Ka jingimir jingmut hapoh ka phang "Will Artificial Intelligence Alter Filmmaking Forever?" ka dei kaba la pynlong mynta ka sngi ha ka bynta kaba 55 jong ka International Film Festival of India (IFFI) ha Kala Academy, Panaji. Kiba iashim bynta ha kane ka jingimir jingmut ki kynthup Anand Gandhi, nongshna phlim bad nongseng kam lajong na India, Pragya Misra, Khliehduh ka Public Policy and Partnerships ha OpenAI, bad la pyniaid ia kane da u nongshna phlim ba pawnam Shekhar Kapur.

Kane ka jingiamir jingmut ka la sdang da ka jingai jingkren u Shekhar Kapur ha kaba u la pdiang ba ka jingsngewthuh ia ka Artificial Intelligence (AI) ka dang kylla mynta. “Ym don mano mano ba tip ka AI ka dei aiu, ngi dang lap ia ki bynta bapher bapher jong ka AI kum ka Machine Learning, Deep Learning." U la kren ruh shaphang ka jingiatai nia shaphang ka lad jong ka AI ban wan bujli ha ki kam bad u la kren shaphang ka jingshem jong u kaba iadei bad ka briew kaba iarap kam ha iing jong u kaba la lah ban thoh ia ka phlim kaba wan hadien ka ‘Mr. India’ kaba la pynlyngoh bha ia u. U la pyniasyriem ia kane bad ka jingwan ki tractor, ha kaba la don ka jingsngew ba kine kin sa wan bujli ha ka jaka jong ki nongrep, hynrei ha ka jingshisha, ia ka teknoloji dei ban peit kum ka atiar ban kyntiew ia ka bor treikam jong ki briew, kumba long ka jingkylla digital ha kaba ki jingsiew UPI ki dei kiba la pdiang ha kylleng, u la ong.

Ka jingpyni ia ka SORA: Ka rukom pynkylla ia ki jingthoh sha ki video lyngba ka AI:

Ka Pragya Misra ka la pyni ia ka SORA, Ka rukom pynkylla ia ki jingthoh sha ki video lyngba ka AI kaba plié lad ia ki briew ba kin shna video na ki jingthoh. Ka la batai ba lyngba ki jingioh ia hukum ba suk, ka SORA ka lah ban pynmih ia ki video kiba pynbud ia ki bynta bapher bapher jong ki briew bad ka deiriti.

Ka la kren ruh shaphang ka jingbahkhlieh haba pyndonkam ia kano kano ka tiar, da kaba ong ba ym shah ban pyndonkam ia ki dur jong ki briew kiba lah paw khnang ban iada na ka jingai jingtip ba ialam bakla, ka jingkren pyrshah iano iano, bad ka jingpeit bein ia kino kino ki jait bynriew. Ka la ban jur ba ka AI ka lah ban plié lad ia ka kam saindur bad ba ka lah ban long ka atiar kaba donbor ia ki briew da kaba ai jingmyntoi ia ki nongsaindur bad ki nongpyndonkam ha kylleng ka pyrthei.

Ka jingai bynta ia baroh ha ka AI: Ka jingpynkupbor ia ki nongsaindur:

Haba la kylli shaphang ka bynta kaba dang kiew jong ka IA ha ka kam shna phlim, u Anand Gandhi, u la ong ba shen ka AI kan long ka bynta bym lah lait ha ka kam shna phlim. U la ong ba ka AI kan iarap bad iashim bynta kum kaba iatreilang ha ka kam shna phlim.

Ha kaba iadei bad ka bor jong ka AI ban pynmih ia ki jingthoh ba hyndai, ka Pragya Misra ka la ong ba kane ka la jia lypa mynta bad ka la ban jur halor ka jingdonkam ai bynta ia baroh ba kin ioh ia kane ka lad. Ka AI ka iarap ia ki nongsaindur ba kin wanrah ia ki jingtyrwa jong ki bad ban ioh ia ka jingbei tyngka bad kane ka plié lad ia ki director ba kin wahrah ia ki kam jong ki hakhmat ka pyrthei.

Ka jingiakren ka la phai sha ki jingkhuslai ba ka AI ka lah ban ktah ia ka bor saindur jong ki briew. Ha kaba iadei bad kane, u Shekhar Kapur u la ong, "Ka AI ka dang slem ban iakot bad ka jingmutdur jong ki briew namar ka jingmutdur ka wan na ka jingartatien, ka jingieid bad ka jingtieng, hynrei ia ka AI baroh ki dei kiba la thikna.”

U Kapur u la ong ba, lada ngi sangeh ban pyrkhat bad ai lut ki kam ia ka AI, kane ka dei ka jingeh jong ki briew.

Ka Pragya Misra, ka la ong ba ka AI ka dei ka tiar kaba kyrshan ia ka jingsaindur bad kam wan bujli ia kane. “Nga lah ban pyni kham bha ia ki jingsngew, ki jingmut jingpyrkhat da kaba pyndonkam ia ka AI,” ka la ong da kaba ban jur ba ka AI ka long kum ka nongiarap ba stad ban pynwandur ia ki jingpyrkhat jong ki briew. Ka la ong ba lyngba kajuh ka jingai hukum, ka SORA ka ai ki jubab bapher bapher man ka por, kumba long ki briew, kiba sngewthuh ia ki hukom ha ki rukom bapher bapher.

Kane ka bynta ka la kut ha kaba ki nongiashim bynta ki la mynjur baka AI ka lah ban kyntiew bha ia ka kam shna phlim hynrei kam lah ban wan bujli ha ka jaka jong ka jingmutdur jong ki briew.

 

* * *

(Release ID: 2077172) Visitor Counter : 3