0 7

Ka bynta ba 55 jong ka International Film Festival of India (IFFI) ka bteng ban rakhe ia ki kam shna phlim ha kylleng ka pyrthei lyngba ka jingpyni ia ka phlim na Australia ka The Rooster. La pyni ia ka The Rooster kum shi bynta ka jingphaikhmat ba kyrpang ha ki kam shna phlim ha Australia ha kane ka festival kaba mynta u snem. Ka kynhun saindur jong kane ka phlim, ba kynthup ia u Director bad u Nongthoh Mark Leonard Winter, u Actor lamkhmat Hugo Weaving, bad ki Producer Geraldine Hakewil bad MahVeen Shahraki,ki la iasam ia ki jingshem jong ki ban shna ia ka phlim bad ki jingsngewthuh jong ki shaphang ka rukom iathuh ia kane ka khana.

U Director Mark Leonard Winter, uba dang pynmih ia ka phlim kaba nyngkong, u la pynpaw ka jingkmen jong u shaphang ka jingwanrah ia kane ka phlim sha ki briew jong ka India. u la ong, “Kalong ka projek kaba nga sngewjan, kaba la shna ha ka jaka set kali jong ngi bad ka kynhun kaba khyndiat ngut. Bad mynta ka don ha ka tamasa ba kongsan ha India kalong shisha ka burom.”

Ka The Rooster ka iathuh ia ka khana shaphang u Dan, u samla uba dei u ophisar pulit uba leit sah sha khlaw hadien ka jingiap u paralok baieid jong u, u Steve. Ha khlaw, u iakynduh ia uwei u briew ba sah marwei uba lah ban don ki jubab halor ka jingiap jong u Steve. Ka phlim ka pyni ia ka jingsngewsih, ka jingduh, bad ka jingiakhun na ka bynta ka jingmut, ka jingpeit ia ki jingsngew jong ki briew lyngba ka rukom iathuh khana kaba khlain bha.

U Hugo Weaving, u actor lamkhmat jong ka phlim, u la kren shaphang ka jingshem jong u ha ka jingdon bynta ha kane ka phlim. Ha ka jingiatreilang mynshuwa bad u Winter, u Weaving u la ong ba ka kam kalong kaba sngewtynnad bad kaba don jingmut. “Ka jingak ka long kaba jynjar bha hynrei ka long ruh kaba wanrah ia ka jinghun.”

Ki producer, ka Geraldine Hakewil bad u MahVeen Shahraki ruh ki la iasam ia ki jingsngew jong ki halor ka kam pynmih ia ka phlim. Ka Hakewil ka la pynpaw ka jingsngewsarong ha ka jingkylla u Winter na u actor sha u director, da kaba ong ba “U Mark u la leh palat ia kaei kaba ngi la khmih lynti ha ka kam jong u halor ka script bad ka jingshna ia ka phlim. Kalong ka burom ban don bynta ha kane ka jingiaid lynti.”

Ka jingsaindur ia ka jingpynsawa ha kane ka phlim kalong sa kawei ka bynta ba la iakren ha ka jingialang bad ki lad pathai khubor. U Director Winter u la batai ia ka jingpyndonkam ia ka sur kum ka bynta kaba kongsan jong ka phlim. “Ngi kwah ba ka sur kan don ka jingiadei bad ka jingshem ki briew, da kaba pyndonkam ia tang ka sur ban wanrah ia ki jingsngew. Ka sur jong u briew ka don ka bor ba kyrpang bad kalong kaba kongsan ia ngi ban ioh ia kata ka bor,” la batai u Winter. 

La pynkut ia ka jingialang bad ki lad pathai khubor da ki jingiakren halor ka lawei jong ki kam shna phlim jong ka Australia, ki jingeh ba iakynduh ki nongshna phlim shimet, bad ka jingkiew ka bynta jong ki rynsan digital ha ka jingsam ia ki phlim. Ka kynhun ka la ban jur ia ka jingkongsan ban pynneh ia ka mat kaba kongsan jong ka jingiathuh khana, wat hapdeng ki jingkylla ha ka teknoloji.

Katba ka IFFI kaba 55 ka bteng ban rakhe ia ki rukom saindur bapher bapher, ka The Rooster ka ieng kum ka dak jong ka bor jong ka jingshna phlim dalade bad ki phang kiba iahap bad baroh kiba pyniasoh ia ki nongpeit na kylleng ka pyrthei.

Na ka bynta ka jingiakynduh bad ki lad pathai khubor kaba pura:

* * *