ka por jong ka jingsngewsarong ia baroh bad ka jingiatylli, kaba pynkhlain ia ka jingbahkhlieh jong baroh ban bat ia ki nongrim jong ka Riti Synshar.

 

Ka lyngkhuh jingdap 75 snem ka jingpdiang ia ka Riti Synshar kalong kum ka jingpynkynmaw ia ka jingieng skhem ka India ha ka bynta ka synshar paidbah, ka hok bad ka jingryntih. Ka pyni ia ka jingbahkhlieh jong baroh ban iada, ban pynkhlain bad kyntiew ia kine ki nongrim ba kongsan, kaba pynthikna ba ka Riti Synshar ka iai bteng ban long ka bor kaba ialam lynti na ka bynta ka jingkiew shaphrang ka ri bad ka jingiatylli ha ki snem ban wan.

***

(Release ID: 2077659) Visitor Counter : 3